عن رد الصاج و إزالة الخدوش

**nadeen** · 02-07-2010 02:07 PM

السلام عليكم ورحمة الله وبركاته

ممكن لو سمحتوا اعرف اد ايه بتكون تكلفة ازالة الخدوش والكحتات القوية من الصاج وكمان لو فيه مع الخدش فعصة فى الباب لجوا ؟ وايه افضل مكان تتعمل فيه الحاجات دى ، يعنى لو التوكيل افضل هل سعره هيكون فارق قوى عن بره ولا لأ؟

**bebo_abdeldayem** · 02-07-2010 02:18 PM

التوكيل فعلا سعره بيبقي مبالغ فيه

**nadeen** · 02-07-2010 05:59 PM

طيب يا جماعة يمكن تكونوا مش بتردوا علشان مش عارفين شكل الخبطة، هى فعصة فى الباب بتاع السائق من تحت .. معلش يا جماعة استحملونى شوية فى السؤال اللى جاى ده أصلى قريت هنا فى المنتدى ان فى ناس بتغير الباب كله بسبب خبطة وانا خايفة لتكون الحكاية كده ولا هى شكلها ايه الخبطة اللى بيغيروا فيها الباب أصل العربية لسة جديدة؟

**fawzyyyy** · 02-07-2010 06:21 PM

اولا ما دام هي فعصة بسيطة في الباب من تحت يبقي بسيطة انشاء الله هي حتترد علي البارد و خلاص و انشاء الله مش حتبقي باينة و لو حضرتك عايزة ترشيها ...... ممكن تترش الجزء بتاع الخبطة بس و خلاص و الموضوع انشاء الله مش مكلف....

تاني حاجة احسن ناس بتصلح هما الحرفيين...........التوكيل مبيعرفش يسمكر او يرش حاجة ......ده بشهادة الناس كلها اللي صلحت الصاج في التوكيل..غير كده اسعاره غالية جدا ممكن توصل ل 3 اضعاف بره......و طبعا اول حاجة حيقولها لازم تغيري الباب.........!!!!!

تالت حاجة بقي هي ان حضرتك بتقولي العربية لسا جديدة........فا من رأيي ان حضرتك تسبيها زي ما هي خصوصا ان حضرتك بتقولي ان هي في الباب من تحت يعني مش ظاهرة اوي..........ده بس عشان العربية متبقاش رشة حاجة فيها و هي جديدة......و لكي طبعا مطلق الحرية

**fawzyyyy** · 02-07-2010 06:25 PM

علي فكرة انا لسا جايب شيفرولية سبارك من شهر تقريبا .....و قبل ما ارخصها اتخبطت تحت البيت...و بردو كانت فعصة في الباب اللي ورا و بردو كانت في الباب من تحت........بس انا سبتها و مصلحتهاش عشان استخصرت ان العربية تكون لسا جديدة و اروح اصلحها و ادهنها كمان.........!!!!!

**Nader007** · 02-07-2010 06:36 PM

شوفى يا استاذة نادين الباب مش هيتغير عشان حكة او فعصة الباب بيتغير لو لا قدر الله اتعجن فى حادثة او خدله خبطة صعبة
التوكيل اسعاره عالية بس بيطلع الشغل قريب من الاصلى فأنا بفضل التوكيل فى رش العربية عن الصنايعية العادية، لو رش باب واحد فى التوكيل ممكن يكلف حوالى 600 - 700 جنيه لكن ماعرفش هياخدوا كام على رد الصاج
لو جينا للصنايعية بقى السمكرى ياخد 50 لو خبطة عادية و 100 150 لو شغل الباب كتير و بتاع الدوكو الاول ربع دوكو 40 جنيه و معجون و بطانة و ورنيش 40 كمان و ايجار فرن 250 و مصنعية 100 او 200 حسب الصنايعى يعنى الباب يخش فى 500 جنيه دوكو
لو هتعمليها عند صنايعية يبقى لازم تسألى عليهم و على شغلهم الاول عشان مش اى حد ينفع ،انا شايف التوكيل اضمن فى الدوكو عشان تطلع العربية فبريكة و ش مشكلة الفلوس الزيادة و تفضل العربية بنظافتها

روحى الاول شوفى التوكيل هيكلفيك كام و قررى على مهلك