مشاكل فى الشاهين

**emadkamel** · 30-12-2008 10:05 AM

عندى شاهين 1400 موديل 2004 كاربراتير وفى الفترة الأخيرة عندى شوية مشاكل أرجو من أهل الخبرة الرد فيها:

1- وانا ماشى باسمع خبطة منتظمة تحت العربية بتسرع مع سرعة العربية (يعنى ليها علاقة بالعجل أو بالكورونا) طبعا انا باسمعها على السلانسية اكتر وصوتها بيضيع لما صوت الماتور يعلى ومرة واحد يقوللى دى مشكلة فتيس ومرة واحد يقوللى كاوتش الشكمان وانا مش عارف.

2- برضة على السلانسية وانا رجلى على الدبرياج بسيط كل ما ادى بنزين أحس الكورونا (أو يمكن عامود أبو كردان ) بتخبط ... حاجة كده زى مايكون فى مسافة بين العمود والحاجة اللى بيمسك فيها ويلفها .... فيلف شوية على الفاضى الاول وبعدين يشبك فى حاجة ... فبيكون فى صوت خبطة او صدام كده ... انا اسف لو مش عارف اشرحها كويس:

3- حاجة تالتة مجننانى شوية، الكورونا شكلها عليها زيت والميكانيكى اكدلى، ومرة فكيت العجلة اللى ورا لقيت زيت وبتاع العجل قاللى ده الاولسية بيسرب، رحت كشفت على زيت الكورونا (زودتة من سنه تقريبا) الراجل قاللى انه على آخره واول ما فتح الطبة نزل زيت !!!! حد فاهم ليه وازاى

فى انتظار ردودكم وشكرا مقدماً

**mrghost** · 30-12-2008 12:38 PM

بص ياباشا الخبطه دى كده شكلها الصليبه اللى فى عمود الكردان ودى بسيطه ومفيهاش مشكله ومش هتكلفك حوالى 50 جنيه (وهى صوتها فعلا بيزيد مع سرعة العربيه ) وكمان تعمل صوت لما تيجى تطلع سلانسيه فأكيد دى الصليبه
بالنسبه للكرونه انا كمان عندى مرشحه زيت بس بزوده كل فترهخ وخلاص لانى مش عاوز ادخل فى متاهات بصراحه ف انت تابع كل فتره الزيت وخلاص او خى الميكانيكى يشوفها ممكن تكون عاوزه جوان

**emadkamel** · 31-12-2008 10:44 AM

متشكر يا مستر جوست على المداخلة ... وفى انتظار باقى اراء الشباب

**ahmedzizo131** · 31-12-2008 12:21 PM

صوت الصليبة يبان فقط فى المشي و خصوصا لو فى شارع ضيق الصوت يوضح اوي و الصليبة الياباني بـ30 جنية .
ممكن يكون الصوت دة من الفلنشة الكاوتش لو كانت مقطوعة و هى مرتبطة بعمود الكردان و الصوت تسمعة مع المشي و ليس و انت واقف مكانك هى و الصليبة بتاعت الكردان و النجمة كمان .
كل ها على حد على و تجربيتى .

**mrghost** · 31-12-2008 03:58 PM

المشاركة الأصلية كتبت بواسطة ahmedzizo

صوت الصليبة يبان فقط فى المشي و خصوصا لو فى شارع ضيق الصوت يوضح اوي و الصليبة الياباني بـ30 جنية .
ممكن يكون الصوت دة من الفلنشة الكاوتش لو كانت مقطوعة و هى مرتبطة بعمود الكردان و الصوت تسمعة مع المشي و ليس و انت واقف مكانك هى و الصليبة بتاعت الكردان و النجمة كمان .
كل ها على حد على و تجربيتى .

ماهو ياباشا بيقول ان الصوت بيسمعه لو طلع بالعربيه سلانسيه يعنى اول ما عمود الكردان يتحرك فبالتالى ده صوت الصليبه

**deebo** · 31-12-2008 12:55 PM

ممكن يكون الصوت ده ناتج عن الببه وده نتيجة احتكاك مابين الصليبة مع الببه (الببه) هى الاسطوانة الخرجيه التى تحمى الصليبة وده ناتج عن خبطة حضرتك اخدتها فى العجلة الخلفية

**فادى** · 31-12-2008 09:39 PM

صوت الخبط الأول (يعنى حاجة بتخبط فى العربية من تحت) بلا شك الشكمان, حاول تبص على عليقات الشكمان اللى فى النص, ممكن تكون واحدة منهم مكسورة, و الشكمان بيخبط مع اهتزاز المحرك.
الصوت التانى غالبا صليبة الكردان, أو ممكن جدا يكون مرتبط بالمشكلة التالتة نتيجة نقص الزيت, اكشف على زيت الكرونة أولا, ثم حط احتمال صليبة الكردان بشكل جدى بعدها.
تسريب الزيت ممكن جدا يكون بسيط و مش مؤثر.

**emadkamel** · 01-01-2009 04:58 PM

المشاركة الأصلية كتبت بواسطة فادى

الصوت التانى غالبا صليبة الكردان, أو ممكن جدا يكون مرتبط بالمشكلة التالتة نتيجة نقص الزيت, اكشف على زيت الكرونة أولا, ثم حط احتمال صليبة الكردان بشكل جدى بعدها.
تسريب الزيت ممكن جدا يكون بسيط و مش مؤثر.

ماهى المشكلة يا فادى ان الزيت مش ناقص ؟... انا رحت كشفت والراجل قاللى الزيت على الآخر
هاشوف صليبة الكردان