موضوع ممتاز فعلا يا استاذ حسام وياريت يتعمل هيكون مفيد جدا .

ممكن افيدكو
في
طريق مصر -الاسماعيلية - بورسعيد - دمياط (صحرواي )
مصر -الاسكندرية (صحراوي)

فكرة ممتازة و طبعا المعلومات حتكون متلخبطة و حتحتاج ترتيب من المشرف

نبدأ مثلا :

اسكندرية:

مطاعم مرشحة:

مشويات:
=====
ابو فارس (داون تاون - ميامي ش الاسكندر ابراهيم) - اكل شامي (****)
بلبع (داون تاون - فكتوريا) مشويات (*****)
عبد الوهاب (السيوف) مشويات (*****)

أسماك:
====
سي جل (الدخيلة) اسماك (غالي شوية) (*****)
ابو اشرف بحري (****)
بلبع (***)
عبد الوهاب (***)
جزيرة الملكة (بحري) (***)
هو ده شعبان بتاع السمك اللي بيقولو عليه :lol: (المنشية)(**)
حودة الجندل (الازاريطة) (*)

هبتدى بمدينة الغردقة:

1 - الطريق : احسن طريق هو طريق القطامية - العين السخنه و مدخله من الطريق الدائرى بعد كارفور بحوالى 5 كيلو و تقسيمة الطريق من القاهرة للغردقة كالأتى (القطامية - العين السخنه المسافة حوالى 120 كم و السرعة القصوى 120 و توجد بنزينة وطنية فى أول و منتصف و أخر الطريق) ثم (العين السخنه - الزعفرانة المسافة حوالى 70 كم و السرعة القصوى 90 و توجد بنزينة مصر للبترول فى أول الطريق و بنزينة التعاون فى الزعفرانة) ثم (الزعفرانة - رأس غارب المسافة حوالى 120 كم و السرعة القصوى 90 و توجد بنزينة موبيل فى رأس غارب) و أخيرا (رأس غارب - الغردقة المسافة حوالى 100 كم و السرعة القصوى 90) و مدخل الجونة قبل الغردقة بحوالى 23 كيلو، كل الطريق حلو و اتجاه واحد و العجل مش كتير ما عدا المسافة من العين السخنه - الزعفرانة اتجاهين و ياريت محدش يستعجل فيها لأنها خطر.

2 - المدينة : الغردقة مدينة جميلة و اسعارها معتدلة، يعنى ماتفرقش حاجة عن القاهرة، تنقسم الى جزئيين أساسيين (الدهار) و دى منطقة سكن أغلب سكان الغردقة من عائلات و موظفين و عاملين بالفنادق و هناك تحس انك فى احد الأحياء الشعبية و شوارعها نظيفة و متسفلتة و بها بعض الفنادق المتوسطة من 2 - 3 نجوم و لو عاوز اقامة نضيفة بسعر معقول فى فندق أو شقة يبقى هتلاقى طلبك هناك و فيها كمان شارع الحجاز اللى فيه ورش الميكانيكا و كل ما يتعلق بالسيارات بس مش هتلاقى غير 5% صنايعية كويسين علشان أغلب العربيات فى البلد جديدة. الجزء التانى من المدينة هى منطقة (السقالة) و بتمتد من ميدان السقالة حتى مطلع الهضبة مرورا بالشارع الرئيسى بالمنطقة و هو شارع شيراتون اللى بيضم مجموعة كبيرة من البازارات و المطاعم و الفنادق و هو بالأضافة للشوارع المتفرعة منه يعتبر المقر الرئيسى لمكاتب شركات السياحة و المكان المفضل لسكن الأجانب العاملين بشركات السياحة و الفنادق، و على فكرة الغردقة فيها ميزة جامدة وهى ان اللى مامعاهوش عربية يقدر يتنقل بسهولة بالميكروباصات بس هى مش زى ميكروباصات القاهرة بتبقى انضف و اجدد و اسعارها كويسة، يعنى بجنيه تجيب البلد من أولها لأخرها.

