الموضوع: مشكلة غريبة جدا ( باسات )

بعد التحية ،،،

الرجاء المساعدة لو أمكن

عندى عربية باسات موديل 2006 مانيوال كانت ماشية زى الفل روحت لعفشجى محترم ومشهور قوى في المنصورة لتغيير التيل وتظبيط العفشة وبالفعل قام بتغيير التيل وبيض وجلب و 2 ميزان أمامى وميزان خلفى وكشف على المساعدين والمقصات وقالى زى الفل مافيش فيهم حاجة .

المهم قالى كدا العفشة 100 % هاتظبط زوايا وترصص (كنت شارى طقم كاوتش جديد) ونشوف العربية مع بعض

المهم بعد تظبيط الزوايا لقيت الطارة فيها ربع لفة يمين بمعنى ان العربية تبقى ماشية في طريق مستقيم وثابتة بس الطارة معووجة ناحية اليمين بقيمة ربع لفة قولت للفنى ليه كدا المفروض تبقى الطارة عدلة قالى والله ده كان أخر الريجلاش الموضوع سهل جدا انت هاتروح لكهربائى هايفكلك الطارة ويعدلها وبس وسألت العفشجى أكد نفس الكلام .

المهم ركبنا العربية سوى وجربناها كنت حاسس انى راكب عربية تانية .

المشكلة من هنا :

روحت لكهربائى عندنا في دمياط وللأسف مشهور قوى فك الطارة وعدلها وربط كل ده والعربية واقفة في خط مستقيم المهم حاسبته ومشيت شوفت حاجة غريبة قوى العربية بتحدف ناحية اليمين بنفس القيمة اللى في الطارة قولت أروح لبتاع الزوايا ويقولى ايه المشكلة قالى كان لازم الكهربائى يظبط ويعاير الطارة بالكمبيوتر مش يدوى وخلاص قولتله طيب انت ماقلتليش كدا ليه من الأول المهم دلنى على كهربائى في المنصورة مشهور قوى روحت له وماشاء الله لقيت واقف عنده عربيات حديثة كتير وماركات عالمية قولت كويس دى حاجة تطمن.

المهم حكيت له على اللى حصل بالظبط المهم ركبنا العربية وبصراحة عمل كتير عمل ريسيت أكتر من مرة للباور وعايره من جديد وحاول محاولات كتير بس كلها دون جدوى بعد كل مرة العربية بتحدف يمين باردو يفك الطارة ويعوجها ربع لفة ناحية اليمين العربية تمشى في خط مستقيم بكل سهولة ويسر وان عدل الطارة العربية تحدف يمين تانى المهم الراجل بعد أكتر من ساعتين زهق وكان مستغرب قوى من اللى بيحصل وقالى والله الموضوع ده عملته كتيييييييييير جدا ومابياخد في إيدى اكتر من 5 دقايق

المهم قالى كدا يبقى فيه حاجة في عفشة العربية روح اكشف عليها .

ومن ساعتها انا كبرت دماغى بس الموضوع بقا مقرف لو سبت الطارة وانا سايق العربية بتحدف يمين بنفس قيمة العوجة اللى في الطارة حاجة وحشة جدا بالذات عالسرعات العالية .

وبالنسبة للتوكيل واللى بسمعه عنهم خايف اروح عندهم غير مضطر

هل يوجد حل لهذه المشكة

أسف جدا عالإطالة وشاكر جدا الإهتمام والرد