كابوس جديد اسمه : انتحار المشاة امام السيارات

[Samir Elshahawy]

هو فيه ايه بالظبط , الناس عايزة تنتحر امام العربيات
يعني السادة اعضاء المنتدي معظمهم ناس افاضل و مش من هواة السرعة و مع ذلك كثر الكلام عن حوادث الاصطدام بمشاة نتيجة لامبالاة و اهمال من المشاة انفسهم

و الكلام ده شوفته النهاردة بعيني و أنا راجع من ابورواش , كان امامي عربية ربع نقل و بصراحة كان ماشي علي مهله يعني 60 كم/ساعة في الطريق الضيق المؤدي الي الهرم و انت جاي كده من الصحراوي و كنت انا وراه و يادوب بدأت أخد يميني و لاقيته فرمل فجاة و اذا بواحد - مش عارف أقول ايه - عدي الجزيرة اللي في النص و راح رامي نفسه قدام العربية و لما النقل وقف راح جاري و مكمل ناحية اليمين لكن كنت انا كمان فرملت ووقفت و أديت انتظار علشان اللي ورايا مايلبسوش فينا أنا و الربع النقل المهم الراجل مشي عادى و بقي يبص لنا شذرا .

بصراحة بقيت ماشي في الدائري خايف لدرجة اني بطلت أمشي في الحارة اليمين أو الشمال و بقيت أفضل أمشي في النص علشان لو حد من المشاة حب ينتحر يبقي عندي مجال أتفاداه

عايزين ينتحروا يروحوا ينتحروا بس بعيد عننا مش لازم نلبس مصيبة بسببهم
بصراحة الظاهرة دي أخذة في الانتشار و لو صح توقعي بأن ده انتحار مش أهمال و لامبالاة هايبقي ده كابوس لكل واحد سليق عربية

[SS]

هو فيه ايه بالظبط , الناس عايزة تنتحر امام العربيات

بصراحة بقيت ماشي في الدائري خايف لدرجة اني بطلت أمشي في الحارة اليمين أو الشمال و بقيت أفضل أمشي في النص علشان لو حد من المشاة حب ينتحر يبقي عندي مجال أتفاداه

بص بقى ياسيدى ...فى النص فى الربع...مسيره هايجيلك..و بعدين انت مش دايما الحارة اللى جانبك يبقى متاحلك المشى فيها ..وبعدين انت لو ماشى فى النص وجانبك عربية اعلى ...جيب اتوبيس نقل اى حاجة...بتبقى حاجبة الرؤية...وممكن فى لحظة تلاقى واحد طلع لك من قدامها من حيث لاتدرى وبقى قصادك بالظبط..وده بيحصل كتير اوى ...ده بالاضافة للناس اللى بتعدى من مناطق مضلمة فى الطريق و فاكر انك شايفه...ومايعرفش المصيبة انه مش باين من اساسه..انا مش عارف لو وقعت فى الموقف ده هاعمل ايه..بس اعتقد مش هاسوق تانى!

[Samir Elshahawy]

فعلا انت معاك حق , بس فعلا انا النهاردة و لاول مرة من يوم ماسوقت و أنا أمشي خايف كده بعد اللي شوفته النهاردة , لدرجة اني كنت طافي الراديو و الكاسيت علشان أركز أكتر في الطريق

مش عارف المفروض اركز في أيه و لا أيه اللي قدامي و لا اللي ورايا و لا الناس اللي بتعدي و لا اللي ناوي يعدي و المفروض أبص في وشه و شوفه ناوي يعمل ايه

[abouelmaggd]

يا باشا ده فيه اتنين ستات معروفين فى الهرم كانوا بيرموا نفسهم قدام مستشفى الهرم عند اشارة المريوطية

[EslaM_NagY]

مرة كنت بجرب فرامل ال128 فى شارعنا الى هو كله على بعضه حارتين

وماشى على 80 وفجأة خدت بالى لقيت كورة بتعدى الشارع وواد صغير بيجرى يجيب الكورة.

