الموضوع: مقارنه كارنز / كريتا / جوك / كابتشر / ايكوسبورت

انا شغال فى السعوديه وحصل ان كان لازم اشترى عربيه وكنت عايز عربيه SUV او Cross over وتكون 1600 سى سى
طبعا الشراء مش بالسهوله اللى الناس متخيلاها عن الخليج لاعتبارات كتير
المهم ان اسهل حاجه هى انك ممكن توصل لاى عربيه وتعمل تيست درايف فى لحظه وفى بعض الشركات بتدى تيست درايف لمده يوم الى 3 ايام لبعض الانواع من العربيات
العربيات اللى انا شوفتها هى
كيا كارنز
هيونداى كريتا
رينو كابتشر
نيسان جوك
فورد ايكو سبورت
بيجو 2008
فيات 500X

1- البيجو بشكل عام مش موجوده ولو موجوده فهى موجوده على استحياء وملهاش اى سوق وكمان سعرها غالى, طبعا عديت على المعرض جبرا للخواطر وملقتش عنده عربيات بيجو ومشيت ومرجعتش تانى.

2- الفيات 500X او حتى 500L حلوه اوووووى من جوه ومن بره وخامات تحفه وشكل رائع وجديد وقعدتها حلوه لكن فى الاخر هى فيات, ملهاش اى سوق هنا, وطبعا فى مصر اول ما هيتقال فيات الناس هتفكر فى 128 والذكريات الاليمه اللى اتحفرت فى ذهن المصريين عقود من الزمن, فطبعا الفيات لازالت اختار سىء, لكن بجد العربيه حلوه, حد يشتري 500X بالذات ويقولى عامل ايه :)

3- الفورد ايكو اسبورت شكلها حلو من بره ومن جوه عاليه جداا على الارض, بينزل منها نسختين بس (Ambiente - Trend) عشان السعر يبقى اقل
والحقيقه العربيه فعلا سعرها حلو
عيبها الاساسى انها صناعه هندى, ودى حاجه انا ملاحظها فى العربيات الهنديه اللى بتيجى زى نيسان صنى والكريتا والايكوسبورت, خامات سيئه جدااا
العيب التانى موتورها على اد حاله نسبه الى حجمها
العيب التالت ان وكيلها فى الخليج مستغنى عنها, ومعتبرها كم مهمل ومش مهتم انه يبيعها, وطبعا التوكيل المصرى على اد حاله واعاده بيع العربيه سواء فى الخليج او مصر هيبقى فى الارض

4- هيونداى كريتا, عربيه كبيره جداااا وواسعه اوووى خصوصا الشنطه والوانها جميله جدااا وسعرها كويس جدااا ومناسب لامكانياتها وعاليه على الارض جداا لكن اقل من الفورد
العيوب بقى :)
- صناعه هندى باينه على الدواخل بتاعتها, خامات من تحت بير السلم, وده تسببلى فى صدمه عاطفيه معاها وخلانى اتراجع عن شرائها
- الموتور طبعا ضعيف على حجمها, ومتستناش منها اى جرى.
- مش سلسه فى السواقه, يعنى كنت حاسس انى سايق بوكس حديد بيتحرك بشكل ناشف اوووى ومش سلس فى الملفات
- الفئه الاساسيه بتاعتها معمول فيها حركه زباله, وهى ان المرايه معمول لها دراع جوه العربيه عشان تحرك المرايه من جوه العربيه, طبعا البعض شايفها فكره عبقريه, وانا شايفها فكره سيئه جداااا ومخليه شكل العربيه اكنها عربيه انتاج سنه 80

مفيش جى بى اس, دى شاشه تاتش للكامير وتشغيل الميديا


فيها ستيبترونك مع انها مش بتجرى :)


ده مثال للخامات السيئه, زرار المرايات ماركه مشى حالك, زرار تلاجه تقريبا ومظبطينه على مقاسها

