الموضوع: لو مش عايز تنزل تشتغل .اشتغل من بيتك بس اشتغل- شغل انترنت

الولد ده فعلاً هايل و فيديوهاته مميزة, أنا من فترة كنت بتفرج على reviews من اللي بيعملها أيام ما كنت بفكر أغير موبايلي..
و لفت أنتباهي فعلاً جودة تصوير الفيديوهات بالأضافة للمحتوى المتميز و طريقة العرض, و شدني برضه أن الأنجليزي بتاعه لكنته مختلفة عن لكنة الأمريكان السود و حسيت أن واحد أبيض اللي بيتكلم.. (مجرد ملحوظة مش عنصرية)..
هو عموماً الـYouTube بالنسبة للشباب بره و بالذات في أمريكا هو وسيلة لعرض المواهب و نافذة يتشافوا منها..
حتى طلع مصطلحات جديدة تطلق على الناس دي زي Youtuber أو VLogger و بقى بيتعمل ليهم مؤتمرات سنوية زي VidCon وفي غيره..
كمية الناس و المواهب اللي طلعت في الموضوع ده خزعبلية, و كمية أفكار مش طبيعية بتطلع من شباب صغير و في كمان أصغر من 21 سنة..
في ناس أستفادوا أوي في الحوار ده من حيث الشهرة و الفلوس, عن طريق عدد المشاهدين الكبير اللي بيحققوه ففي المقابل YouTube بتدفعلهم فلوس, بالأضافة للـSponsors اللي بيدفعوا مقابل أن حد يقول تقييم أيجابي للمنتج بتاعهم على القناة بتاعته فبتكون زي دعاية غير مباشرة ليهم..
أنا مستعجب أزاي مفيش ناس هنا قادرة تستفاد من الموضوع ده, قليل أوي أوي أوي لما بيعدي عليا فيديو عربي بيقدم أفكار زي الناس دي!!..

المشاركة الأصلية كتبت بواسطة أبو آسر

مع كامل احترامي لحضرتك
بس مين باسم يوسف ده ؟ بيشتغل إيه يعني ؟ أفاد المجتمع والبشرية بإيه ؟ ده واحد أراجوز وفي بهلوانات بيشتغلوا في الملاهي أشهر منه على فكرة
ده واحد صنيعة نظام لغرض معين ولما انتهى الغرض خد التذكرة وخلع زيه زي العشرات اللي زيه
مش عايزين ندي ناس أكبر من حجمها ونحطها في مقارنات مجحفة
يعني ماركيز اللي التوبيك بيتكلم عنه هنا أفضل آلاف المرات من الأراجوز ده لأن ماركيز بيفيد ملايين الناس من خلال ريفيوهاته لكن الأراجوز ده فايدته إيه في الحياة ؟!
آسف على الخروج عن السياق بس المقارنة العجيبة والمثال الغريب ده استفزني شوية

أنا مش هجادل في حتة المحتوى اللي كان بيقدمه عشان نبعد عن أي نقطة خلاف, بس عايز أتكلم على الطريقة اللي عرفنا باسم يوسف من خلالها..
باسم يوسف أول ما طلع كان عن طريق اليوتوب, و حقق نجاح غير عادي و كمية مشاهدات غير معتادة على الوطن العربي..
النقطة كلها أن ده واحد كان عنده فكرة مختلفة عايز يعملها و بأمكانيات بسيطة قدر ينجح بيها, كل اللي كان محتاجه هو كاميرا و أنترنت و أوضة فاضية يصور فيها..

المشاركة الأصلية كتبت بواسطة MTAK

كل الناس اللى عماله تهاجم و تقول البلد و خلافه
و لو كان الناس دى هنا كان زمانهم فارشين جرجير

انا عايش برضه فى البلد و مش هاقول انها كويسه و انها بتشجع المواهب و خلافه

و لكن هاقول اللى عاوز يعمل حاجه بيعملها

هو لو اخدنا هذا الشاب كمثال , لامؤاخذه ايه اللى كان عنده غير اللى عندك

وصله نت و كمبيوتر و خلصت , و بدل ما تفتح اليوتيوب علشان تشوف مقاطع بلوتوث ساخنه (حزلقوم استايل ) او تشوف احدث الافلام فكر فى انك تعمل حاجه مفيده

و لو عاوزين امثله على ناس تانيه فى بلاد حالتها اسوء من مصر بكتييييير برضه موجودين

مثلا : الناس كلها بتشتكى من الكهربا سواء غلوها او انقاطعها طيب حد فكر يتعامل مع المشكله دى ازاى

هناك شاب افريقى احس بمشكله مشابهه و قرأ و علم نفسه و ابتكر طريقه يجيب بها كهربا

و علشان تعرفوا حال بلده , يكفى اقولكم ان الناس كانت فى قريته تقف عليه طابور علشان يشحنوا تليفوناتهم مش اكتر

ربنا يوفقنا لما فيه الخير

أنا متفق معاك جداً..
الموضوع لا هو صعب و لا مكلف, لكن المشكلة محدش عايز يتحرك من على كرسيه..
في ناس من الـVloggers دول كل اللي بيعملوه أنهم بيصوروا حياتهم اليومية و ينزلوها على يوتوب, يعني معتقدش أن في فكرة أبسط من كده أصلاً...
الموضع مش مقتصر على الـYouTube بس على فكرة, في شباب كتير محققين شهرة و نجاح مش طبيعي عن طريق أستخدام الـSocial Media زي الفيسبوك أو أنستجرام..