الموضوع: لحد امتى هانفضل عايشين المسرحية المجتمعية الاجتماعية الهزلية دى !!

الســلام عليكم و رحمة الله وبركاته

انا عاوز اتكلم عن حاجات كتير الصراحة ،

هاحاول اختصرها فى نقاط أو فقرات صغيرة

(1)
بقى التعامل العام بينا و بين بعضنا تعامل اعداء ، ند ل ند ... اى تعامل صغير تحس انها مش تبادل منفعة أو تعاقد ،، لأ تحس انها اتنين جايين على بعض ، اعتقاد كل واحد فيهم ان التانى عاوز يضره
فى كل حاجة ، تعاملك و انت فى محل بتشترى حاجة ، وافق فى مصلحة بتخلص حاجة ، حتى و انت راكب فى مايكروباص ، تحس ان انت و السواق زى امريكا و الاتحاد السوفييتى ، كل واحد مستنى للتانى كلمة
دكتور الجامعة و الطالب ،، و اتفرج على التعامل فى امتحان شفوى ،،
و دكاترة الجامعات عموما طريقة تفكيرهم توقفت عند حقبة سعد باشا زغلول

دا حتى فى المصالح الحكومية ، مبدأ التعامل فى اساس المصلحة نفسه : لـبـّـس اللى قدامك قبل ما هو يلبسك !

(2)
التعامل الطيب بينا بقى عملة "مفقودة" ،،، اللي يقابلك بابتسامة و يعاملك باحترام دا بقى ناااادر
دا احيانا علشان تتوقع الابتسامة من حد لازم ترشيه الاول ، أو تدفعله تمنها

الحلاق اللى كنت بحلق عنده أول ما فى مرة حلقت عند حد غيره ، بقيت برمى عليه السلام مابيردش
و بقى بيقابلنى بالوش الخشب على طول ........ و من ساعتها و انا كمان قررت اغير الحلاق للأبد

(3)
الــــــــــــرشوة !!
حاول تتخيل كدا اى مصلحة حكومية بدون رشوة ،، تقريبا مستحيل !!
و الـ 5 جنيه ، و أحيانا والله 2 جنيه الرشوة اللى بياخدها موظف معايا بتساهل و اقتناع تام ممكن تضرنى انا اضرار مضاعفة ، و تعقد شغلى يمكن لأيام مش فى يومها بس !!
بس لو جيت اتكلمت ، تبقى المنبوذ ... اللى جاى توقف المصالح على الكل ......... أو اخوانى ، مهى هى دى التهمة الجديدة :) !

(4)
الروتين
أبو ام الروتين يا اخى ،، نفس النظام اللى كلنا ماشيين بيه من مئات السنين ،، ما اتغيرش
المصالح الحكومية على وجه خاص ،، انا شغال فى اكثر اجهزة الدولة غباء ، و أكثرها مشاكل نظرا لتحجرها و عدم وجود اى قابلية لتحديثها !!

دا حتى الروتين فى الحياة العامة عندنا ،
ذاكر علشان تدخل هندسة ، خلص كليتك ، شوف شغل ، لو مالقتش خدلك دبلومة أو ماجستير بدل القعدة ، اتجوز ، خلف ، عيش لحد ما تموت !!

بتتلخص القصة فى / اشتغل علشام "المم" ،، اتنيل اتجوز
اي شغلانة تعيشك فى البلد دى بدون ما تشحت ،، و بعدها تشحت علشان تلم مصاريف الجواز
عموما حياتنا مش ماشية تبعا للمنطق خاالص ، كل حاجة و عكسها !!

(5)
انت اخوان ؟؟
عاوز تخلص من جارك اللى سارق مكانك و بيجرش عربيته فيه ،، عاوز تخلص من صاحب المحل اللى و انت بتشترى منه مارضاش ينزلك فى السعر .. عاوز تخلص من اى حد معين ؟ بلغ عنه انه اخوانى
بقت تهمة و الحمد لله !