وعينك ما تشوف الا النوررر
رحت ضارب فرامل من الى بتعلم فى الارض يدوبك الواد عدى من قدام الكبوت وانا وقفت رحت شادد الهاند وسايب العربية ونازل شتيمة هستيرية فى الواد وابوه (البواب) والعيال الى كانوا بيلعبوا ومعاه وسبتهم ومشيت.

بجد حاجة تحرق الدم ولو كنت لمسته كنت رحت فى مصيبة عشان كورة كفر.

بس الحمد لله الفرامل ساعتها اثبتت كفاءة.

[نور القمر]

يعني يا باشمهندس هو فعلا كان عايز ينتحر ولا قصدك بيعدي الشارع بغباء
بصراحة لو واحد عايز ينتحر تاخدو توديه القسم وتعمله محضر
على الاقل لو مات بعد كدة ما يلبسش اللي خبطه مصيبه

لكن لو بيعدي بغباء ده بصراحة معذور لان شوارعنا وحشة ونادر لما تلاقي منطقة عبور مشاه او عسكري مرور
انا عن نفسي وانا بعدي الشارع بحس اني متورطة وغرقانه في شبر ميه

[ASKAFRAWY]

يعني يا باشمهندس هو فعلا كان عايز ينتحر ولا قصدك بيعدي الشارع بغباء
بصراحة لو واحد عايز ينتحر تاخدو توديه القسم وتعمله محضر
على الاقل لو مات بعد كدة ما يلبسش اللي خبطه مصيبه

لكن لو بيعدي بغباء ده بصراحة معذور لان شوارعنا وحشة ونادر لما تلاقي منطقة عبور مشاه او عسكري مرور
انا عن نفسي وانا بعدي الشارع بحس اني متورطة وغرقانه في شبر ميه

ياباشا انت غارف بقى المصرى قلبه جامد يعنى نازل بيقول عاوز اتخانق
ولو لمست واحد بالعربية تلاقى سيييييييييييييييييييل من الشتايم!!!!!!!!
انا كمان لاحظت الموضوع دة لاقيت ان التبرير بتاعها ان المصريين بيتمتعوا بأجمد قلب فالعالم

قلب نصف نقل تقريبا:k45:

[theking2690]

انا برضه لسه انهارده وانا ماشى على ناحية الشمال فلقيت الميكروباص اللى قدامى وقف فجأه وانا مش شايف ليه فبعدى منه وفجأه لقيت بنى ادم اقل ما يقال عنه انه غبى و بينتحر ظهرلى من قدام الميكروباص وبقى قدامى بالظبط ويدوبك لحقت افاديه على اخر لحظه و ياريت يقول انا اسف و لا حاجه ده بصلى من فوق لتحت ومشى انا كان هاين اكمل عليه بالعربيه و اللى يحصل يحصل بس حظه انى مكنتش فضيله وخد عندك من المواقف ديه كتييير رغم ان انا بطبيعتى لما بشوف مثلا حد مرتبك و مش عارف يعدى بهدى و بدى انتظار علشان اخليه يعرف يعدى وفى الاول و فى الاخر ربنا بيبقى واقف معانا و بيسترها

[bassem.naguib]

أنا ملاحظ الموضوع ده من زمان قوي والله .. وبحاسب من الناس دي .. والناس دي ثلاث فئات .. يا إما مشاكل الدنيا وخداهم وماشيين عمالين يضربوا أخماس في أسداس ومش حاسين بالعالم من حوالين (ودول ربنا يكون في عونهم) .

الفئة الثانية أنه يكون ماشي مسطول وبرضة مش حاسس بنفسه .. وده ربنا يخده .