3 - الأقامة: الغردقة مدينة شتوية، يعنى لا انصح اى حد يروحها فى الصيف لأن الجو بيبقى ناااااااااااااااااااار، لو بتنزل فى فنادق هتلاقى تنوع كبير و اسعار كويسة (مقارنة بشرم الشيخ) و على قد ميزانيتك هتلاقى طلبك بس ماتسافرش من غير حجز ولو تحب تأجر شقة برضوا هتلاقى طلبك باسعار مقاربة للأسكندرية و الغردقة فيها 8 شواطىء عامة كويسة جدا كمواقع و نضافة.


4 - الأكل و الفسح: أحلى حاجة فى الغردقة ان كل واحد بيلاقى الفسحة اللى تناسبه و على حسب امكانياته و ده علشان التنوع اللى فيها و علشان فيها عائلات مقيمة هناك مش زى شرم الشيخ اللى كل حاجة فيها معمولة على مقاس الأجانب، المهم انصحكم تقضوا يوم كامل للصيد فى البحر و مش لازم عن طريق شركة أو فندق، روح الميناء السياحى و رتب مع ريس مركب قبلها بيومين و ممكن يضمك على مجموعة، أما بالنسبة للأكل فمتفوتوش المطاعم دى

- بيتا سفينكس: أكل على كل زوق جميل و نضيف قوى، متفرع من شارع شيراتون/ الشارع اللى على ناصيته مكدونالدز.
- أسماك الميناء أو الجوكر: الأتنين قريبين من بعض فى ميدان السقالة و أسعارهم زى بعض بس الميناء قعدته و خدمته احسن.
- بولز: مطعم امريكى و ايطالى بعد منزل الهضبة قبل الماريوت، زى تشيليز و البيتزا هناك ايطالى اصلى
- فول أبو أية: شارع شيراتون قبل ميدان عروسة البحر، كل و ادعيلى انا و ابو اية :D :D :D


يا ريت أكون قدمت معلومات مفيدة و لو حد عنده أى أسئلة أنا فى الخدمة.

يا ريت

الف شكر يا استاذ حسام و الموضوع دا لعبتك باءه وياريت تطلع فيه امكانياتك لأنو موضوع مهم :P
اللى بعدو :D وياريت تكون العين السخنه

بور سعيد.
اللي اكلت عنده هناك كان بتاع مشاوي و اسمه عبده كفته :D
و كان اكله خطير بس مش عارف اسم المنطقه اللي هو كان فيها

i will go to luxor and aswan in march is there any data about them, thanks brothers...

أستاذ Hossam Hassan

باين عليك رحت الغردقه كتير او كنت شغال هناك
لدرجه انك عرفت ابو ايه ابو فول حكايه
و كمان بولز
ده انت باشا

على العموم أصحح معلومه بسيطه
راس غارب للغردقه 160 كيلو
و الزعفرانه لراس غارب 100 كيلو

قاهرة المعز - اسماعيلية - بورسعيد - دمياط - راس البر

السلام عليكم

هبدأ بطريق مصر -اسماعيلية - بورسعيد - دمياط ( حوالي 250 كيلو)

الطريق عموما ممتاز
مفيش ولا مطب غير عند البوابات
أحسن كتير من طريق القاهرة بنها - منصورة - دمياط (حوالي 200 كيلو )
حيث ان دمياطي الاصل و بسافر كتير علي الطرق دي



بندأ بالجزء الاول

القاهرة - اسماعيلية ( 100 كيلو )

يبدأ من اخر جسر السويس كانك رايح علي العاشر من رمضان
تاخد الطريق علي طول لا يمين ولا شمال المسافة الي العاشر حوالي 50 كيلو
هتحس انك لسه في القاهرة - مفيش ولا لجنه الا و انتا داخل القاهرة ( حوالي قبل القاهرة ب 10 كيلو)
السرعة المثالية 100 ( من وجهة نظري ) بيكن في تريلات و عربيات كتير من و الي العاشر )
محطات البنزين متواجده بس مش كتير
بعد العاشر هيكون عندك حوالي 50 كيلو ل حد بوابات الاسماعيلية
طريق ممتاز لا يوجد عليه مرافق اجري براحتك ممتاز للجري بثبت رجلي علي 150

