الموضوع: المياة الخضراء

كنت عايز اعرف اسم نوع المياة الخضراء وبكام عشان السيارة لانى سمعت ان المياة الخضراء افضل عشان الصداء وشكرا جزيلا

المشاركة الأصلية كتبت بواسطة meromar

معلش يا جماعة العبوة اللى زى بتاعة البيبسى دى بتتباع فين وياريت شرح تفصيلى لغسيل الردياتير وازاى بضيفو الماية الخضرة على الماية المقطرة ؟

هى اسمها ريدياتير كولانت بتتباع عند بتوع الاكسسوارات وبتوع الزيت والمارت بتاع البنزينه وممكن تغير الميه بنفسك لو ما فيش صدا او انسداد فى الريدياتير وده بيبان من شكل ولون الميه لما تنزلها
ازاى تنزلها ؟ توقف العربيه فى حته مستويه يعنى مش مطلع ولا منزل وياريت تكون متسفلته وبعدين تسيب العربيه لما تبرد تماما عشان لما تضيف الميه الجديده ما تعملش مشاكل لوش السلندر
هتلاقى حاجه زى الحنفيه او الطبه فى الريدياتير من تحت افتحها او فك خرطوم الريدياتر اللى تحت مش اللى فوق واستنى لما الميه تنزل كلها وبعدين زود ميه غشان تاخد اى صدا او املاح وتنزل بيها ويا سلام لو استعملت خرطوم مياه عشان تستفيد بضغط المياه فى التنظيف
بعد مرحله الغسيل ما تخلص وتلاقى الميه اللى نازله من الريدياتير نظيفه تماما اقفل الحنفيه بتاعه الريدياتير او ركب الخرطوم تانى وابدأ املا الريدياتير بالميه المقطره ودى برضه عند بتوع الاكسسوار والزيت والكهربائيه وبتبقى ب 1.5 جنيه الزجاجه بلاستيك بها 750 ملل يعنى هاتعوز قد 6 زجاجات بالقربه
وممكن بدل الميه المقطره استعمل الميه اللى خارجه من التكييف بتبقى برضه خاليه من الاملاح وببلاش:10D5C8~1107:
وتفتح الكان بعد ما ترجها كويس وتفضيها فى الريدياتير مع الميه المقطره لغايه الريدياتير ما يمتلى وطبعا بتفك القربه وتغسلها غسله كويسه وتملاها برضه لحد العلامه
والاسهل انك تشترى الجركن اللى بيتباع عند بتوع الاكسسوار ب 20 جنيه سعودى وتفضيه فى الريدياتير

لومش عاوز تعمل ده بنفسك ممكن تروح لاى حد بتاع ريدياتير يعملهولك واديله من 10:15 جنيه
او فى البنزينه وبيبقى برضه فى الحدود دى بس بيركب خرطومين الريدياتير الخارج والداخل على جهاز عمل زى سبيل الميه اللى بيبقى فى الشارع وبيغسل الدوره بتاعه الميه
ولو مش هاتعرف تعمل اى حاجه من دى ابعتلى على الخاص وانا اعملهالك يلله بس ابقى راضى الرجاله