الموضوع: صوت فرقعه في الشكمان و صوت صفاره في تيل الفرامل

بالنسبة لموضوع التيل نضفه بالهواء لإن ممكن يكون شوية تراب ( و ده على حسب الصفارة و هل مستمرة و لا بمجرد ما تطلع بالعربية بعد راكنة طول الليل), لو الصفارة مازالت موجودة يبقى عليك و على التوكيل تثبت شكوتك من صفارة فى تيل الفرامل و تطلب تغييره (لإن على كلام بعض الناس المهمة عند التوكيل و اللى التوكيل بيغيرلهم التيل و الطنابير فى الضمان مجاناً, إن التوكيل عارف إن التيل بينزل حامى و بيبوظ الطنابير و بيتم تغييره مجاناً طالما التيل معملش 10000 كيلو), يبقى حضرتك تروح و تشوف إذا الكلام ده جد و لا كلام دعايات عشان يغطوا على مشاكل الناس اللى إتعرضت لحوادث بسبب هروب الفرامل (و أنا منهم) و مقدمين شكاوى فى جهاز حماية المستهلك. مع العلم إن التيل لو تالف أو مخالف للمواصفات ده سبب كافى لهروب الفرامل فى أى وقت, و للإسف ناس كتير ماتعرفش المعلومة دى و هاتلاقى نصيحة خطأ ناتجة عن حسن نية و هيا إستخدام تيل من خارج التوكيل بـ 200 جنيه, و ده للإسف يضيع حقك لو الطنابير ظهر فيها مشكلة أو لو لا قدر الله ظهرت مشكلة هروب فرامل. إعذرنى فى إجابتى المطولة بس ياما الواحد إتعلم على يد أخوة أفاضل هنا فى المنتدى و ماكنوش بيبخلوا على الواحد بمعلومة وافية و شاملة.