دليل نايل موتورز السياحى

[modux]

وشكرا ل "مودوكس" , لسه راجع من راس البر , الوصف بتاعه صادق جدا فى كل حرف والله ينور عليه

شكرا يا pics
و اتمني اكون فعلا افدتكم بجد
و انا تحت الخدمة لو في اي سؤال

[Ashraf A.Kader]

حسام باشا
الغردقة مدينة شتوية؟؟ حرام عليك يا باشا انت عايز الناس تكرهك والا ايه
اخبارك ايه كل سنة وانت طيب

[Hossam_Hassan]

كل سنة و حضرتك طيب، الحمد لله كله تمام ;) بس بصراحة الجو بيبقى ولعة فى الصيف.

[mokhtar]

الاخ مودوكس
اخيرا لقيت واحد بلدياتى من دمياط فى منتدانا الجميل نورت المنتدى ياباشا بس شكلك بتيجى دمياط كتير واحب اضيف على كلامك عشان الاخوه فى المنتدى اللى ماشرفوش راس البر راس البر دى بقت مصيف كل الطبقات كل المستويات هترتاح فيها وده طبعا مش من زمان انما بعد التطوير اللى حصل فيها فى خلال السنتين اللى فاتوا وده بجهود المحافظ بتاعنا لانه عرف ازاى يخطط راس البر من تانى راس البر توصلها زى ماقال الاخ العزيز مودوكس وانت لسه على المدخل هتحس فعلا انها بلد جميله المدينه عباره عن شارع واحد كبير وطويل ممتد من اولها لاخرها اسمه شارع بورسعيد الشارع ده معمول بنظام حلو جدا 3حارات رايح و3 للجاى وفى النص فيه رصيف ممشى كبير وعريض للى يحب يتمشى ياخد البلد من اولها لاخرها ويحد الممشى من الجانبين نجيله مزروع فيها نخل ومنظرها رائع..........المهم وانت واخد شارع بورسعيد بتوصل للداون تاون منتصف المدينه بيبقى فيه فى النص مسجد ضخم مشهور بقبته العاليه اسمه مسجد الرحمه الحته دى اسمها (السوق القديم)او (السوق الكبير) وفى السوق ده مفيش حاجه مش هتلاقيها
كل حاجه باسعار معقوله وعاديه محلات الاكل المشويات بزوم وابوخالد وابو الشام وهتلاقى حلقه سمك فيها سمك وجمبرى وكابوريا طازه بيبقى لسه طالع من البحر المتوسط وجاى من عزبه البرج (عزبه البرج دى المدينه المقابله لراس البر على البر التانى وهى مدينه قائمه على الصيد بها 1/3 الاسطول المصرى للصيد) وهتلاقى محلات الاسماك والماكولات البحريه هناك كتير وروعه
لو عايز تجيب حلويات اللى مشهوره بيها دمياط فقط المشبك والهريسه و....عندك البدرى احسن حلوانى فى مص كلها بلا مبالغه واللى ماكلشمن عنده يبقى ماكلش حلويات واسعاره حلوه ده طبعا غير الامريكين وده محل حلويات فخم جدا الجاتوه بتاعه جامد وعنده قعد روعه ............لو نفسك رايحه للفطير يبقى عندك اتنين مفيش تالت ليهم دعدور وابو العلا وبجد مفيش بعد كده
غير كده السوبر ماركت والمحلات اللى بتبيع اى حتجه انت عايزها موجوده فى السوق
نسيب السوق ونكمل شارع بورسعيد
انا نسيت اقولكم ..شارع بورسعيد ده على شماله من اول البلد من شارع107و101 الى اخره عند اللسان والمنطقه الاولى بيبقى على شماله شاليهات او زى مااحنا بنقول عليها عشش ومعظمها بتشوف البحر وبتتراوح اسعار تاجيرها فى الليله من 100الى 250 حسب المكان والموقع وفيه بيوصل ل400و500 ده اللى على البحر مباشره
الشواطىء هناك كلها عامه بدءا من الشوارع الرئيسيه وكل شارع داخل شمال من شارع بورسعيد الرئيسى يوصل للشاطىء بتاعه
وهم بالترتيب ......شارع 101 ...89...77..63..51..33..15..شارع المديريه وفيه شاطىء خاص اسمه شاطىء العائلات ده بعد شارع 101 بجوار نادى القوات المسلحه
نسيت اقولكم القعده بليل على البلاج قدام البحر روووووووووووووعهماتفوتكش
نكمل شارع بورسعيد...على اليمين من بعد السوق القديم هتلاقلى شارع النيل وده شارع عل كورنيش النيل عليه ممشى سياحى ومحلات بتبيع اى حاجه ملابس اكسسوار اى حاجه عايزها هتلاقيها وعليه كازينوهات ممكن تقعد وتستمتع بمنظر النيل وممكن تاخد فسحه نيليه بلنش بياخدك من اول النيل حنى اللسان
..نيجى لاجمل حته فى لراس البر .........اللسان اللى بيتجلى فيها عظمه الخالق والمنظر المبدع وهو التقاء النيل بالبحر
تبقى واقف وعلى يميبك النيل وعلى شمالك البحر والبحر ممكن تلاقيه عالى والنيل هادى ومفيش اى اختلاط بينهم
منظر تقول قدامه سبحان الخالق
وفيه هناك جداريه عليها رسم لنهلر النيل من منابعه بافريقيا حتى مصبه براس البر
نسيت اقول فيه فناده كتير فى راس البر بمستويات مختافه
اعلاهم فندق البوريفاج بشارع النيل وجرين هاوس بشارع بورسعيد وعندك فندق الامارات والامام وابوطبل
من الاخر اللى مجاش راس البر لازم يعيد نظر ويفكر
وان شاء الله تنوروا راس البرواللى عايزيسال عن اى حاجه انا تحت امره

