الموضوع: تقرير عن ابيزا 2009

السلاموا عليكوا

انا قررت اكتب تقرير عن اداء العربية دلوقت عشان الناس اللي مش عارفها و ان شاء الله هاعمل تقرير تاني بعد 5000

اولا العربية دلوقت عاملة 1535 كيلو

نبدأ بالموتور : بسم الله ما شاء الله فعلا حاجة حلوة جدا جدا جدا اولا صوته ناعم بس في الشد بتحس انه صوت طياره ماشاء الله التسارع بتاع العربية عالي جدا ماشاء الله يعني بعد ال 120 بدوس بنزين بتشد اكني لسه علي 70 وبدوس و الموضوع ده انا حاسس بيه جدا لأن كان معايا نوبيرا كان التسارع بيقل علي السرعات العالية لكن الابيزا ما شاء الله عليها

ثانيا استهلاك البنزين : انا عايز اقولكوا ان العربية الفول تانك بتاعها ال 92 بتتفول ب 82 جنيه تقريبا و الأستهلاك بقي مش هاتكلم عنوا هاقولكوا حاجة و انتوا تعرفوا اد ايه مبتاكلش بنزين انا فولت من بنزينة موبيل اللي علي الكورنيش اللي بعد التلباني بتاع دايوو روحت من القاهرة للمحلة مشغل التكيف المشوار حوالي 120 كيلو روحت و لفيت في المحلة طوول اليوم و التكييف شغاااال بردو و بليل رجعت القاهرة و كنت مشغل التكيف نص الطريق و رحت ستة اكتوبر و النهاردة رجعت تاني المحلة و مشغل التكييف طول الطريق كل ده خدت اقل من نص التانك بشرطة وانا رايح المحلة اول مرة كنا في العربية 3 اشخاص و اربع اطفال و احنا راجعين كنا 3 اشخاص و ست اطفال و شنط و ماتسألونيش ازاي

ثالثا الفتيس التيبترونيك: ماشاء الله ناعم جدا مبتحسش بيه خالص و هو بينقل انا كنت بركب عربية اختي بيجو 307 كنت بحس اوي بالفتيس و هو بينقل اما اللي كان بيسال علي استجابة الفتيس في تسقيط النقلة هاحكيلك موقف بردو النهاردة وانا راجع ماشي في امان الله علي 120 قولت اجرب الفتيس فيه نقلة للسبورت درايف مش زرار لأ نقلة غير ال d المهم قولت اجرب ال s ال ار بي ام كان علي 3 انا جبته علي ال s و زودت الدوسة علي البنزين سنة صغيرة مالحقتش اشوف العربية بقت علي سرعة كام بس اللي شوفته ال ار بي ام دخل الريد زوون red zone وعدي الستة و مكمل بصراحة خفت شلت رجلي من علي البنزين بالمناسبة انا خفت لأني مش عارف لما ال ار بي ام يدخل الحتة الحمرة ده عادي ولا غلط ولا ايه المهم اني حسيت انها طاااارت

رايعا العفشة : ماشاء الله مريحة جدا و ثابتة اوي اوي علي الطريق و في الملفات تحفة بجد بدخل الملفات 100 و 120 و عادي جدا و العربية فعلا stable علي الطريق و مريحة

خامسا الكماليات : طبعا ازاز كهربا و الاتنين اللي ادام بيطلعوا من تكة واحدة الازاز لو بيطلع و حد حاطط ايده مابيقفلش عليه بينزل لوحده تاني اوتوماتيك الفتيس تيبترونيك الدريكسيون مالتي فانكشن الأضاء بتاع التابلوه بليل تحفة شيك اوي بتتحكم في درجة اضاءة التابلوه و كذلك مستوي النور اللي في الفوانيس الكاست سي دي ام بي ثري و في وصلة aux لو حد عايز يوصل ام بي ثري طبعا او حاجة الخامات الداخلية جيدة جدا و شيك اوي بس من الحاجات اللي مزعلاني ان كان المفروض تنزل بباركينج سينسور و كار كيت و فتحة سقف انا عارف ان ده كان هيزود سعرها انا بس بقول اللي ناقصها

سادسا العيوب : الحمد لله لحد دلوقت ماقبلتش عيوب بس لو ظهر حاجة هاقولكوا علي طول

ارجو اني اكون قولت كل حاجة و اي حد عنده استفسار انا موجود و اسف لو طولت عليكوا و شكرا وياريت نسمع كلمة مبرووك

المشاركة الأصلية كتبت بواسطة DR_NO

الف ميروك على العربيه وعلى التقرير الجميل ربنا يباركلك فيها يا رب
يا ريت لو حضرتك تصورلنا العربيه من جوة ومن بره ولك جزيل الشكر :)

الله يبارك فيك زز حاضر ان شاء الله احاول احط صور بس انا مجربتش ارفع صور قبل كده بس ان شاء الله احاول