سؤال بخصوص فرامل العربيه

**Abo Omar 9999** · 16-09-2014 01:01 AM

أخويا راح بالعربيه مشوار و هوه جديد فى السواقه
المهم طلع بالعربيه مشوار صغير و هوه شادد فرامل اليد من غير مايعرف
رجع كدا بعد حوالى نص ساعه و قاللى مفيش فرامل فى العربيه
بصيت لقيت الجنط سخن مولع و مفيش فرامل نهائى
و لقيته ناسى ينزل دراع فرامل اليد و كان فيه ريحه كده غريبه
ياريت أساتذة الفليشيا يعرفونى ايه اللى حصل و ايه العمل

**أحمد جودة** · 16-09-2014 08:35 AM

هاااااام جدا تشوف لو فيه زيت متسرب على الكاوتشات الخلفية الاول

بسيطة إن شاء الله متقلقش

الفليشيا زي اى عربية الفرامل موزعة على 4 عجلات لما حضرتك مشيت والهاند بريك مرفوع الفرامل الخلفية كانت قافشة على العجلتين اللى ورا

والنتيجة هتلاقي تيل الفرامل الخلفي محتاج تغيير المهم ميكونش فيه تسريب زيت من دايرة الفرامل

هتروح لميكانيكي تقولو شيك على الـ 2فرد اللى ورا من حيث تيل الفرامل هيفك الفرد ويغير تيل لو متاكل ويرجلش ع الهاند بريك

وضروري جداً تشيك على البلي بتاع العجل الخلفي لانه طبيعي مع قفشة الفرامل الصرة تسخن ومع الحرارة الزايدة تكون البلية اتأثرت

متابع معاك

**أحمد جودة** · 16-09-2014 08:44 AM

طيب ياتري العربية مفيهاش فرامل نهائي ولا فرامل خفيفة

شوف كدة الوضع اية بالظبط والريحة اللى حضرتك شمتها دي ريحة شياط نتيجة احتكاك تيل الفرامل بالعجلتين الخلفيتين

يعني ان شاء الله تكون الخساير فى التيل الخلفي فقط دة لو محصلش تسريب فى زيت الفرامل

ولو حصل تسريب بردو ان شاء الله تتعمل عادي

الميكانيكي يغيبر التيل الخلفي ويراجع على دايرة الفرامل كلها وبالمرة التيل الامامي ويظبط مستوي الزيت ويسحب الهوا من الدايرة

متابع مع حضرتك لحين انتهاء المشكلة

وبالمناسبة انا كمان حصلت معايا نفس المشكلة فى بداية تعليمي السواقة بس انا مشيت بيها حوالي 100 متر على سرعة منخفضة

وياريت اى حد بيتعلم يبص على لمبات الطابلوة قبل مايتحرك لانه لو عمل كدة كان هيلاقي لمبة الهاند بريك منورة

**أحمد جودة** · 17-09-2014 08:22 AM

المشاركة الأصلية كتبت بواسطة abo omar 9999

متشكر لنصايحك استاذ احمد
انا روحت للميكانيكى فعلا و كشف على الزيت الحمدلله مكانش فيه تسريب
أخد الهوا من الفردتين و طلع بالعربيه جربها قاللى تمام مفيش مشكله و التيل شغال مش محتاج تغيير

كلام سليم الحمد لله جت بسيطة

تقبل خالص تحياتي

**aw2100** · 17-09-2014 11:35 PM

المشاركة الأصلية كتبت بواسطة Abo Omar 9999

متشكر لنصايحك استاذ احمد
انا روحت للميكانيكى فعلا و كشف على الزيت الحمدلله مكانش فيه تسريب
أخد الهوا من الفردتين و طلع بالعربيه جربها قاللى تمام مفيش مشكله و التيل شغال مش محتاج تغيير

طالما دايرة الفرامل خدت هواء لما الطنابير سخنت وزيت الفرامل سخن والفرامل راحت يبقى كده زيت الفرامل عندك قديم ومحتاج يتغير اتصحك تغيرة وتحط زيت dot.4 نوع نظيف توتال او موبيل وحتحس بفرق رهيب فى الفرمله وشوف الموضوع ده منعا للتكرار !!
http://www.nilemotors.net/Nile/417860-a.html