..MOKHTAR..

[محمدايهاب]

المدينة: العجمي


الطريق : طريق اسكندرية العادي طريق جميل متوسط السرعة 100 الطريق منور تقريبا أول 50 كيلو و بعد كده مظلم بس الطريق جميل وواسع و عند الكيلو 21 يبدأ الطريق المكسر- الزحمة - مواسير مكسورة -ناس متخلفة-ما فيش ارشادات - عماير قديمة - شكل جمالي صفر ( غحنا كملنا لغاية البيطاش و من هناك شارع الحنفية و بدأنا ندخل الحتت النظيفة و كنا مأجرين فيلا هناك و سمعنا إن عادل إمام مأجر فيلا في نفس المنطقة و فعلا كان في فيلل كتيير عليها حراسة و الله أعلم)


الترفيه :1 - الأساس البحر قسمــــــــــيــن عمومي ( زحمة و من غير منقذين و كما في حالات ارتفاع المنسوب بيسيبوا الناس تنزل و تلاقي الشط الخاص مفيش حد في المايه و ممنــــــــــــــــــــــــــــوع إنك تفكر تنزل)
شط خاص ( الفردوس و أوكسيجين و في شط تالت مش فاكره أوي)
2- تأجير الموتوسيكلات و العجل و دي موجودة في ميدان العسل
3- الكافيهات الكتيييير جدا
4 - سينمات مثلا سينما سمر على أول شارع البيطاش
5-لكن أحسن ترفيه إنك تسيب العجمي و تأخذ بعضك الساحل ساعة بالكتيير و تكون في مارينا و هناك برطع و إلعب زي ما أنت عاوز


المطاعم و الحلويات :1- في المالكي و صابر
2- في مطاعم fast food العادية ماك و كنتاكي بيتزا
3 - السمك مطعم بورسعيد جميل بس غالي و في أكشاك السمك و دول أحسن حل و الأكل فعلا جميل
4- أحسن حاجة هناك هي الحوواشي اشتري اللحمة و روح عند أي فرن بتاع حوواشي و اطلب عدد السندويتشات إلي عاوزه و استمتع يا معلم


