الموضوع: تكييف بولو 96

الكلام دا بلح وهذي جدا
وغير منطقي نهائيا
المونيا ونحاس وعمال يغيرلك الفريون
الراجل دا خد من حضرتك كام؟

400
جنيه

بص حضرتك بلف الكونترول بيتراوح سعره من ٧٥ الى ١٥٠ طبعا جديد بيفرق من الصناعة وموديل كباس العربية ( طبعا دا بيفرق عن حساس او ساعة الضغط وبيفرق عن بلف الاوفر لود أوالساكس بلف اللي بيبقى موجود في موديلات وموديلات تانية غير موجود )
نفس القصة مش كل كباس ينفع يتغيره بلف كونترول دا ليه علاقة بحالة الكباس وموديله ونوعه وعلى حسب لو الكباس دا من النوع اللي شائع فيه العطل دا زي اي عربية من انتاج gm motors
الكلام داشائع ينطبق على الشفرولية والدايو والاوبل ومش كل موديلات الاوبل على حسب صناعة وموديل ونوع وحالة الكباس دا على سبيل المثال
المهم هانقول خد ١٠٠ مصنعية ١٠٠ بلف (مش واثق من نوع البلف ولا حالته ولا جديد او مستعمل ) ١٠٠ شحنة فريون r134a
١٠٠شحنة فريون r 12
توتال ٤٠٠ الحسبة ماشيه
بس هو يبقى ضرك لو ماغيرش زيت وعجل من اجل الكباس وقصر عمره بالشكل دا
عموما حضرتك قدر الله وماشاء فعل استخدم التكييف صيف وشغله في الشتا على الاقل مرتين في الاسبوع لمدة ١٠ دقايق واذا حصل وفصل منك بسبب قلة الفريون هاتعمل الاتي
هاتزود فريون من نفس نوع الفريون اللي كان موجود فيه عشان تختبر الكباس شغال وبيسقع ولا لا ماجابش نتيجه حلوة معاك هاتعمل الاتي
وليك حرية الاختيار بس لو هاتعمل الخطوتين امشي بنفس الترتيب:
١-فك الكباس وشوف الزيت من هنا تقدر تحكم على حالته اذا كان الزيت لونه صافي وفيه لزوجة توكل على الله وغير الزيت بزيت مناسب لنوع الفريون المكتوب على الكباس كل كباس بيبقى مكتوب نوع الفريون وكمية الزيت بالملي
فريون ١٣٤ بيتحط ليه زيت تخليقي
فريون ١٢ بيتحط زيت معدني
هاتفضي الكمية القديمه اللي كانت موجوده في الكباس وتقارنها بالمكتوب عليه لو مش ناقص كتير حط نفس الكمية القديمه وهاتنظف السربنتينه الخارجيه بشكل قوي من جوا المواسير بنتروجين فريون ١١او بديله وكبس هوا كتير وماحدش او نادرا بتلاقي حد بيعمل كدا و دا لو حالتها حلوه ومافيش فيها سدد او تغيرها بواحده جديده ودا الافضل وماينفعش مستعمله
٢_لو الزيت ناقص كتير وحالته حلوه هاتغيره بزيت مناسب للفريون اللي مكتوب عليه وتحط الكمية المكتوبة عليه من غير زيادة وهاتتغير معاه سربنتينه جديده عشان كدا يبقى فيه سدد عندك في السربنتينه بسبب الزيت الناقص بيروح فيها ويسدها
واي اختيار من دول هاتغير معاه فلتر الفريون او الرسيفر دراير
لوحصل اللي في دماغي وهو الزيت مليان رايش ووسخ ولونه فيه زي طحينه رمادي غامق
يبقى كدا الكباس محتاج تغيير ممكن مستعمل او جديد ومعاه لازم تغيير فلتر الفريون و السربنتينه الخارجيه (الكوندسر) دول لازم جديد فقط وتنظف المواسير وباقي الدوره يعني الكويل الداخلي والاكسبنشن
موضوع تغيير الفريون من غير تغيير الزيت من والى ١٢:١٣٤ مضر بمكونات النظام الداخلية لان الزيت التخليقي بيمتص الرطوبه ويتفاعل بشكل قوي مع فريون ١٢
كباس البولو ٩٦ الفابريكا بياخد فريون ١٣٤ هتلاقيه مكتوب علية كمية الزيت
في نوعين منه
واحد الصغير بياخد ١٠٠مل زيت وبياخد ٧٠٠:٧٥٠٠ جرام فريون
والاكبر بياخد من ١٢٠:١٥٠ مل زيت وفريون حوالي من ٨٠٠:٨٥٠ جرام
بالنسبه لقصة الالمونيا والنحاس موضوع دا تعبان
كل شغل العربيات ومعظمه وبينزل فابريكا من المصنع الومنيا يبقى هو هايجيب لها نحاس منين هوا دا صنايعي تلاجات قديمه ولا ايه ٠٠(لول)
حتى التلاجات كلها او معظمها المونيا
سبب المشكلة اللي حضرتك بتعاني منها حاجه او حاجتين او التلاتة مجتمعين
١-سدد في السربنتينه الخارجيه هاتغيرها بجديده ومعاه فلتر الفريون ويكون جديد
٢-الكباس بيفصل او بيودع هاتغيره بمستعمل على التجربة او جديد حسب حالتك المادية والجديد احسن
٣-اكسبانشن معلق او مسدود هاتنضفه لو نوعه مابيتنضفش هاتغيره بجديد
آسف للاطاله

ايه الاخبار يافندم ؟ في اي تطورات ؟ اي ملاحظات ؟ اي اسأله ؟

أولا شكرا لشرح خضرتك الفوق ممتاز وشكرا بسرعه ردك
انا روحت لو حد انهارده وقالى
الزيت مليان رايش ووسخ ولونه فيه زي طحينه رمادي غامق
يبقى كدا الكباس محتاج تغيير ممكن مستعمل او جديد ومعاه لازم تغيير فلتر الفريون و السربنتينه الخارجيه (الكوندسر) دول لازم جديد فقط ا
والتكلفة من 2000 ل2500

انت سألت على قطع الغيار فين ولا الموضوع يبدأوينتهي عند الصنايعي او فني التكييف؟؟
طيب اسأل على قطع الغيار منفرده في التوفيقه او اي مكان بيبعوا فبه قطع غيار
الكباس اعرف لي نوعه ساندن اي موديل بالرقم طبعا من الاستيكر اللي عليه واسأل عليه استيراد وجديد
عايز صورة للكباس واماكن تثبيته في القاعده مع قياس المسافات بينهم وقياس قطر وعرض الطنبوره بتاعت السير

التكلفه دى قالها الصنايعى قالى من 2000 الى 2500
واتصلت وسالت على الحرافين بورسعيد قالى التكييف كامل بيبداء من 1500 الى 3500 بقوله ايه الفرق قالى تعالى واتفرج واقولك انا احترت ومش عارف اعمل ايه

الكباس المستعمل سألت عليه بكام؟