العربية شهرين فى التوكيل و متصلحتش !!!

**mustafafafafa** · 26-09-2014 06:15 PM

السلام عليكم
تانى يوم العيد الصغير اللى فات عملت حادثة بالعربية المهم وديتها توكيل اوتو ايجيبت ابو رواش و بعد ما قعدت اسبوع عشان اخد دور و اسبوع تانى عشان يعاينو العربية و يعملو مقابسة تصليح قالولى العربية محتاجة شوية حاجات بسيطة كده و سربنتينة تكييف بس دى مش موجودة و هنبعت نجبها من المصنع !!!!
و من ساعتها من يوم 5-8 لحد النهاردة و السربنتينة دى مجتش
عملت شكاوى كتيير بالتليفون و كلمت المصنع و عملت شكاوى اد كده و مفيش اى نتيجة !!!
و كل مرة اتصل يقولولى كلام فارغ اصل رئيس قسم الشكاوى مش موجود على مكتبه اصل السيستم بايظ و مش عارفين نوصله الشكوى بتاعتك طب اقفل و هنخليه يكلمك هوا !!!
تنصحونى اعمل ايه عشان اخد حقى يمكن الحق استلم عربيتى قبل العيد !!!!!
العربية 2014 صنى الشكل القديم

**mohamed hussei** · 26-09-2014 06:21 PM

قريبي عندة نفس مشكلة نيسان تيدا شكل القديم الاكصدام مش موجود

**mustafafafafa** · 26-09-2014 08:39 PM

نعمل ايه طيب ولا نفضل كده راميين العربية فى التوكيل وخلاص :(

**Msanad** · 26-09-2014 08:59 PM

حماية المستهلك ووصل الموضوع لاعلى مستوى

**Abo_Mazen** · 26-09-2014 11:18 PM

واحد صاحبي كان معاه سوزوكي التو زن ..كان عمل بيها حادثه بسيطه زمان ..لبس في جزيرة رصيف ..والعربيه راحت لسمكري ومن يوميها والعربيه دي بتاكل مقصات ..يعني كل شهرين أو شهر يغير مقص ..راح التوكيل قالوله العربيه عاوزه زرجينه عشان كان في شغل إتعمل في الشاسيه ومتعملش صح والشاسيه فيه عوجه ..قصدهم على الشغل اللي إتعمل وقت الحادثه ..العربيه إترمت شهر في التوكيل محدش قربلها ..وكل ما يسأل ..أصل الميكانيكي اللي هيطلع المكنه كان عنده شغل ..ده على أساس إن هي مش شغل ..وبعدين يقولوله أصل إحنا مستيين أي سوزوكي التو زن تدخل صيانه عشان ناخد أبعاد الشاسيه منها ..دي على أساس إن العربيه اللي ريحالهم عربيه رينو وهما توكيل هيونداي ..وفين بعد شهر وعشر أيام العربيه إتعملت ..راح يستلم ..لقي عيب جديد في العربيه ..أول ما المروحه بتاعة الريداتير تشتغل تلاقي العربيه حصل فيها زلزااااااااال ..زلزال مدمر تحسه هيفرتك العربيه ..قالهم العربيه دي مكانتش كده ..قالوله لأ ما هو إحنا لما ظبطنا تحت العيوب اللي فوق ظهرت ..قالهم طب ما ظبتوش ليه فوق مع تحت ..قالوله مكناش نعرف إن فيه عيوب هتظهر فوق ..قالهم طيب والحل ..قالوله سيبها وإحنا لسه مكملوش الكلمه قالهم لأ ..أنا هاخدها إنشا الله أقلبها توكتوك ..خدها راح بيها لميكانيكي قاله دي مشكلة عفشه ..راح بيها لعفشجي ..قاله قاعدة الفتيس عندك فيها شرخ ..راح جاب قاعده إستعمال والعربيه بقت زي الفل

بالمناسبه الغريبه ..هو دفع في التوكيل 2800 جنيه ..لإنهم تقريبا غيروا عفشه كامله ..جوز مساعدين على جوز مقصات على سكاترا على كاوتشات ميزان ..وفي الآخر العربيه طالعه من عندهم معيوبه ..عادي ..هي كده التوكيلات

**ibrahimsaad** · 27-09-2014 03:14 PM

مشكله توكيلات مصر للاسف الله المستعان

**Ahmed abdkarim** · 27-09-2014 05:44 PM

المشكلة ان التوكيلات بقت بتجيب العربيات من غير ما تجيب قطع غيار ولما عربية تحصل لها مشكلة يبعتوا للشركة فى بلد المصنع يجيبوا قطع الغيار .

**mustafafafafa** · 28-09-2014 08:49 PM

بيقولوى مش لاقينها و لو لقيتها برة هاتها و احنا نركبهالك !!!
سؤال معلش
محل الفتح اللى جمب ابو طارق فى وسط البلد ده موزع معتمد ؟؟؟
انا لاقيتها عنده بس خايف تكون مش اصلية !!
اعمل ايه عشان اعرف انها اصليه ؟؟
القطعة سربنتينة تكييف خارجية
و شكراً

**tatasamy** · 30-09-2014 01:38 AM

أفضل شيء هوه تعليقك الأخراني ده، أشتري انت قطعة الغيار الي ناقصة من بره لو لقيتها وريح دماغك...ولو كانت مش أصلية أو استيراد حتى!

المشكلة في مصر فعلا قطع الغيار المستوردة ومحدودية الاستيراد وتكلفته في الفتره الأخيره، وخصوصا ذي ما كلنا عارفين الاعتمادات المتاحة للعملة الصعبة الي بنعاني منها :(

ما تظلمش التوكيل لانه مستني قطعة الغيار مش بمزاجه الى جانب اني شابف ان موضوع السربنتينة ده ما يأجلش استلام عربية كاملة مش لازم يكون التكييف شغال دلوقتي ده قصدي...لما تيجي قطعة الغيار تبقى تروحلهم يركبوها وخلاص :)

حضرتك بتتعامل مع م/ محمد يحيى ولا مين؟