الفئة الثالثة والأخيرة .. وهو يكون نازل من البيت وعاوز عربية تخبطه فعلاً .. أهو ياخد تعويض من صاحب العربية .. ولو مات يبقى ساب فلوس للورثة اللي متعلقين في رقبته ومش عارف يعمل ليهم أيه

وعلى أي حال السواقة في مصر لازم تخلي بالك من العربيات ومن المطبات والحفر ومن سواقين المكروباصات والنقل والسواقة الحريمي وكمان الناس اللي أشرت ليهم سلفاً .. ولو بتسوق في مصر وبتخلي بالك من الحاجات دي كلها تبقى تسوق في أي حته في العالم بدون أي مبالغة .

[نور القمر]

وعلى أي حال السواقة في مصر لازم تخلي بالك من العربيات ومن المطبات والحفر ومن سواقين المكروباصات والنقل والسواقة الحريمي وكمان الناس اللي أشرت ليهم سلفاً .. ولو بتسوق في مصر وبتخلي بالك من الحاجات دي كلها تبقى تسوق في أي حته في العالم بدون أي مبالغة .

اهم حاجة تخلو بالكم من السواقه الحريمي وكفاية عليكم حارة واحدة واحنا سيبولنا حارتين تلاته على حسب المتاح
وكفانا الله شر القتال

[نور القمر]

اكتر حاجة بتجنني لما اكون راجعه بضهري والناس مصممة تعدي من ورايا بردو
وافضل ادي كلاكسات مفيش فايدة
الواحد بيبأه مش عارف يركز وراه شمال ولا يمين ولا يركز على مقدمة العربية

ده غير لما تكون ماشي في شارع جانبي وفي مشاه ووشك في وشهم وتقعد تدي كلاكسات علشان يوسعوا
يفضلوا متنحين لحد متقرب منهم عى اخر شبر

[abouelmaggd]

اكتر حاجة بتجنني لما اكون راجعه بضهري والناس مصممة تعدي من ورايا بردو
وافضل ادي كلاكسات مفيش فايدة
الواحد بيبأه مش عارف يركز وراه شمال ولا يمين ولا يركز على مقدمة العربية

دى حاجة بقت اساسية خلاص ، الشارع اللى ساكن فيه اوله مطلع جامد لازم يتاخد على الاول ابقى خلاص طلعت تلاقى واحد طلبت معاه يعدى قدام العربية و انا طالع بحرق ، تبص شمال على اللى جاى بعد ما اعدل وش العربية تلاقى حد ع الكابوت ، و اليو ترن كمان اللى قدام ناجية سنتر الصبح تبقى العربيات بتلف و تبص يمين على اللى جاى تلاقى بنات المدارس طالبه معاهم يعدوا من الجزيرة قدام العربية

[Samir Elshahawy]

أرسل أصلا بواسطة نور القمر
يعني يا باشمهندس هو فعلا كان عايز ينتحر ولا قصدك بيعدي الشارع بغباء
بصراحة لو واحد عايز ينتحر تاخدو توديه القسم وتعمله محضر
على الاقل لو مات بعد كدة ما يلبسش اللي خبطه مصيبه

لكن لو بيعدي بغباء ده بصراحة معذور لان شوارعنا وحشة ونادر لما تلاقي منطقة عبور مشاه او عسكري مرور
انا عن نفسي وانا بعدي الشارع بحس اني متورطة وغرقانه في شبر ميه

بصراحة انا اعصابي ساعتها سابت و ستر ربنا اني كنت علي يمين العربية اللي قدامي و متاخر عنها شوية و كنت شايف الراجل و هو بيرمي نفسه امام العربية و كويس اني وقفت في نفس اللحظة اللي العربية النقل فرملت فيها - برضه كنت لسه مغير تيل الفرامل و كانت دي اول دوسة عليه - بس انا متاكد انه كان عايز ينتحر لانه بعد ماعدي من العربية اللي كانت بقت علي شمالي عدي و كمل علشان يقف امامي ووقف فعلا بس لسوء حظه وجدني كنت قد توقفت