قائدة مبتدأة ترجو الافادة

**eng_s** · 27-09-2009 04:08 PM

السلام عليكم ورحمة الله وبركاته
الاخوة الكرام
كل هام وأنتم بخير
انا اتعلمت قيادة السيارة بس للأسف لما جيت اركب عربيتي اول مرة لوحدي خبطت فيها في الرصبف
هي الحمد لله اتصلحت وانا غلطتي كانت اني مش اتعودت عليها ومشيت رجلي على البنزين والفرامل والدبرياج قبل ما اطلع
المهم الحمد لله عدت على خير
بس المشكلة اني تقريبا حصلتلي عقدة عدت خايفة اركبها لوحدي
وبعدين اي مشكلة تحصل اتخض واتلبخ
يععني النهاردة جيت ادورها وقلت هطلع بيها من ادام البيت اوديها البارك على الطريق لقيتها بتدور وبعدين لما اجي اشيل رجلي او اخفها بنزين عشان ارجع مارشدير ومش يبقى بسرعة تتهز وتقف على طول
يا ترى اللي بيحصل ده طبيعي وليه
ويعني ايه العربية تشرق وده بيحصل امتى وليه ولو حضل اعمل ايه
يا ريت تساعدوني ازاي احسن من نفسي وسرعة استجابتي على الطريق وسرعة استخدامي لحواسي كلها مع بعض
شكرا ليكم

**m.aligamal** · 27-09-2009 05:44 PM

مبدئيا الى حصل معاكى حصل مع ناس كتير لسه بتتعلم السواقه اهم حاجه تتجرئى و متخافيش و سوقى بقلب جامد مش بتهور امش بالعربيه على السلانسيه خالص الاول و التانى بالكتير عليك عودى نفسك لما تشيلى رجلك من البتزين لازم تجهزر رجلك التانيه للدبرياج لو هتدوسى فرامل عشان العربيه متبطلش منك يا اما ترجعى الفتيس على المور ولما تدوسى دبرياج تدوسى لاخر الدواسه تفصليه يعنى
ودايما لو وقفتى عربيتك يكون فتيسك على المور اوعى تبطلى العربيه و تسبيهواخد غيار لان العربيه بمجرد ما هتدور هتنط منك وممكن تلبسى فى حد قدامك و انتى لسه مش مستعده
العربيه تشرق يعنى انتى مدياها بنزين كتير و متحرقش عشان كده تيجى تدورى العربيه متدورش لو حصلت سيبى العربيه شويه هيتبخر البنزيم و تدور بعد كده عادى بالنسبه لسرعه الاستجابه تدريجى هتلاقى حواسك بقت سريعه يعنى تعوزى تغيرى حاره العربيه و تلاقى نفسك بتبصى فى المرايه الاول حاجه وراكى داخله على نفس الحراه و تدى اشاره الدحول و الكلاكس كمان وكمان لما تعوزى تقفى فى اى حته تبصى فى المرايه الى فى النص او المرايه الى على يمينك و تعملى اشاره الانتظار و تتبسطى من نفسك انك بتحافظى على نفسك و على الاخرين كمان
ا ب فى السواقه تحافظى على الى قدامك عشان برضه الى وراكى بيحافظ عليكى يعنى متخبطيش حد من ورا خالص انتى الى غلطانه و دايما سيبى مسافه بينك و بين العربيه الى قدامك عشان لو سرحتى مثلا تقدرى تلمى العربيه بالفرامل من غير متلبسى فى الى قدامك
وكمان متفرمليش فرامل مفاجئه لان الى وراكى ممكن ميلحق يلم عربيته دايما تنبهى لطريقك و استخدمى الاشارات حتى بالنهار وفى البدايه انصحك باشاره الانتظار لانها معناها ان الى سايق بيتعرض لاى موقف فيكون النتيجه الى جاى من ورا ياخد باله
قبل متخدى يو ترن او ملف تدى اشاره الدوران و تخشى الحراه بحرص و قلب جامد يعنى تخشى العربيه ببوزها واحده واحده و تبيصى فى المرايه عشان تتاكدى ان الى وراكى فهم انك خدتى القرار و تقفى فى اليو ترن متستعجليش و تخشى بالعربيه سنه بسنه و تلفى عجل العربيه كله و تستعدى لغايه متجيلك فرصه انك نلفى تلفى بالعربيه و تسيبى العجل تانى يظبط نافسه و مترقصيش العربيه من ورا يعنى العجل بيرجع لوضعه متقرصيس عليه عشان هتلاقى العربيه بترقص ورا
نصيحتى ليكى فى البدايه امسكى يمينك فى الطريق متسيبهوش و بعد شويه جرئى نفسك بانك تبقى فى نص الطريق هتحسى انك سندوتش متخافيش اعرفى ابعاد عربيتك كويس و امشى فى طريقك هتلاقى نفسك بتجرى مع العربيات و بسرعه كمان و تاخدى بالك من اربع حاجات النقل التقيل متخديش قرار تعديه الا لما تثقى فى قدراتك و ان اتحركتى مترجعيش و تقودى بسرعه عاليه