(6)
القلش الاعلامى
و انا بكتب الموضوع جه اعلان لريهام سعيد على خلفية موسيقية لاغنية المصريين بتاعت امال ماهر
و كلمات من بتاعت : انا بحب البلد دى ، مصر اعظم من كل بلاد العالم ...... الخ
المسلسلات اللى الرجالة بتشوفها علشان فيها نسوان متصورة بملابس متدلعة ،، أو النسوان بتشوفها علشان تزداد غباوة فى اوقات فراغها
السياسة على التليفزيون ، مالهاش دعوة بالسياسة !
دا حتى الاعلانات بقت كلها جزام التخسيس و العلبة الذهبية !!!

(7)
الطاحونة
الطاحونة اللى احنا عايشين فيها ، بندخل جوة مفرمة اليوم المصرى بنطلع منه و احنا ع المعاش
لما فى النهاية بنلاقى ان العمر راااح .. و ماحسيناش بحاجة من عمرنا غير انه ضاع


سيبكم من الثورة و المواضيع دى
كانت هاتفرق ايه الثورة طالما حياتنا هى هى ، و تفكيرنا هو هو !
كان هايبقى معانا يعنى شوية فلوس اكتر !

لو شعب مصر 80 مليون واحد ، منهم 5 مليون ممكن ييجى منهم ، الخمسة مليون دول منهم 200 الف واحد عنده افكار و مشاريع تطويرية ... المفروض الناس دى تتجمع و تجمع نفسها و مش هاقول يتعملهم وزارة لإن كدا الفكرة هاتموت ، لكن يتجمعوا بأى شكل ، و يحطوا الخطط التطويرية دى و يختبروها ، و بعد تكوين الخطة كاملة يطلعوا على الجهة أو الوزارة المختصة و يقدموها .. لقوا قبول خير و يكملوا
لقوا عدم اهتمام ، الـ 200 الف يعملوا اعتصام قدام الجهة دى لحد ما يبقى فيه اهتمام
الـ 200 الف مش كلهم فى نفس المجال ، بس هايدعموا بعض لإن ايد لوحدها ماتسقفش
--- مش عارف ، نعمل بنك الافكار على الفيس بوك مثلا ، أو قسم فى منتدى ، مش عارف ---

اهو يمكن بعد التطوير ، نقضى على جزء من الروتين ، الرشوة ، الطاحونة اللى احنا فيها
و يمكن ،، يمكن حياتنا تتحسن و نبقى افضل فى حق بعض !

===================
الموضوع كتبت فيه اللى جه على بالى ،، عاوز تتكلم و تفضفض و تتناقش معايا فى اى جزء فيه أو حاجة تانية متعلقة بيه هاكون سعيد بمشاركة افكارك معايا

و شكـــــــــرا

المشاركة الأصلية كتبت بواسطة بحار

ياراجل شيلتنى الهم .. كل اللى بتقولة صح .. وكتير موافق عليه على مااعتقد ..

لنا الله

المشاركة الأصلية كتبت بواسطة amr011111

عملت موضوع قريب من كده وملقتش اى حاجه تشجع

انا معاك فى الموضوع ده بس الموضوع عاوز نجمع عدد كبير ونجمع أفكار كويسه

كان رشيد محمد رشيد راح ليه مجموعه شباب شغالين فى شركه كبيره وقدموا استقالتهم وقالوله احنا هنشتغل معاك كفريق استشارى علشان نثبت ان الشعب المصرى قادر على عمل حاجات كويسه

المهم لو جمعنا افكار كويسه ولقينا ناس عاوزه تشتغل ببلاش لنهضه البلد ديه يبقى الباقى سهل ان شاء الله
وان شاء الله مقابلة المسؤولين هتبقى سهله

و موضوع رشيد محمد رشيد دا كان نفع فعلا ؟ أو حصل منه انتاج ؟ ولا مشوا الشباب على بيتهم و خلصت الحكاية :) ؟؟

