الموضوع: نيسان سينترا ولا لانسر شارك هاي لاين

أنا رأيي السنترا أحسن، بالرغم من إنها تقفيل تايلاند مش اليابان زي الشارك!
السنترا أحدث وأجمل، وصالونها أوسع، وشنطتها أكبر، عزلها أحسن، فتيسها أحسن، دريكسيونها أخف على السرعات البطيئة وأتقل على السرعات العالية.. الحاجة الوحيدة اللي ممكن السارك تتفوق فيها هو سعر إعادة البيع بسبب انتشارها الخرافي في السنتين الأخيرتين!! لكن الكلام هيفرق معاك لو هتبيع بسرعة بعد سنة أو سنتين، إنما على المدى البعيد أتوقع إن السنترا هتاخد وضعها وهتنتشر وسعر إعادة بيعها بعد غ أو 6 سنين من النهارده هيبقى تمام إن شاء الله.
وعلى فكرة بالنسبة للشارك في حاليا أكتر من 18 فئة في مصر، ما بين وكيل، وخليجي سعودي، وشرق أوسط، وأنا شايف إن دي مش ميزة بل عيب، لأن ده معناه لعب كبير في الكماليات والفئات من قبل التوكيل والتجار، وكفاية إن الشارك عربية لم تحظ بأي تطوير على مدار 8 سنوات، اللهم إلا تغيير الموتور من 1500 إلى 1600 فقط لا غير.
بخصوص جودة الوكيل، مفيش توكيل في مصر عدل لكن ممكن يبقى فيه توكيل أحسن من التاني، وعموما توكيل الاتنين، ميتسوبيشي ونيسان، أسوء من بعض.. والله أعلم.

سنترا أحسن