الموضوع: الشباب اللى عايز شغل مرتب كبير بس مجهود جبار

المشاركة الأصلية كتبت بواسطة أحمد كمال

مش متعصب و الله

بس ما علينا

احنا شعب ما يعجبناش العجب

خلوا الشباب قاعدة عالقهوة أحسن ..... بلا شغل بلا 2000 جنيه بلا بتاع

واضح يا باش مهندس ان فى حاجة غلط يإما احنا عايشين فى بلد تانية ومش حاسين يا اما فى ناس عايشة فى كوكب تانى وبتتكلم عليه أعتقد ان السواد الأعظم مننا بيكون عنده استعداد انه يشتغل أى حاجة وبأى عدد ساعات وخصوصا اذا كان لسه خريج جديد وبالمرتب ده انا عارف إن كلامى مش هيعجب ناس كتير معانا بس صدقونى وعن تجربة لما تتفحت فى شغلك وفى اخر الشهر تلاقى فلوس أحسن ما تتفحت وما تلاقيش حاجة خالص،،،،وده على فكرة بيحصل فى أماكن كتير قوى .

يا اخوانى انا خريج دفعة 2002 كلية التجارة جامعة القاهرة كنت أيام الدراسة بتدرب فى بنك القاهرة التدريب مدته شهر والمرتب 70 جند وعايز اقولكم ان الفرع اللى كنت بتدرب فيه كان تقريبا بيكون فيه حوالى 25 طالب تدريب وطبعا محدش كان بيتعلم حاجة وكلهم وسايط ومعارف وما كنتش بتطلع منه بأى خبرة لأن الموظفين ما عندهمش وقت يضيعوه مع تلاتة معاه المفروض يعلمهم ويخلص شغله فى نفس الوقت ،،،،،، وبعد ما ربنا كرمنى واتخرجت استنيت اشوف موضوع التجنيد وخلال الفترة دى كنت بشتغل فى مشاريع التشجير والنظافة اللى تبع الحزب كنت باخد عن اليوم 10 جنيه والشغل من 8صباحا لحد الساعة 2ظهرا لمدة 6 أيام بس لكل شخص وكان فى شباب كتير وكلهم جامعيين بنشيل مخلفات من قطع اراضى وبنضف شوارع وبنلم قمامة وما كانش فى اى مشكلة عندى فى كده المهم ما احملش البيت همى خالص فى اى حاجة ،،،، ومن حظى الحلو انى دخلت الجيش وقضيت فيه سنة خلصت فى شهر ديسمبر 2003 وبعد ما خلصت بشهر تقريبا اشتغلت فى شركة محاسب عارفين مرتبى كان كام وقتها 300 جنيه باكل واشرب والبس واركب مواصلات منهم والمفروض انى احوش منهم عشان اكون نفسى وكنت بشتغل كل يوم 12 ساعة ده غير ان فى الغالب مفيش حاجة اسمها يوم جمعة أجازة ده غير المأموريات اللى فى اماكن لافيها اكل ولا شرب ولا حاجة خالص واستحملت القرف لأن ما كانش فى حل تانى هو ده حال البلد وضع واتفرض علينا عاجبك اوك مش عاجبك مع الف سلامة احنا مش عايشين فى السويد ولا الدنمارك ولا فنلندا احنا فى مصر وفضلت عندهم سنة اعتبرتها سنة مكملة لسنة الجيش لدرجة انى كنت مسميها الشركة المصرية لحفر قناة السويس واننا كنا شغالين فى السخرة وما سبتهاش غير لما حصلتلى مضاعفات صحية نتيجة انى شربت مياه ملوثة وحسبولى الفترة اللى كنت تعبان فيها غياب ولقيتهم خاصملى 21 يوم ،،،،،،،

بعدها ربنا كرمنى بمكان تانى كان سبب شغلى فيه حاجة اتعلمتها فى شغل الأولانى والحمد لله انا بقالى هناك تقريبا 4 سنين ونص ومرتبى حاليا وصل ل2800 ج غير إن بيكون فى حاجات تانية ،،،،

