المقارنة الكبرى ( نيو سيراتو / افيو / أبترا / ميجان / الانترا / جن 2 / بيرسونا/صني )

**wookiee** · 31-08-2009 11:12 AM

اخواني رواد المنتدى الكرام

أولا أحب اشكركم على اهتمامكم بالدخول إلى هذا القسم وهذه المقارنة على عظيمة وادعو الله ان تعوم الفائدة على الجميع إن شاء الله ,

حاليا أنا أقارن بين الاتي ( نيو سيراتو / افيو / أبترا / ميجان / الانترا / جن 2 / بيرسونا/صني )

طبعا المقارنة كده كبيرة قوي أنا ححاول أكون دقيق شوية ,

المكانية : في حدود مبلغ 90 ألف . ( ممكن ازيد ممكن أقَل )

الاحتياجات :
1 مطلوب عربية تستحمل ..عشان أنا بمشي في اليوم الواحد حوالي 150 كم
2 استهلاك البنزين يكون في حدود المعقول أنا امتلك عربية 1500 cc , بتعمل حوالي 10km / لتر
3 تكون ليها شنطة كويسة عشان تؤدي عيلة من 4 أفراد
4 مش ناوي اغير العربية إلا بعد حوالي 12-15 سنة
5 مش محتاج كامليا ت كتير قوي , يعني طبعا عوز أحس إني جبت حاجة تريحني بس في نفس الوقت زي ماأنتم عارفين في كماليات ولا الواحد بيعمل بيها حاجة زي ( مسند اليد الخلفي , جراب نضارة , تكيف تاتش , إلخ... )

6 محتاج عربية اوتوماتيك , أو افضل يعني عشان الطريق في مصر معدش مستحمل
7 محتاج تكيف جيد جدا مايقصرش على سحب
8 قاعدة مريحة قوي , صالون مريحة يعني عشان أنا طويل
9 مش عوز وجع دماغ في تقفيل سيء وأدخل في حوارات التوكيل
10 ياريت يكون فيه ضمآن

وده تحليلي لكل عربية :

الافيو :
الصالون مريح وممكن حد يقعد خلفي , الماتور مقلق منه عشان عندي لانوس وسمعت إنه هوا نفس الماتور العظيم , العربية من جوه مش شيك قوي بس يعني نص نص , خايف برده من مشاكل في الفتيس الاوتوماتيك وال تقفيل . السعر 84000 وانا شايفه طبعا مناسب قوي , بس شكل العربية مش عاطفي قوي

الاوبترا :
الصالون جيد , التابلوه عادي قوي .... , ماتور أعتقد كويس , شكلها مش عجبني برده , خايف برده من التقفيل وال مااتوور , التوكيل بيقولوا مش حلو قوي . السعر : 94500 عالي شوية عليها ....

الالانترا :
بصراحة عربية شايف إنها كويسة , ولوني خايف من الثابات يعني مستني رايكم فيها

النيو سيراتو :
عربية ما شاء الله الحق عجبني قوي , بس أنا شايف برده إن السعر كده عالي قوي , المانيوال بتبدأ من 96000
وال اوتوماتيك 103000, طبعا الSX سعر علي جدا وكماليات أنا مش محتاجها . يعني ده آخر الواحد يجيب اللي be-109000 , فيها جنوط وحركات جوه وكده , العيب فيها إن التوكيل بيسلم كمان 4-5 أشهر !!

الميجان :
سمعت عن مشاكل في الكمبيوتر وقطاع الغير غالية والعربية سحبها مش زي السراته وال تكيف برده مش جامد قوي , يا رت حد يقولي إيه أخبار العربية دي , في أفر دلوقتي 105000 !!

الصني :
تقفيل مصري , صالون ضيق قوي , بس طبعا مطور يابني وتكيف تلاجة

جن 2 / بيرسونا :
سمعت عن مشاكل في التقفيل , وال سحب بطيء على سرعة تحت el-3000 RPM , !! , مش عارف اهنزم التكيف , والقاعدة برده يعني ظريفة واللهِ , مش عارف إيه نظام الاوتوماتيك في البيرسو نا العربية عاملة 91000

الملخص , أنا محتار ..قوي قوي قوي

وعارف إن كل واحد فيكو رأيه ممهم ليَّ قوي ....يا رت بجد تساعدوني يا أهل الخبرة

مع تحياتي / أحمد

**tutankhamoun** · 31-08-2009 11:21 AM

موضوع السحب في البيرسونا أو الجين 2 تحت 3000 لفة - دقيقة تم حله بوضع نظام جديد أسمه iafm في السيارة بيثبت و يزود العزم .
الكلام بتاع السحب تحت 3000 لفة - دقيقة .... كان في العربيات الأوتوماتيك قبل 2009 .