المشاكل : 1 - طبعا الصرف مشكلة العجمي الأولى و إن كان إني سمعت إن المشكلة اتحات السنة دي و أنا عديت على العجمي و أنا في الساحل و شفت الشغل هناك على قدم و ساق زي ما وعد محافظ الاسكندرية
2- الطرق المكسرة و دي شكلها مشكلةدايمة و مالهاش حل و كمان غايب الارشادات ممكن تخليك تلف حولين نفسك 100 مرة
3 - طبعا الزحام المروري الخانق في الشوارع الرئيسية خاصة بعد صلاة المغرب
4- الشباب المجنونة لي بترح تروش و تلعب بالعربيات أكنهم في حلبة سباق
5 -الغلو المبالغ فيه في كل حاجة الفاكهه و السكن و تصليح العربيات و السمكرة

المميزات : 1- الجو و إن العجمي وصلة بين اسكندرية و الساحل و دي أهم مميزتها
2-كثرة الخدمات و تنوعها و ممكن مثلا تقعد في بيتك أو فيلتك و تطلب من أي سوبر ماركت و خمس دقائق و فعلا يكون عندك
3- طبعا البحر و دي الميزة عن الساحل هناك السباحة ممنوعة إلا في بحيرات مارينا الصناعية
4 - سهولة الموصلات جدا تاكسي-ميكروباصات ( مشاريع )-باصات - ميكروباصت رمسيس موجودة دايما- كمان ميكروباصات الساحل

[محمدايهاب]

المدينة : شرم الشيخ

الطريق: كويس نسبيا لغاية السويس و بعدين نفق أحمد حمدي و من هناك طريق شرم الشيخ الدولي طريق سريع بس مش مجهز جدا و الخدمات قليلة جدا بس الطريق بيتوسع كل سنة عن إلي قبلها ( أنا رحت شرم3 مرات) يعيب الطريق اللجان الكتتير جدا و كل شوية تفتيش و توقيف و لو حد من الركاب ( باص) مش معاه اثبات تبقى مشكلة الباص مضطر يستنى لغاية أما اللجنة إما تأخذ الراكب أو ترجعه

الترفيه ؛ 1- البحر و المسابح النظيفة جدا
2- إلا مجبي الغوص خليج نعمة من احسن الأماكن على مستوى الجمهورية
3-السفاري( ركوب خيل أو جمال أو بيتش باجي بالاضافة لتسلق الجبال و الشاي العربي و مشاهدة العروض المختلفة و القعادة الجميلة
4-خليج نعمة ممر للمشاة في كافبهات و طاعم و محلات و اماكن للانترنت و مولات و ديسكوهات ( للراغبين فقط )
5 - سوق شرم القديم و هناك في محلات سمك 10\10 و محلات تذكارات و تحف
6- المراكب الزجاجية
7 - حفلات غنائية و استعراضات

العيوب:1- طبعا الفساد الأخلاقي المنشر
2-الغلو المبالغ فيه خاصة في الموصلات
3 - صعوبة الرحلات العائلية بسبب الفساد الأخلاقي



المطاعم :1- كنتاكي و بيتزا هات و ماك
2- مطعم جاد للفول (غالي جدا هناك)
3- مطاعم ايطالية وفرنسية و صينية
4 - في سوبر ماركت الحمل و ده في الأسعار العادية مع ارتفاع طفيف

القرى السياحية المنشرة أنا عن نفسي دخلت 2 موفينبيك و نوريا

موفينبيك : جزئين في بيطل عاى خليج نعمة و التاني بعيد على طول طريق السلام
باصات مجانية - مسابح ضخمة و أوبين بوفيه 100\10 جميل جدا جدا جدا-بحر مجهز - كل حاجة في القرية مجانية (فوط -بينج بونج-كور الميه-تنظيف الغرف.......)-غرف على اعلى مستوى من النظافة و التجهيز - امكانية التنقل بين الفرعين بالباصات المجانية
( الفندق خمس نجوم)