الوانها حلوه يمكن مش باينه فى الصوره اووى بس على الطبيعه اجمل




5- رينو كابتشر, عربيه اسبانى من بره ومن جوه جميله خصوصا ان العربيه فى الفئه الاعلى بتيجى لونين مع بعض زى الصور كده (ابيض فى ازرق, او ابيض فى برتقالى), جاى معاها كل حاجه تقريبا, من مثبت سرعه وجى بى اس وشاشه واخر دلع وشنطتها كبيره جدااا عشان حاطين الاستبن بشكل ظريف مدى وسع اكبر للشنطه وخامتها نضيفه مش زى الكريتا ولا الفورد
طبعا هى 1200 سى سى مع تربو واحد بتدى نفس الباور بتاع العربيات 1600 تقريبا , سواقتها جميله, وعاليه عن الارض, وادائها زى 1600 تقريبا وسريعه, ناشفه شويه بس ممتعه فى سواقتها
عيوبها :)
سعرها مبالغ فيه خصوصا انها عربيه جديده وكمان اوروبى يعنى اعاده بيع معدومه فى الخليج, وفى مصر هتبقى فى الارض (سعرها 67 الف ريال يعنى حوالى 140 الف جنيه مصرى)
المفروض ينزل سعرها 10 الف ريال عشان تلاقى سوق




فيها جى بى اس بس كانت عايزه الكارت اللى عليه الخرايط


قارن زرار المرايات هنا مع الكريتا هتفهم الفرق بين عربيه معموله بنضافه وعربيه معموله عشان تمشى حالك



6- الكيا الكارنز طبعا غنيه عن التعريف, تقريبا العربيه العائليه رقم واحد فى مصر حاليا, بينزل منها فئتين 1600 بموتور GDI عشان يدها عزم لان حجمها فعلا ضخم جداااااا وبتيجى زى اول فئتين بينزلوا مصر, اما لو بتدور على الفئات العاليه فموجوده لكن 2000 سى سى
العربيه طبعا واسعه جدااا و7 راكب, من جوه حلوه اوووى, من بره عربيه عائليه تقليديه جداااااااا
عيوبها
واطيه جدااا على الارض, من غير اى احمال, يعنى مع شويه احمال هتزحف
متنتظرش منها جرى اوووى عشان حجمها ضخم جدااا
شكلها الخارجى سىء بالنسبه ليا ماعدا الشبكه الاماميه :) ازواق طبعا
غاليه جداااا يعنى سعرها بالمصرى من غير جمارك ولا يحزنون حوالى 170 الف للفئه الاعلى من 1600, يعنى لو اتحط عليها جمارك وضرايب سعرها هيوصل لسعر اعلى فئه من الكارنز بتنزل مصر