يبقى كدا المشكلة البسيطة اللي ممكن تقابلك في العربية دي هي التقفيل اللي أنت قلقان منه .... و هو شئ نادر الحدوث مش مع كل الناس يعني ..... بس أدام أنت خايف .... يقى بلاش علشان اللي بيخاف من العفريت بيطلعله .

أنا شايف أن أحسن حاجة هنا في حدود السعر اللي محدده
النيسان الصني ............... و الألنترا ..........
بس سمعت عن الصني أستهلاكها للبنزين عالي شوية ( المعلومة دي تتأكد منها في قسم النيسان من السادة الأفاضل أصحاب السيارة )
عربية ممتازة و ثباتها ممتاز .... يعيبها الشكل فقط لا غير و التقفيل بتاعها كويس و جيد جدا كمان .
الإلنترا حلوة برضه و جميلة و سحبها عالي ....... بس الثمن ده العربية هاتكون فاضية تقريبا .... و صاجها ضعيف شوية و ثباتها معقول جدا .

طبعا الجين 2 أو البيرسونا حلوين برضه بس أنت مقلق من موضوع التقفيل .

أنا شايف أن الأفيو غالية و ثمنها ده أستعباط رسمي نظمي عزمي من التوكيل .........
العربية مفيهاش أي حاجة حلوة تخليني أدفع فيها المبلغ ده
لو بالثمن ده فيه الأكسنت أحسن منها بكتير ..... و الكيا ريو ........ و كمان اللانوس نفسها لسة موجودة و جديدة زيرو كمان و بثمن أقل .

**M.ABDEEN** · 31-08-2009 11:52 AM

اولا الافيو تخرج خالص خالص من المقارنة دي
ثانيا لو هاتزود عن المبلغ ده يبقى اولا كده النترا او سيراتو
لو مش هتزود او حاجة بسيطة وعايز اللي انت طلبه وهيحققللك كتير جدا من المطلوب يبقى بيرسونا او جين 2

**Eng.Sameh** · 31-08-2009 12:00 PM

الميجان احسن حاجة في ده كله كأمكانيات وبرستيج وصناعة وخامات

**Cutevampire** · 31-08-2009 12:01 PM

نصيحة ... حدد بس المبلغ بالظبط علشان في العربيات اللي انت كاتبها في فروق ممكن توصل ل 20000 جنيه

زي الفرق بين الافيو و الميجان مثلا و لو بتتكلم في الاوتوماتيك الفرق ممكن يكون ازيد من كدة .

**wookiee** · 31-08-2009 12:15 PM

الفكرة إن أنا محدد مبلغ 90000 , بس أنا عندي استعداد أزود المبلغ حوالي 15 كمان ل حد 105000 , في مقابل إن اخد بيه حاجة عظيمة يعني مثلا لو السيراتوا لقطة وسعرها تحفة على ماتورها وإمكاناتها في الحالة دي بس ممكن أزود ..
بس أنا مش عوز الدفاع فلوس على الفاضي

**احمدعبدالعزيز** · 31-08-2009 01:53 PM

المشاركة الأصلية كتبت بواسطة wookiee

الفكرة إن أنا محدد مبلغ 90000 , بس أنا عندي استعداد أزود المبلغ حوالي 15 كمان ل حد 105000 , في مقابل إن اخد بيه حاجة عظيمة يعني مثلا لو السيراتوا لقطة وسعرها تحفة على ماتورها وإمكاناتها في الحالة دي بس ممكن أزود ..
بس أنا مش عوز الدفاع فلوس على الفاضي

توكل على الله واشترى كيا سيراتو توكيل محترم وعربيه ممتازه

**Hosam_Optrawy** · 31-08-2009 06:57 PM

يامرحب يامرحب بالمقارنه الكبرى

أولا زى ماحضرتك قلت انت مختار عربيات كتير

وبتقول يفضل انها تكون اوتوماتيك

ومعاك مبلغ فى حدود 90 الف

يبقى فى عربيات لازم تخرجها من المقارنه

الميجان اوتوماتيك تبدأ من 120

عموما انا رأيى مادام تقدر تزود المبلغ ل 105 يبقى

1 - نيو سيراتو ( 103 )

2 - النترا ( 100 )

3 - اوبترا ( 94.500 )

4 - جين 2 ( 91 )

5 - بيرسونا ( 92 )

6 - صنى ( 96 )

7 - أفيو ( 84 )