الموضوع: الشباب اللى عايز شغل مرتب كبير بس مجهود جبار

المشاركة الأصلية كتبت بواسطة أحمد كمال

انا متخرج سنة 2003 و على ما لقيت شغل اتذليت و كانت من اسود ايام عمري و كل ما اسمع ان فلان اشتغل هنا و علان اشتغل هناك باتقهر على حالي لحد ما لقيت شغل و الله و الله لو كان ب 500 جنيه و 20 ساعة في اليوم كنت هاقبل و اول مرتب كان تعبان جدا (1250 جنيه و خريج حاسبات و شغل مش اقل من 12 ساعة و مفيش اوفر تايم و لا يحزنون)


بلاش نظام طلبوها اتعززت ده ...... الشغل بيجيب شغل و الرزق يحب الخفية و البطر عالنعمة وحش ..... اما خريج مالوش اي مؤهلات او خبرات و ياخد 2000 جنيه مقابل 14 ساعة شغل ياما فيه ناس بمؤهلات و دكاترة و مهندسين بيتفحتوا اكتر من 10 ساعات يوميا و مابياخدوش نص المبلغ ده و محدش يقول لي استغلال هي ظروف بلدنا كده و انظر حولك ...... ربنا يرزق الكل انا مش مستكتر مليم على حد اياكش يا رب كل الناس تبقى مليونيرات و نبقى زي سويسرا و لا السويد ......

بس لازم الواقعية ...... كل ما اشوف خريج جديد اليومين دول عامل زي عزيز بيك الأليط باتفقع ......... يبقى قاعد في بيت ابوه مصروفه و سجايره و بنزينه على حساب ابوه و يقول لك انا مش نازل من بيتنا على أقل من كذا و كذا ده بيبقى مرتب اللي عنده 3 او 4 سنين خبرة في المجال ده و هو اصلا لسه خبرته العملية صفر و قدامه كتير على ما يصقل خبرته الدراسية و يحولها لخبرة عملية ذات قيمة لصاحب العمل .......... و الاقيه ييجي له شغل يقول لك لأ مش هانزل على اقل من كذا و كذا لييييييييييييييييييييييه ايه الهبل ده و يا ريت توقعات عقلانية دي توقعات هبلة و عبيطة مع احترامي للكل

يعني واحد فريش لسه ما طلعش من البيضة - مع احترامي للناس الفريش المحترمين - جاي عندنا الشركة بيعمل انترفيو سالوه انت عايز تنضم لينا ليه يقول لهم أصل انا genius و انا اللي هافيد الشركة طيب genius بامارة ايه ........ اصل بابايا genius و مصنف مش عارف رقم كام عالعالم في منظمة ايه لخارقي الذكاء فاكيد انا زيه و ورثت منه

مش عارف اقول ايه ال interviewer بتاعه كان مش عارف يضحك و لا يعيط و لا يلطم ........ البيه لسه عليه قشر بيض و بيقول لك انا اللي هافيدكم ........



فيه دكاترة مش لاقية شغل ب 800 ملطوش و بيترموا في حضن الجبل و في الصحرا و في اي حتة مهببة في مكان مابتشوفوش الشمس اسمه الوحدة الصحية و بيشوف ايام سودة و انتوا مستقلين 2000 جنيه على بائع بدون خبرات او مهارات هيشتغل 14 ساعة؟ عايزينه ياخد كام ؟ 5000 جنيه؟ ماهو عشان ده يحصل هيبقى مفيش حل غير ان

1- الراجل صاحب الشركة يخسر و يفتحها جمعية خيرية
أو 2- ينزل قانون ممنوع تشتري حاجة غير من التوجيد و النور و تجيب منهم شهادة ان الحاجة دي مش عندهم عشان نزود ارباحهم
او 3- يرفعوا اسعار كل حاجة الطاق تلاتة بس ساعتها محدش هيشتري منهم اي حاجة و مش هيقدر يدفع مرتب و لا حتى 500 جنيه



و اصلا و ماله موضوع الموبايل ماهو في اي كول سنتر محترم من اول كنتاكي و بيتزا هت لحد شركات الاتصالات ممنوع ال agent يستعمل موبايله غير في البريك و لا اما شركة multinational تعمل كده يبقى واااااااااااااااااو و اما شركة وطنية عريقة محترمة زي التوحيد و النور تعمل كده يبقوا ظلمة و كلاب و مستعبدين؟






معلش انا اسف عالرد الطويل العصبي بس انا فعلا مرارتي اتفقعت ......... انا اما اتخرجت كنت في عرض 500 جنيه يغنوني عن مصروف ابويا (اللي على فكرة كان بالظبط 200 جنيه في الشهر و كنت بادي دروس في البيت و باصلح كمبيوترات و بانسخ سيديهات عشان اطلع اي مصلحة عشان اعرف اعيش لحد مالاقي شغل يعني برضه ماكنتش زي الطفيلي) ..........

بجد ربنا يبارك لك , كلام صحيح 100 % ..

بس سؤال سالته سابقا و اعذرنى برده لو كان مكرر :)

هل حضرتك تخصصك قريب من الحاسبات و المعلومات ولا لا ؟؟

يعني واحد فريش لسه ما طلعش من البيضة - مع احترامي للناس الفريش المحترمين - جاي عندنا الشركة بيعمل انترفيو سالوه انت عايز تنضم لينا ليه يقول لهم أصل انا genius و انا اللي هافيد الشركة طيب genius بامارة ايه ........ اصل بابايا genius و مصنف مش عارف رقم كام عالعالم في منظمة ايه لخارقي الذكاء فاكيد انا زيه و ورثت منه

ههههههههههههههههههههههههه .. بجد مسخرة الناس دي.. اكتر حاجة بكرها ان كل واحد يقعد يقول اصل بابا (زي ماحنا بنقول اصل الفراعنة كدا)

استاذ احمد..
بجد كلامك روعة فعلاً .... ربنا يهدينا و يوفقنا

it is not baba anymore....it is pappy and mommy

baba is no longer in service...lol

I hate it when I hear someone say pappy we mommy......argh!!!!!!!!!!!!!!!!!!!!!