الموضوع: تجربتى مع أقلام إزالة الخدوش

السلام عليكم

من فتره لقيت خربوشين في الباب الخلفى ، وخربوش في الباب بتاعى من تحت وواصل للباب الخلفى برضه ، شكلهم ضايقنى جدا رغم انهم مش كبار اوى بس يمكن عشان انا محافظ على العربيه ومفيهاش خربوش ، الحمد لله

المهم خدت قرار ادور عالنت على أقلام كيا ودخلت ebay و amazon ودورت وللأسف مالقتش كود اللون بتاعى ، يا اما موجود ومابيتشحنش غير داخل أمريكا او مش موجود أصلا

دا شكل القلم الأصلى اللى كنت عايزه وسعره بالشحن معدى ال 50 دولار







لقيت نوع من شركه تانيه مش بتاع كيا الأصلى ولكن دا الوحيد اللى لقيت فيه الكود بتاعى ، القلم Madein Korea وتمنه حوالى 16 دولار وشحنه free





طلبته وجالى في حوالى 10 أيام ، القلم زى ماهو باين في الصور ممكن تستعمله كقلم وممكن بالفرشه اللى جايه معاه ، طبعا انا استعملت القلم لان بالفرشاه ممكن ابوظ الدنيا والواحد قلقان أصلا

القلم السن بتاعه رفيع عامل زى الإبره وإستعماله صعب شويه عايز تركيز لان لو ضغط عليه جامد هاينزل لون كتير ، بعكس الأصلى اللى عامل زى الأقلام الفلومستر العاديه

بعد ما ابتديت اعمل بالقلم لقيت اللون اغمق شويه وقفلت جدا قلت العربيه باظت وفضلت متعكنن لتانى يوم

تانى يوم افتكرت ان كان عندى بوليش ممتاز وكنت جايب منه نوعين واسمه No.7 ودى صورته





ال Polishing Compound زى اى بوليش بيلمع الخدوش والحكات الخفيفه او لو جه لون تانى على العربيه من حكه او غيره ، اما ال Rubbing Compound فهو اقوى شويه وممكن يشيل طبقه من الدهان فكنت قلقان استعمله من ساعة ماجبته

استعملت ال Rubbing فعلا القطنه كان بيطلع فيها لون والنتيجه بقت أحسن شويه

دى صور الخرابيش









النتيجه من قريب













أحيانا لما تبصلها من بعض الزوايا ماتبقاش باينه زى الصوره دى





وطبعا من بعيد شويه مش باينه خالص









أخيرا أنصح بالأقلام الأصليه من كيا لان استعمالها هايكون اسهل ونتيجتها افضل

في إنتظار ارائكم وتقييمكم للتجربه