الموضوع: تجربتى مع تكييف الياريس 2009 وتعديله بتكييف الكورولا

سلام كبير اوى وحار جدا لاعضاء المنتدى وخصوصا التويتاوية ........
بقالى كتير اوى مرفعتش مواضيع على المنتدى لكن حصل معايا مشكلة كبيرة فى تكييف الياريس حبيت أشارك معاكو تجربتى كاملة .......
انا العربية دلوقتى عاملة 105 الف كم بدات مشكلة التكييف معايا ان لقيت التكييف يبقى شغال ومسقع عادى وفجأه يقوم فاصل تبريد ومخرج هواء عادى لمدة دقيقة ..... فضلت متابع الموضوع اسبوعين لقيت المشكلة بتتكرر ووقت الفصل بقى بيزيد لغاية ما وصل ان بقى يفصل بالربع ساعة والنصف ساعة وافضل اعمل معاه كل محاولات الساحر هودينى علشان يشتغل افصله واشغله اغير سرعات اى حاجة علشان يشتغل او اتحايل عليه حتى علشان ينقذنى من الحر اوقات كان يستجيب واوقات تانية كان ندل اوى المهم ....... ابتديت ادرك ان فى مشكلة حقيقية
كالعادة كان الحل الأسهل انى اكشف على الشحن لقيت الدنيا تمام .... رحت ل 2 بتوع تكييف وكانت الصدمة لما قالولى ده عيب فى الكباس بتاعها والعيب ده موجود فى كذا عربية زى الجتا والاوكتافيا !!!!! ...... وده بسبب ان نوع الكباس بيبقى شغال على طول مع الموتور وفى بلف كنترول ده اللى بيتحكم فى فتح الهواء او قفله لما تشغل التكييف والبلف ده اللى بيبوظ وملوش علاج...... طبعا اتصدمت من الكلام وقلت مبدهاش بقى اطلع على التوكيل ...... الكلام المبدئى من المهندس قبل الكشف ان مش شرط الكباس يكون هو اللى باظ وفى دائرة امبليفاير هى اللى ممكن تبقى فيها مشكلة قلت يا مسهل اي حاجة ارحم من ان الكمبرسور نفسه يبقى هو اللى باظ ........ بيت العربية يوم فى التوكيل وكانت الصدمة الكبرى لما لقتهم بيقولولى ان الدائرة فيها رايش ولازم السستم بتاع التكييف كله يتغير (كمبرسور - سربنتينة داخلية وخارجية اكسبنشن فالف ..... الخ) قلتلهم والقصة الحوة ديه تعمل كام قالولى مش اقل من عشريف الف !!!!!!!!!!!!!!!!!!!!!!!!!!!!!!!!!!!!
طبعا قمت رايح لمحمود حبيبى اللى شخصلى العطل فى الاول وقالى ححللك المشكلة بس مش حنجيب الكباس بتاعها لان النوع ده مش كويس والمشكلة ممكن تتكرر تانى ..... قلتله طيب عايز تعمل ايه قالى حنركب بتاع الكورولا 2007 وده ملوش بلف كنترول ده بيشتغل بحاجة اسمها كلاتش يعنى الكمبرسور نفسه مش بيلقط غير لما تشغله مش زى التانى بيبقى شغال على طول وده كفائته وعمره احسن ..... وقالى حنعمل معاه شوية تعديلات بسيطة ...... المهم قلتله اعمل الصح بس نحل المشكلة نهائى ...... فك الكمبرسور قالى الدائرة بتاعت الفريون مش نظيفة ولازم نغير السربنتينة كمان قلت مااااااااااااشى اما نشوف اخرتها فالمهم ركبته وجبت سربنتينة جديدة واضطربنا نغير السير بتاعها بواحد تانى مقاسه أقل ( السير الأصلى مقاسه 1210 واللى اتعدل مقاسه 1170 مع العلم انى عرفت ان بتاع الكورولا مقاسه 1180 ووممكن يركب برضه) وعملنا تعديلات فى اتجاهات المواسير عند واحد لحام علشان احافظ على المواسير الأصلى ....... طبعا بعد كده نظفنا الدائرة ....... شغل يا معلم جرب الحمد لله لغاية دلوقتى حوالى 500 كم شغااااااااال زى الفل .......
ملحوظة لما كان بيدور على كمبرسور الكورولا لقاه ناقص جدا ولقاه بالعافية واللى موجود كتير الاصلى بتاعها وكل التجار كانو بينصحوه انه ياخد بتاع الكورولا فواضح ان المشكلة بقت معروفة وده انسب حل ليها ........... على فكرة انا نمكى جدا فى موضوع التعديل او تغيير اى حاجة لكن الظروف والمنطق اجبرونى ان ده الحل الافضل وفعلا لما فكيته وشفت البلف بتاع الكنترول وشفت فكرة عمل الكباس التانى اقتنعت انه فعلا احسن .......
معليش انا عارف انى طولت اوى ورغيت كتير بس حبيت انقلكو التجربة بالتفصيل علشان الاستفادة تعم ........
والسلام ختام يا أحلى أعضاء

فداك و شكرا على نقل التجربة

ياريت تكمل المعلومة بالتكلفة