نوريا: قريب من خليج نعمة ( النحية التانية عالطول ) لا يطل على البحر ( مش مشكلة 5دقايق مش و تكون في البحر) فيه نفس مميزات موفينبيك لكن بمستوى أقل
(الفندق 4 نجوم)

[modux]

مختار اهلا بيك

اتشرفت بمعرفتك بجد انا اسمي محمد

انا قاعد في شارع 63

[Ashraf A.Kader]

حسام باشا الغردقة حر شوية في اغسطس فقط بس لان رياحها شديدة (جدا) وده سبب انها مشهورة بسباقات الشراع متحسش بالحر قوي اما في الشتا انسي يا باشا وخصوصا يناير وفبراير
الاستاذ محمد ايهاب طبعا شرم تحفة بس واضح ان حضرتك زياراتك اتحصرت في نعمة والسوق القديم بس فيه مناطق كتير تحفة وتستاهل انك تشوفها جوه وبره شرم زي راس محمد والهضبة وخليج القرش والغرقانة ونبق اماكن كتير وجميلة وتستاهل انك تزورها
ووبالمناسبة خليج نعمة لا يساوي شئ في الغوص بجوار الغرقانة وراس نصراني وتيران وبالطبع راس محمد
اما عن الفول والطعمية الاسعار في السوق القديمة رخيصة وكل عام وانتم بخير

[zozza]

المدينه : مرسي مطروح

الطريق : القاهره - الاسكندريه الصحراوي حتي الكيلو 115
طريق وادي النطرون - العلمين 137 كم
طريق العلمين - مطروح الساحلي 180 كم

اعتقد معظم النس عندها علم باول مرحلتين من الطريق و للعلم المرحله التلته (طريق العلمين - مطروح ) يعتبر بنفس الكفائه يعيبه فقط السفر بالليل لو مفيش قمر بيبقي صعب عشان لحد الصيف اللي فات مقيش خطوط متقطعه و لا حتى عيون قط (الحاجات دي لحد مارينا بس :? )

الترفيه :
علي رأي ليلي مراد بحب اتنين سوا الميه و الهوا ... بجد انتا مش هتشوف ميه و لا هوا في مصر كلها زي اللي في مطروح ... حتي الناس اللي مش بتحب تنزل الميه مبيقدرش يقاوم بحر مطرح ... انسي الحر و العرق هناك و اغسل مخك هناك ادام البحر

البلد بقت نضيفه جدا عن زمان و بقت من انضف محافظات مصر
النشاطات هنا الصبح بحر و بحر و بحر كل الشواطىء نضيفه و مش غاليه و ممكن تروح تشوف حمامات كليوباترا و تنزل البحر هناك و كمان تزور عجيبه و هي عباره عن جبل علي البحر هتنزل و تتطلع و خلاص
بالليل بقي هتقضيها سينمات صيفي اكتر من المحلات و تتمشى في الوق و تروح مره سوق ليبيا لو ليك في التي شيرتات و الشرابات و الشنط و مراتك تطلع عينك هناك حاجات مش ضروريه بس رخيصه.
و تقضيها بقي جو الكورنيش و الايس كريم و الدره المشوي.

هناك في فنادق القصر 4 نجوم و البوسيد 5 نجوم (القوات المسلحه) معرفش اسعارهم كام و الاحسن و الاسهل انك تأجر شقه علي البحر و دي بتكون وهميه و رووف و بتاع في حدود 250 جنيه (مش هتنزل من البلكونه من كتر حلاوه الهوا و البحر)
و في طبعا شقق ارخص من كده بكتير جوه مش عالبحر

و انتا راجع هتجيب لب و سوداني طبعا حتي لو مش بتحبهم لان كل الناس بتعمل كده (روحت اشتري ربع كيلو لب لقيت كل اللي حواليه بيشترو بال10 و ال15 كيلو)

الاسعار هناك عاديه و المحلات في كل حته و احلي و ارخص حاجتين الفاكهه و السمك

يعتبر من المصايف العائليه النضيفه جدا و كمان مش حتشوف تدني مستوي اخلاقي و انحراف زي ما لو روحت شرم مثلا.