الميكروباص ممكن يعمل اى حاجه عشان ينزل او يركب زبون تبقى فايقه منه
الستات و ما اراكى من الستات ومتزعليش انا بقلك عشان تاخدى بالك من سواقتهم يعنى انا بشوف حاجات غريبه و تردد او ترمى نفسها او تدى اشاره غلط و سرحان و ممكن واحد بيضرب كلكس و بعيد عنها تتخض تلاقيها بتحدف على اى حد جمبها عشان كده خدى بالك و طبعا فى ستات اساتذه فى السواقه
الشباب الروش و دول منتشرين بابا و ماما جايبن لهم عربيات عشان يرازوا خلق الله و مش حاسين باى مسئوليه يخبط اى عربيه و يقلك يعنى هتتكلف كام او يسيبك و يجرى ربنا يحفظنا منهم
تتاكدى من الزيت و الميه و البنزين و البطاريه يوميا او كل يوم و يوم على اقصى تقدير و اسبوعيا تشوفى حاله الكاوتش
اخيرا السواقه ممارسه و جراءه و ذكاء حافظى على نفسك و على الاخرين عشان الناس تحافظ عليك
وسلامى للجميع

**tabeb** · 27-09-2009 06:01 PM

اهلا بيكي في شوارع المحروسة
مبدئيا كده لازم يكون حد بيعرف يسوق قاعد جنبك عشان تتعلمي اخطائك وما تكرريهاش
ثانيا ما تخافيش ما تخافيش
اللي يخاف مش هيتعلم
اللي يديكي كلاكس ولا اللي يزعق كبري دماغك لانه في مرحلة منم المراحل كان زيك وبيتعلم برضه ما اتولدش محترف سواقة
نقطة ان العربية تبطل منك دي سببها انك بترفعي رجلك من الدبرياج بسرعة

**m.aligamal** · 28-09-2009 02:50 AM

نسيت فعلا اقلك حاجه مشكور الاخ tabeb انه قلها موضوع انك سايقه ولا يهمك اى حد يديكى كلاكس او نور وخلى اعصابك فى تلاجه و اوعى تفكره فيه عشان متتسرعيش او تتحرجى تغلطى تخبطى اى حد او تعملى حركه غريبه و دايما تخدى بالك لو حد حدف عليكى يعنى تفادى نفسك لو امكن ومتكسريش قوى عشان الباور فى العربيه بيبقى خفيف ممكن تلاقى نفسك خبطتى حد او لاقد الله لو على طريق سريع ممكن تنحرف العربيه و متقدريش تلميها فدايما خليكى واثقه فى نفسك و هاديه و متستعجليش و مش عيب انك تتعلمى من اخضائك وحاولى تنزلى البلد فى وقت متاخر و معاكى حد بتبقى الدنيا فاضيه تتعودى على الشوارع و تعرفى ابعاد عربيتك كويس و تتعلمى تاخدى الملفات و تتعلمى الركن برضه و المارشدير و تظبطى نفسك بعيد عن ضغوط الاخرين
و شكرا

**evoo90** · 28-09-2009 08:38 AM

المشاركة الأصلية كتبت بواسطة tabeb

اهلا بيكي في شوارع المحروسة

وادى نفر جديد فى مطحنه المحروسه
فعلا زى ماقالك كده اهم حاجه برود الاعصاب عشان البنى ادميين فى مصر بقوا تنحين قوى وان شاء الله اسمعى الكلام ومش هتبطل منك تانى

**mucho** · 28-09-2009 12:07 PM

المشاركة الأصلية كتبت بواسطة eng_s

السلام عليكم ورحمة الله وبركاته
الاخوة الكرام
كل هام وأنتم بخير
انا اتعلمت قيادة السيارة بس للأسف لما جيت اركب عربيتي اول مرة لوحدي خبطت فيها في الرصبف
هي الحمد لله اتصلحت وانا غلطتي كانت اني مش اتعودت عليها ومشيت رجلي على البنزين والفرامل والدبرياج قبل ما اطلع
المهم الحمد لله عدت على خير
بس المشكلة اني تقريبا حصلتلي عقدة عدت خايفة اركبها لوحدي
وبعدين اي مشكلة تحصل اتخض واتلبخ
يععني النهاردة جيت ادورها وقلت هطلع بيها من ادام البيت اوديها البارك على الطريق لقيتها بتدور وبعدين لما اجي اشيل رجلي او اخفها بنزين عشان ارجع مارشدير ومش يبقى بسرعة تتهز وتقف على طول
يا ترى اللي بيحصل ده طبيعي وليه
ويعني ايه العربية تشرق وده بيحصل امتى وليه ولو حضل اعمل ايه
يا ريت تساعدوني ازاي احسن من نفسي وسرعة استجابتي على الطريق وسرعة استخدامي لحواسي كلها مع بعض
شكرا ليكم

كمان تقدري تدخلي ع الموضوع ده وهاتستفاديمنه كتير زيي

http://www.nilemotors.net/Nile/40356-a-6.html
كي جي وان سواقة عربيات