هل تعلم إن ومن وسائل الأمان في السيارات وقت الحوادث إن تتقسم نصين

**Abo_Mazen** · 20-03-2015 12:15 PM

كنت قاعد بحنكش قده على النت ..وبعدين لقيت موضوع عن وسائل الأمان في السيارات وقت الحوادث ..فلاقيت واحد كاتب إن من وسائل الأمان في بعض السيارات عند الحوادث إن العربيه تتفلق نصين ..يعني تتقسم نصين ..أنا طبعا دورت على صورة لعربيه من الجانب وحطيت خط أحمر عند الجزء اللي العربيه دي هتتقسم منه وقت إصطدامها من الأمام حسب وجهة نظر كاتب الموضوع ..وكان وجهة نظر كاتب الموضوع إن ده بيحمي السائق من إصطدامه بالجزء الأمامي من السيارة بفصل الجزء الأمامي عن بقيت السيارة ..وطبعا بما إن قائد السيارة هيكون رابط حزام الأمان ومع فتح الإيرباج ..فكده تقريبا قائد السيارة مش هيصاب بأي أذى صدمات أماميه ..بصراحه ..وجهة نظر مقنعه ..أنا عن نفسي إقتنعت

**rotanamasoud** · 20-03-2015 01:25 PM

هو لو الموضوع مدروس هندسيا ممكن
لاكن انا شايف ان الكابينه لازم تكون جزء واحد لان الشخص جواها وبعدين عند التصادم اصبحت بره مع النص اللى انت فيه معرض للاهلاك اكتر بكتير كفايه الطريق الانقلاب الدوران بعد الانقسام الخ لاكن طول ما انت فى كابينه قطعه واحده انت فى امان اكتر والامان بفضل الله اولا واخيرا

**Abo_Mazen** · 20-03-2015 01:36 PM

أصل هي نفس فكرة عربية القطر اللي لما تولع بيفصلوا الجزء اللي فيه مشكله عن بقيت القطر

**rotanamasoud** · 20-03-2015 01:47 PM

المشاركة الأصلية كتبت بواسطة m_m_sh_a

أصل هي نفس فكرة عربية القطر اللي لما تولع بيفصلوا الجزء اللي فيه مشكله عن بقيت القطر

بس دى مش مشكله حريق ده تصادم والامر مختلف

**besso** · 20-03-2015 02:58 PM

اول مره اسمع عن زى كده

اصلا لو افترضنا انه ينفع وانفصل جسم العربيه كده الركاب بقى عرضه اكتر لاى صدام اخر بافتراض انهم على طريقم وحصل كذا اصطدام ... يبقى الركاب ماتو كده خلاص

ثانيا : امتى الجسم ينفصل فى حاله اصطدام جانبى ولا امامى ؟؟؟

لو جانبى يبقى اخطر ... ولو فى الاصطدام الامامى يبقى زى ماقولت الركاب مش هايكونو محميين من اى صدمه تانيه

كلام غير منطقى !!

ممكن يكون الكاتب قصده انفصال الجزء بتاع المحرك عن المقصوره ... وده تقريبا موضوع فى بعض العربيات super sport
بحيث ان المقصوره كلها عباره عن قفص مدعم بشكل كبير عن باقى جسم العربيه وفى حاله اى صدام الجزء الامامى ينفصل

**kaza** · 20-03-2015 05:07 PM

ده فين الكلام دة ....منافي تماما لاصول تصميم الشاسيهات وماصادفتش حاجة زي كدة من ساعة مادخلت الكلية وعلي مدي 29سنة فاتو من اول مااتخرجت ...ياريت تدينا نبذة عن الموقع.

**Abo_Mazen** · 20-03-2015 05:47 PM

هو الكلام على الصدمات الأماميه مش الصدمات الجانبيه ..ثانيا الكلام كان على إن عند إصطدام السياره وبلوغ قوة الصدمه إن الجزء الأمامي هيطبق على الراكب ففي الحاله دي بدلا من إلتصاق الجزء الأمامي بالسائق وقتله هيحصل إنفصال ..طبعا الموضوع بيخضع لحسابات ومناطق معينه في وجه السياره بيخضع للحسابات دي ..أكيد طبعا العربيه مش هتنفصل بمجرد إصطدامها برصيف أو عمود نور وإلا هتبقى العربيه دي مغيره نص ..لكن هيحصل في حالة حدوث قوة بمقدار معين ..على جزء معين ..وبعدين أنا شايف ..وده رأيي الشخصي ..إن مع فتح الإيرباج ودفعها للساق للخلف وبالتالي مش هيفرق كتير إيه اللي هيكون حصل للجزء الأمامي ..ده طبعا مع الوضع في الإعتبار إن جزء كبير من سرعة السياره هيكون تشتت نتيجة الصدمه ونتيجة تشتيت قوة الصدمه كمان في فصل الجزء ده وطبعا ده رأيي الشخصي اللي بحاول أوصل بيه ليه أنا إقتنعت بالكلام ده..ده الإيرباج ما تتفتحش بسهوله ..يبقى أكيد برضه الصدمه اللي هتفصل السياره برضه مش هتبقى بسهوله

**besso** · 20-03-2015 06:15 PM

ماهو كل ابحاث الامن والسلامه فى صناعه السيارات بتلف حوالين انها تخللى مقصوره الركاب اقوى جزء فى جسم السياره بحيث انها تحافظ على اللى فيها من افراد فكون انها تتفصل ده منافى لكل الاعتبارات وكل التصميمات اللى بنشوفها

واصلا من بدايه الاصطدام الجزء الامامى بيحصله انهيار وده اللى بيخليه يتمص الصدمه ... يبقى بعد كده اى حاجه تحصل مالهاش فايده حت لو انفصل هو مش هايحميهم .. زى ماقولت لحضرتك يبقى الركاب مش محميين من اى اصطدام اخر

صدقنى الكلام ده غير علمى بالمره

**Batman372** · 20-03-2015 06:29 PM

فكره انفصال اى جزء من العربيه دى اصلا ضد كل وسائل و مساعى الامان ...
- اى انفصال فى الكابينه نفسها حيعرض حياه الركاب لخطر اكبر و مؤكد ... و لا يمكن وقتها السيطره عليه ...
- اى انفصال لاى جزء اخر من السياره .. حيعرض باقى السيارات الاخرى على الطريق الغير متداخله فى الحادث لخطر اكبر .. ايضا المشاه و الاشخاص المتواجدون فى مكان الحادث حيكونوا عرضه لخطر اكبر ...
و بالتالى المحافظه على الكابينه/السياره كوحده واحده افضل و امان فى ظل وجود وسائد الهواء و تطويرها مع تقويه القوائم ... يعنى كمثال كل وسائد الهواء الجانبيه فى العربيات من ٢٠٠٨ حتلاقيها فى الكرسى نفسه بدلا من الباب .. لان صدمه الباب نفسه ممكن تؤثر على فتح و اداء الوساده فى حين ان الكرسي بعيد نوعا ما عن الصدمه .....و هكذا ....
تقبلوا تحياتى ...

**Elawany13** · 20-03-2015 11:24 PM

اللى اعرفه ان من وسائل الأمان فى السيارات الفاخره ان أجزاء مدروسه من الباب هى اللى بتتفك عن العربية بعد الحادث علشان يسهل خروج اللى كانوا فى العربية .... وممكن يكون ده المقصود وحصل لخبطه واتفهم حاجه تانيه