[Xpert]

beni suef , minia & co :
طريق الصعيد :
طريق الصعيد سهل و ميه ميه ... عندك 3 طرق تسلكهم :

1- لو عربيتك سهله .. ارشحلك الطريق الشرقي بتاع الكريمات .. مدخله من عندكم مش عارف بس ناحيه حلوان و رمسيس كده ... الطريق سالك و 100 100 .. و حوالي 140 كم بينه و بين بني سويف ..عربيتك سالكه يبقي هوه ده الطريق.. و ده معروف بطريق الجيش او طريق الكريمات ... الاسفلت فعلاً نمره واحد .. و الطريق جديد و عريض .. الوصله اللي اعرفها لحد بني سويف بس ..و قبل بني سويف ب 20 كيلو كمان ... الطريق معالهوش عربيات كتير .. و الملفات فيه علي الواسع قوي و مريحه ..

2- لو عربيتك سالكه برضه : عندك الطريق الغربي : الطريق ده يتميز بان العربيات عليه كتير شويف .. و مدخله من الرمايه .. الطريق فيه عالي و واطي كتير ... مانصحكش بيه قوي .. الطريق فيه واصله موديه للفيوم .. بتمشي عليها شويف . و بعد كده بتلف و ترجع تاخد طريق الصعيد (زي حرف T كده ) .. و ده بيكمل لحد الصعيد علي حد علمي ...

3- لو عربيتك نص كم .. او بتحب الخضره زي حالاتي ... تاخد الطريق الزراعي .. و ده بدايته من المنيب .. و بيدخل للصعيد الجواني .. الخدمه علي الاسفلت من الناحيتين .. مشكلته بقي : الطريق ضيق (وسعوه في بعض الاماكي خاصه من القاهره لحد بني سويف .. بس و انت ماشي خد بالك لان الطريق فيه اجزاء مش كامله .. ) .. المطبات فيه كتييييييييييييييييييييييييييره للصبح .. و الجري فيه انسي ماينفعش ...و الطريق بيعدي علي بعض القري .. تلاقي المواشي و كده طلعتلك علي الاسفلت ...عادي يعني ..

اهم حاجه خد احتياطاتك علي الاسفلت ... لو معاك حموله زياده عن العربيه خد 2 استبن.. خد معاك حبل للقطر .. خد معاك جركن بنزين و جركن مياه ... و خلييها علي الله ...
ده الي اعرفه .. لو فيه حاجه مش صح حد يصحح)

[emad15]

ايه رأيكم يا اخوانى اننا نحط هنا معلوماتنا عن أى مكان رحناه فى مصر، زى مثلا المسافة و نروح ازاى و ناكل فين و المكان ده مشهور بايه و نسكن فين لأن كتير مننا مايعرفش عن أماكن كتيرة حلوة فى بلدنا و بتكون اختياراتنا محدودة.

و لو الموضوع اتحط فيه معلومات كويسة ممكن ساعتها نطلب تثبيته و اى حد عاوز يسافر يلاقى معلومات مفيدة جاهزة من ناس مجربة و ياريت الأعضاء اللى عندهم خبرات فى طرق الدلتا و الصعيد بالزات ينقلولنا خبراتهم لأن كتير مننا معندوهمش أى معلومات عنها.

الحقيقة موضوع اقل ما يقال عنة انة راااائع وخصوصا لما كنت بتتكلم عن الغردقة حسستني اني شايف الطريق - بس انا كنت بكمل اوقات لحد سفاجا - شكرا علي الموضوع المفيد.