اخيرا عايز اقول وخصوصا للشباب اللى لسه متخرجين او هيتخرجوا لو ربنا كرمك بأى شغل حتى لو كان متعب ومرتبه قليل اشتغل الشغل بيجيب شغل ومحدش بيتولد كبير مرة واحدة ولو فضلت قاعد مستنى انك تشتغل وتاخد مرتبك بالدولار ويكون عندك طقم سكرتارية وتليفون شخصى يبقى هتفضل قاعد مستنى كتير وفى حاجة تانية عايز اقولها فى أخ كريم كان بيقول انه بيشتغل فى السعودية وبياخد مرتب 3000 ريال وانه يا دوب بيحوش منهم بالعافية 1000 ريال وبيشتغل كل يوم حوالى 12 ساعة انا عايز اأكد كلامه انا فى فترة من الفترات سافرت المملكة للعمل لفترة مؤقتة أثناء موسم الحج بأحد المكاتب بالمدينة المنورة كنت بشتغل كل يوم حوالى 14 ساعة ومفيش حاجة اسمها اجازات وكانوا بيدولنا بدل عمل عن كل يوم 70 ريال وبدل وجبات 10 ريال فى اليوم وبالرغم من انى كنت جنب الحرم إلا انى ما كنتش بشوفه الا فى صلاة الفجر وصلاة الجمعة بس ،،،،،

أسف على الإطالة أخوكم أحمد النقراشى

المشاركة الأصلية كتبت بواسطة أحمد كمال

الحمد لله ان فيه حد فهمني اخيرا !!!


حديث التخرج ما ينفعش يتبع مثل طلبوها اتعززت


انا كنت لو لقيت شغل ب 500 جنيه و لا كنت هامانع


و الشغل بيجيب شغل احسن و السعي بيجيب الرزق

انما اقعد نايم على "ضهري" طول اليوم و اخد مصروف من ابويا و انا زي الشحط و متخرج؟


انا اشتغلت في الصيف سنة 2000 و انا لسه طالب و كنت باقبض 300 جنيه و ما كنتش باخد من ابويا مصروف عشان باشتغل


فعلا يا نقراشي الناس هنا في كوكب تاني ..... في عالم موازي زي مسلسل sliders فيه مصر زي السويد في عالمنا كده هههههههههههههه


و كمان نقطة مهمة ...... اتطحن و خد فلوس احسن ما تتطحن و تاخد ملاليم ...... و ده اللي التوحيد و النور عامله ...... بيطحن و يدي فلوس كويسة بالمقارنة بطبيعة العمل و التدريب او التعليم المطلوب و الخبرة المطلوبة و دي اهم العوامل اللي بتفرق مرتب وظيفة عن وظيفة (الدكتور عن التمرجي ..... الخ)

يا باشا فى كتير والله مقتنعين جدااا بكلامك هو ده وضع البلد وكل يوم الحالة بتزداد سوء ولو فضلت قاعد مكانك هتتفرم ومحدش هيحس بيك وتلاقى العمر عدى بيك وفى الاخر عملت إيه ؟؟؟؟ ولا حاجة لازم تتعب وان ما كنتش هتتعب وانت صغير وفى عز صحتك وعافيتك هتتعب امتى وانت خارج على المعاش عايز فلوس عشان تكون نفسك وتكبر ويبقى عندك شقة وعربية وموبايل بخط مفتوح وعروسة أخر حاجة كل ده وهو نايم بيحلم ابقى قابلنى اتعب واشقى واعمل اللى عليك وصدقنى ربنا هيديلك وهيديلك كتير المهم انك تسعى وتعمل اللى عليك .

يااه انا فعلا كنت ابتديت اشك ان انا عايش فى الصومال وان فى مصر تانية انا تهت عنها
مصر التانية دى الخريج بيخرج يلاقى مرتب 3 الاف جنيه بدون اى خبرة وعدد ساعات محددة من 9 ل5 وفى بريك فى النص بيطلع يلاقى الكافيتريا محضراله الفطار وبينزله الاوفيس بوى بمج النسكافيه كل شوية وهو شغال على الابتوب المتوصل بالانترنت الويرلس، وممكن لو صحى من النوم ملوش مزاج يروح الشغل يقعد يشتغل من البيت
(بتحصل فى اماكن فى مصر بس بتتعد على صوابع الايد الواحدة)