7- نيسان جوك, عربيه شبابى جدااا وهى محيره ناس كتير هل يشتروها ولا لا عشان الحجم ده
انا هختصرلكوا القصه الكنبه اللى ورا هتبقى ضيقه جدااا لدرجه تخنق فى الحالات دى
- لو انت طولك 180 سم فما فوق
- لو انت تحت 180سم بس مليان اوووى
- لو انت تحت 180 سم ومش مليان بس بتحب تسوق وانت مريح فى الكرسى (السواقه الخليجى) تبقى نايم فى الكرسى
الحالات دى هتلاقى الكنبه ضيقه جداااا فعلا, غير كده هى فعلا الكنبه ضيقه بردوا :) بس ينفع تتعايش بيها زى ما فى ناس عايشه مع i10 و سبارك و بيكانتو ومعندهش مشاكل بل ساعات بنحسدهم عشان الزحمه والركنات
بالنسبه لخامات العربيه فبالمختصر العربيه يابانى كامله, مصروف عليها من جوه ومن بره
بالنسبه للشنطه فلاول وهله هى ضيقه جدااا, لكن لو شيلت الصندوق البلاستيك بتاع العده هتلاقى الشنطه وسعت بمقدار حوالى 30% زياده وبشكل حلو
العربيه بينزل منها فى الخليج 4 فئات, 1 عاديه تشبه اللى فى مصر تقريبا, وفئه اعلى فيها فتحه سقف وشويه دلع, وبعدين عندك فئتين بتربو
انا سوقت فى التست درايف التربو, طلقه على الطريق ماشاء الله خصوصا لو حطتها على sport mode ومع الفتيس السى فى تى النسخه التربو فوق الخيال حوالى 190 حصان تقريبا زى الكيا اوبتما السيدان اللى هى 2400 سى سى
النسخه اللى من غير تربو بتجرى بردوا ويمكن هى اسرع عربيه فى اللى عديت عليهم كلهم, لكن تجميعها فى السرعه بيكون حلو اووووى لما تكون انت على سرعه 60 فما فوق لكن اقل من سرعه 60 سايسها وهى هتسمع كلامك بس بالعقل
الكراسى صغيره لكن قعدتها حلوه وبتحتويك :) وكمان عاليه على الارض وتحس انك كاشف الطريق قدامك
بتشوف الكبوت بتاعك كله وانت سايق, وبصراحه المنظر ممتع وانت شايف الطريق والكبوت والفوانيس بتاعتها كده
العيوب
- ضيقه طبعا لكن تنفع عيله عدد افرادها صغير او سن الاطفال صغير (زى حالتى كده :) ) والعزاب طبعا حلوه اوووى ليهم
- انشف من النيسان التيدا لكن كرسيها احلى من التيدا كتير فمقلل احساسى بنشوفيه العربيه
- سعرها عالى شويه عشان كده ملهاش سوق اووى هنا ومحدش بيسوقها هنا لان العين على العربيات الكبيره زى الباترول وغيره (170 الف جنيه مصرى للفئه التانيه من غير تربو مع فتحه سقف)
- فى خزعبلات فى الالوان الداخليه والخارجيه, او يمكن انا مش فنان عميق ومش فاهم الفن البيزنطى بتاعهم, يعنى بعض النسخ من بره لونها ازرق ومن جوه احمر زى ما فى الصور
- مفيهاش استيبترونك مع انها اسرع واحده فيهم, والبط البلدى بتاعنا الكارنز والكريتا فيهم استيب ترونك شوفت يا مؤمن اليابانيين بيوفروا فى ايه :)

دى عربيه لونها ازرق من بره خلى بالك من السحر اللى جاى بعد صورتين


من جوه بقى لونها احمر, فى تجميعه الوان سيئه جدااا ومش فاهمها

حتى الكراسى فرشها فيه الاحمر






دى تقريبا اهم الفروقات فى العربيات اللى انا شوفتها من الفئات دى
وطبعا العربيات اللى متصورتش, ده لسبب الاستعجال ونسيت اصورها :)

باشا من رأيي الكريتا افضلهم انا حاجز كريتا و هستلمها يوم السبت إن شاء الله اولا العربية واسعة و كمالياتها جميلة بالنسبة لسعرها و من ناس جربوها قالو العربية روعة ع الطريق و جابو بيها 200 و قالولي ثابتها و عزلها روعة و خامتها مش سيئة للدرجة اللي انت واصفها كدة و علفكرة و انا في المعرض صاحب المعرض قالي الكريتا احسن من الكارينز لان الكارينز صاجها ضعيف و واطية جدا و بتحك في المطبات حتى لو انت لوحدك و ناس حابوها قالولي نفس الكلام ده و علفكرة الكريتا واخدة 4 من 5 في اختبارات التصادم و السلامة و الامان و صاحب المعرض برضو قالي ان ناس كتير حاجزينها و هتنتشر انتشار كبير
************************************************** **************************************
السيارة اساءه الى هيونداي .. هي هندي تقفيلها وحش جداااااااااا.. انا ركبتها تخاف من عدم اتزانها .. وف الاخر هي اذوااااااق .. الله يبارك لك