انا فكرتى بالنسبة للأفكار التطويرية بادئها من تحت لفوق ،،
يعنى كل واحد ادرى بالموقع اللى فيه ، و التطوير لو حصل مش هاينبع إلا من الناس القائمين بالفعل بتنفيذ المهام اللى محتاجة تتطور
بمعنى : الموظف الصغير فى وظيفة ما هو الاقدر على انه يعرف ايه نوع و مدى التطوير اللى المكان محتاجه ،، لكن مش هايستنى وافد جاى من دنيا تانية هو اللى هايحطله خطة التطوير
بس بعد ما يكوّن بذرة فكرة التطوير ، محتاج عقول نضيفة تساعده فى اكتمالها ، و محتاج زملاؤه فى العمل يعرضوا عليهم الفكرة و يختبروا مردودها و نجاحها عليهم ... و فى النهاية محتاج التكاتف على الفكرة لحد ما الجهة المسئولة تناقشنا و تنفذها ...

المشاركة الأصلية كتبت بواسطة Ahmed_selmy

بص يا باشا الموضوع يتلخص فى كلمتين ضعف الدين و هشاشة الدوله
ومحدش يقولى المصرى متدين بطبعه.....وحقولك ليه
ايه اللى يخلى موظف ياخد رشوه
ايه اللى يخلى مدرس مايرعيش شغله ويدى دروس خصوصيه
ايه اللى يخلى عسكرى الشرطه يقعد يغتت عليك فى لجنه علشان تديلوا حاجه
ايه اللى يخلى الدكتور مايرعيش شغله فى المستشفى الحكومى ويوديك العياده الخاصه
....الاجابه النموذجيه حتقول ان مرتبه ضعيف......
.بس لو هو عنده يقين بالله كان حيعرف ان رزقه كدا كدا جايله ......ازاى يعنى ......هو الرزق فلوس وبس......اومال الرزق ايه......الرزق صحه و سلامه اولادك و تيسير امورك و راحة بالك و تيسير حال اولادك فى مذاكره و بركه فى كل حاجه انت بتعملها.
الناس لو عرفت ربنا صح وتمسكت بالاخلاق نقدر نفكر فى افكار لاصلاح الدوله ......انما لو الناس فضلت اخلاقهم فى النازل مهما الدوله عملة بردوا حيفضل الفساد موجود

أنا معاك فى الكلام ده ، بس التطبيق ازاى !؟
المعرفة الدينية عند الناس قليلة ، و دا بسبب الجهل اللى احنا فيه زى ما انت قولت
و الظروف المجتمعية فى مصر بتساعد على استمرار الجهل و بالتالى استمرار الرشوة و الفساد و استمرار الغباوة :(

و بعدين بص للجانب الآخر من المغالاة .. مصاريف الدروس و الهدوم و خلافه ، جهاز البت و جوازة الواد .... الخ

من ضمن الافكار اللى كانت جت فى بالى ، انى الغى توظيف البنات فى المصالح الحكومية ، إلا للمناصب اللى لازم تحتاج بنات ، و بكدا يبقى وفرنا فرص عمل اكتر للشباب ( علشان هما اللى بيفتحوا البيوت ) و الستات قعدوا فى البيت معززين مكرمين متفرغين لتربية الاولاد ،، أو لو عاوزين يعملوا مشاريعهم الخاصة يبقى زى الفل
و على جانب تانى المرتبات هاتزيد ، لإن لما يبقى رجالة اللى شغالة هايقل عدد مقاعد الوظايف لإن هاتلاقى فيه دمج للوظائف علشان الرجالة هاتنجز اكتر

لكن دلوقتى لو الاب و الام عاملين ، مين اللى هايربى الولاد ؟
هايسيبوهم للتليفزيون و الشارع يربوهم " اوسخ تربية " !!