الموضوع: بفكر اشترى وخايف مازدا 3

نقي واحدة نضيفة و ان شاء الله مش هتتعبك خالص
عربية رائعة
انا ندمان اني بعتها و جبت سيفيك
بس استهلاك بنزين اكتر شوية من الكوري

انا اللي فهمته من كلامك انك مش هتقدر توفر لمصاريف صيانه العربيه أكتر من 300 جنيه في الشهر يعني 3600 جنيه مصاريف صيانه سنويه للعربيه
الرقم ده قليل جداً بشكل عام وبالنسبه لعربيه زي المازدا 3 ده مستحييل
لو فعلاً ذي ما انا فاهم كده فانسب حاجه ليك هي الكوري وميبقاش كوري فاخر يبقى حاجه اقتصاديه زي الفيرنا واللانوس والاكسنت او اللنترا 2006 مثلا او ماتريكس
وربنا يوفقك للخير

طب ما تحسب هى بتحتاج اد ايه فى السنة صيانات وبعد كده قول الرقم ده قليل
الصيانات الدورية على سلبيل المثال :-
زيت موتور 10000وفلتر 350 جنيه
زيت فتيس وفلتر كل 60000 حوالى 600 جنيه
سير مجموعة حوالى 200 جنيه
بوجيهات معاك من 120 جنيه 250 جنيه
تيل امامى وخلفى حوالى 1200جنيه
فلتر هواء 140 جنيه
يبقى المجموع حوالى 2800 وفى حاجات مثل التيل والبوجيهات ممكن تقعد معاك اكتر من سنة حسب الاستخدام
وفى الاخر الناس الخبرة زى شادى وميدو و بيونير اللى هنا يفيدوك اكتر منى ولو فى حاجة زيادة يعرفوك بيها

بص يا باشا مبدئيا الزيت و الفلتر دول اساسي في اي عربية هتركبها
تيل الفرامل انا كنت بستعمل الريمسا الاسباني احسن من الاصلي بكتيير و ب 220 جم الاصلي تايلاندي على فكرة مش ياباني
زيت الفتيس و الفلتر بردو اساسي في اي عربية و لو اني شايف ان فلتر الفتيس ميتغيرش و عملت بالعربية 155000 كم من غير مغيرة كنت بنضف الفلتر زي اي عربية و خلاص بدل مدفع 450 على فكرة توكيل النوندا مش بيغير فلتر الفتيس
سير المجموعة مش حوار بردو دة كل 100000 كم
البوجيهات الاصلي ب 140 جنية فى علبة مازدا اوريجينال و مكتوب في الكتالوج تتغير كل 60000 كم يعني رخيصة و بتعيييييش
فلتر الهوا بردة رخيص بالمقارنة حتي بالكوري و ممكن تجيب فلتر سبور k&n ستوك ب 450 جم يعيش معاك العمر كلو و يعليلك الهورس باور كمان
استهلاك بنزين زي السيفيك تقريبا بس اقل من الصني الشكل القديم و انت و سواقتك بردو لو بتحرق او بتمشي في زحمة

بس خد عندك اقوي تكييف ممكن تشوفة في عربية
و اقوي سحب و تجميع لحد سرعة 100 بعد كدة بتضعف شوية
اعلى هاندلينج و انت سايق تحس انها بي ام احسن حتي من الهوندا
ثبات كويس جدا بس الهوندا افضل شوية
عزل العربية جيد بس عشان عربيتى كانت بفتحة سقف فالعزل مش جامد اوي
واطية شوية على الارض بس لو بتاخد المطبات براحة خلاص تمام
كل حاجتها معمرة جدا انا بعتها ماشية 155000 كم و غيرت قاعدة موتور في ال140000 كم بس

المشكلة كلها لو خبطها هتزعل شوية

اي استفسار انا تحت امرك

ده بردو بيعتمد انتى بتمشى كام كيلو فى السنه واسلوب سواقتك, كل واحد فينا ماشيو غير التانى

الصيانة دي على حسب انت هتعمل اية
يعني زيت و فلتر و بوجيهات و تيل فرامل
اي بلية في الشارع هيعملها

طقم الكاتينة جنزير مبيتغيرش

الخلاصة العربية عادية جدا اي حد يصلحها زيها زي اللانوس و الفيرنا مع فارق الاداء

بس المهم الحالة اولا و اخيرا