الموضوع: معايا مازدا 2008 و بفكر اشتري 301

المشاركة الأصلية كتبت بواسطة roufa

شباب بفكر اشتري 301 موديل 2014 كسر بس معرفش عنها حاجة
هل العربية فيها مشاكل ؟ التوكيل كويس ؟ سمعت عن مشاكل في الطنابير ؟
ليها قطع غيار بره و ناس بتفهم فيها ؟
اهم حاجة اداء العربية نفسه , انا سواقتي رياضية و متعود من المازدا عي اداء ممتاز من حيث الثبات و الجري و الفرامل هل هتصدم مع البيجو 301 و لا هتبقي نفس الكلام

بناءً على كلام و أسئلة حضرتك يبقى العربية مش هاتناسبك تماماً

التوكيل: ادخل على صفحتهم على الفيسبوك و شوف كمية الشكاوى من العملاء بإختلاف الموديلات بما فيها شكاوى ملاك البيجو 508 و تعامل التوكيل مع مشاكلهم بيكون إزاى.

التيل و الطنابير: التيل المستخدم فى العربية بيصفر و يخلص على متوسط 15000 كيلو و أحياناً بيبوظ الطنابير و تقدر تبحث هنا فى المنتدى بكلمات دليلية زى تيل بيجو 301 و مع طبيعة سواقتك اللى ذكرتها يبقى مش هايكمل معاك لـ 10000 كيلو, و أستخدام بدائل زى تيل من خارج التوكيل هايضيع عليك حقك فى تغيير الطنابير تبع الضمان لو فيها مشكلة و الأهم من كدا مش هاتضمن مستوى كفاءة الفرامل, لإن الخامات المصنع منها التيل بيكون ليها عامل مؤثر فى مستوى إستجابة الفرامل و سرعة التوقف عند تعرض التيل لدرجات حرارة متغيرة و مرتفعة و بصورة سريعة, فلو هاتغير التيل و تجيب تيل خارجى يبقى شوف أفضل نوعية فى السوق مهما كان سعرها حتى لو تعدى الـ 1000 جنيه (مافيش إسترخاص فى عوامل الأمان و خصوصاً الفرامل).

الثبات: ثباتها جيد لغاية 150 ( و ده بيتأثر بمستوى ضغط الإطار و حمولة العربية و طبيعة الطريق), لكن لازم تراعى إن العربية مافيهاش نظام esp و العربية سيدان و شنطتها كبيرة, و من كلامك يبقى أكيد عارف تأثير ديل السمكة فى المناورات بالعربيات السيدان من غير نظام الفرامل ده و إزاى ممكن يعرضك لحادث لا قدر الله. للإسف حتى مع الحفر الصغير (اللى بتبقى عامله زى النفق او فواصل الكبارى) هاتحس بتعويمه فى الدريكسيون خصوصاً لو فى ملف و حتى على سرعات قليلة زى 60.

الجرى: العربية طلعتها تقيلة نسبياً فى درجات الحرارة المرتفعة (فوق الـ 40 بالنهار) و خصوصاً لو مشغل التكييف و وقفت فى إشارة أو كنت راكن, لكن مع الغيار الرابع بتبدأ تجمع معاك و تاخد سرعتها لكن مع السرعات المرتفعة صوت المحرك بيكون عالى نسبياً, لو مشغل الكاسيت و رافع الصوت شويه مش هاتلاحظه.

قطع الغيار مش متوفرة بكثرة خارج التوكيل, و للإسف إستجابة التوكيل لتوفير قطع الغيار مزعجة لأقصى درجة, برضه حضرتك تقدر تشوف ده على صفحتهم الرسمية من شكاوى العملاء.

ربنا يوفقك لحسن الإختيار.

بناءا على كلامك وكلام اشرف باشا ............ بلاااااااااااااااااش وابقى افتكر ان انا قلتلك بلااااااااااااااش

المشاركة الأصلية كتبت بواسطة roufa

والله مش عارف اقول ايه لحضرتك بجد الف شكر و اجاباتك كانت في الصميم
كعني كلام حضرتك كده ان كل 10 الاف هحتاج اغير تيل و طنبورة اللي هو مش طبيعي
طيب هما في التوكيل سعرهم كام ؟

تعليقا علي كلام حضرتك في استجابة التوكيل لتوفير قطع الغيار مزعجة , هل ده معناه ان قطع الغيار مش متوفر حتي في التوكيل ؟

و شكرا جدا يا استاذ اشرف

لا شكر على واجب و ربنا يوفقك و يكرمك لأفضل إختيار و يرزقك خير العربية و يكفيك شرها

انا مش فاكر سعر طقم الطنابير دلوقتى بكام, ممكن تتصل على 19207 و هايتم تحويلك لأحد مراكز الخدمة, بالنسبة للتيل بتاع التوكيل (اللى عليه جدال كبير جداً) بحوالى 650 جنيه.

بالنسبة لقطع الغيار و مدى توافرها فده أكيد بيكون على حسب قطعة الغيار, يعنى ماسمعتش عن ازمة فى توافر التيل و الطنابير فى التوكيل (و إن كان و للإسف بتتم محاولة تهرب من تطبيق نظام الضمان بخصوصهم كلما أمكن ذلك, يعنى إنت و شطارتك معاهم), لكن اللى قابلتهم مشكلة فى الفتيس بينتظروا لشهور على ما الفتيس يوصل من فرنسا.

برضه بأكد على ضرورة مراجعتك لصفحتهم الرسمية على الفيسبوك و شكوى العملاء بأختلاف الموديلات من عدم تواجد قطع غيار مختلفة و مستوى الصيانة الضعيف و ردود فعل التوكيل اللى بتوصل العملاء للجوء لحماية المستهلك و الإنفعال عليهم و التهديد برفع قضايا عليهم.