[samehafez]

بورسعيد
اعذروني جايز البلد حلوة بس عشان انا بروحها شغل فمبستمتعشي بيها بس هو طريقا سهل و اتشرح قبل كدة
المطاعم :
عبده كفتة زي ما الاخ قال و ده في شارع اسمه طرح البحر و هتلاقي كافيهات كتيرة في الشارع ده (بس بصراحة مستواه مش قد كده خصوصا لو كنت متعود علي الكبابجية التقال )
البرج : ده طبعا غني عن التعريف و برضه في شارع طرح البحر بعد عبده كفتة يعني و انت ماشي في طرح البحر عبده كفتة علي شمالك و كمل قدام شوية هتلاقي البرج
كانال كروز : بصراحة مجربتهاش بس بتطلع تلف ساعة ولا اتنين في القناة و تتغدي

الفنادق : سونستا و ده اللي جربتة .... زبالة و الموظفين هناك مش قد كدة انا كنت بسال بتوع الشرطة اللي بيامنوا الفندق بصراحة كانوا زوق اكتر من موظفيين الاستقبال
هيلنان بصراحة مقعدتش فيه بس اللي جربوه بيقولو انضف بكتير من سونستا ز

زي ما قلت الكافيهات اللي في طرح البحر كويسة بس انا بصراحة لم اكون نازل بورسعيد بقعد علي قهوة اسمها قهوة البحرية في شارع ( نسيت ) بس هي جنب توكيل ايديال
عشان يتفكرني بالقاهرة

[Dr_Smart]

موضوع رائع ويا ريت يكمل خصوصا اننا في الاجازة

كنت عايز اسأل لو حد عنده فكرة عن مرسى مطروح

لو حبيت أأجر شقه عالبحر هناك ... ايه احسن مكان اقعد فيه وفي حدود كام ؟؟؟؟

[Xpert]

بورسعيد
اعذروني جايز البلد حلوة بس عشان انا بروحها شغل فمبستمتعشي بيها بس هو طريقا سهل و اتشرح قبل كدة
المطاعم :
عبده كفتة زي ما الاخ قال و ده في شارع اسمه طرح البحر و هتلاقي كافيهات كتيرة في الشارع ده (بس بصراحة مستواه مش قد كده خصوصا لو كنت متعود علي الكبابجية التقال )
البرج : ده طبعا غني عن التعريف و برضه في شارع طرح البحر بعد عبده كفتة يعني و انت ماشي في طرح البحر عبده كفتة علي شمالك و كمل قدام شوية هتلاقي البرج
كانال كروز : بصراحة مجربتهاش بس بتطلع تلف ساعة ولا اتنين في القناة و تتغدي

الفنادق : سونستا و ده اللي جربتة .... زبالة و الموظفين هناك مش قد كدة انا كنت بسال بتوع الشرطة اللي بيامنوا الفندق بصراحة كانوا زوق اكتر من موظفيين الاستقبال
هيلنان بصراحة مقعدتش فيه بس اللي جربوه بيقولو انضف بكتير من سونستا ز

زي ما قلت الكافيهات اللي في طرح البحر كويسة بس انا بصراحة لم اكون نازل بورسعيد بقعد علي قهوة اسمها قهوة البحرية في شارع ( نسيت ) بس هي جنب توكيل ايديال
عشان يتفكرني بالقاهرة

اللي ينزل بورسعيد .. نصيحه .. يطلع علي سوق السمك و يجرب السمك المشوي هناك .. سمك طازه و ميه ميه ..

[mokhtar]

يا جماعه الموضوع ده لازم يتم تفعيله اكتر من كده....فين باقى الاعضاء..يلريت اى عضو يوصف اى مكان راحه كمصيف او اجازه وارجو من الاداره التثبيت لان الموضوع ده مهم وبيتوه فى المواضيع القديمه بحيث يبقى دليل سياحى شامل على كل شىء يتعلق بالمصايف او الاجازات او اماكن الفسح والتنزه...واللى يحب يشوفه يلاقيه فى اول صفحه على طول ..بدل مايعد يدور



..mokhtar..