بعد البوابات و 4 جنيه :lol:
هتكون داخل الاسماعيلية
بس قدامك حوالي 20 -30 عشان تبدأ تلاقي القري و هتحس انك في طريق زراعي شوية من كتر الشجر
تحاول تقلل السرعة شوية ل 80 -90
هتبدأ تلاقي بتوع المانجو
اشتري لان الحاجة طازة و فاصل معاهم كويس و بعدين هتلاقي نفسك دائري حول السماعيلية من مفرق شمال ( مش تخاف واضح )
و لو حتي دخلت يمين الاسماعيلية في يو ترن قريب اوي هتلف و ترجع تمسك الطريق مفيش 2 كيلو


الجزء الثاني ( كيلو 100)

اسماعيليه - بورسعيد

المهم هتمشي شوية هتفاجي ب حاجة تحفه تحفه اسمها جسر مبارك السلام !!!
كوبري معلق فوق جسر السويس ( الجزء المعلق تنفيذ ياباني و الباقي مصري )
عمري ما طلعتو بس هتفضل ماشي جنبو حوالي عشر دقايق علي ارتفاع مثلا 60-70 دور

ممكن تركن و تنزل تشرب حاجة ساقعة و تتفرج عليه
عشان قدامو اول كافتيرات علي الطريق

بعدها بحاجة بسيطة البوابة التانية هتعدي عادي خالص
هتمشي شوية مش كتير حوالي 30 كيلو هتلاقي مفرق رخم جدااااا
شمال بورسعيد و مش باينة بس مميزة عشان هتشوف علي الناحية التانية بنزيه موبل

خد بالك و انتا رايح القاهرة مش هتاخد بالك من المفرق ده عشان الطريق كده كده هياخدك يمين
و يمشيك صح

المهم تاخد بالك و انتا رايح بورسعيد

بعد المفرق ده طريق لذيذ هتكون ماشي و يمنيك قناة السويس في كافتيرات كتير عليه و لذيذ ممهد كويس و جري جامد
حوالي 50 كيلو
نجي لنقطة مهمه
مفرق دمياط و الطريق الساحلي
داخل بورسعيد --- كمل علي طول ( مش تعمل يو ترت و تدخل اول فتحة يمين )
داخل دمياط -- هتعمل اليو ترن اللي فوق ده

دي اسوا حاجة في الطريق كلووووو
طريق دائري حول بروسعيد
اول مل تاخد يمين هتلاقي كمين مباحث و مرور

حوالي 30 كيلو من اسوا الطرق الصحرواية
ضلمة كحل
حارتين رايحين و حارتين جايين بينهم فواصل اسمنت
المصيبة و خلي بالك الفواصل ده متشاله في الكباري
عليه حوالي 3 كباري فوق مزراع سمك و بحيرات
حوادث بالهبل و كمان انتا و انتا نازل من الكوبري خد بالك الرصيف هتلاقيه تاني و مش هتاخد بالك منو ( يا رب تاخد بالك )
مفيش غير نور عربتك و نور المقابل اللي هيعميك ( بعد الشر عليك )

امسك الخط الابيض في نص العربية مش تزود عن 80-100
ركز اوي فيه
طبعا مفيش ولا حتي كلب عليه
شوية و هتلاقي مفرق يمين اتجاه راجع تاني بورسعيد و شمال دمياط
بعد كده هتتواصل مع طريق دمياط بورسعيد
30 كيلو في اللذيذ منورين ( في اتجاه دمياط - بورسعيد )
مظلمين بس كويسين في اتجاه بروسعيد - دمياط )
واسعين و جري شديد اوي من الدمايطة

هتمشي 30 كيلو في 10 دقايق و تلاقي نفسك في اخر مفرق تدخل دمياط ( و هتلاقي العساكر نايميين علي طول في الكمين و لا تطلع الطريق الدولي لاسكندرية ( بيعدي علي طريق المنصورة - دمياط الغربي )

يا ريت بقي بعد الطريق ده تدخل دمياط تنورناا
و نجبلك المشبك و الحلويات و بص علي اللسان في راس البر حيث يتلاقي الياه المالحة و النبل العذب و مذكورة في القران

و ممكن تغير رايك و تجين اوضه سفرة حلوة كده :lol: :lol:

اول ما تدخل دمياط علي طوووووووول لحد هتلاقي صنينة عديها علي طول هتلاقي نفسك راكب طريق راس البر

احسن حلويات في دمياط كلها
اخوان البدري ( لازم تدوق مشبك من عندو ) و سعيد المساوي
احسن موبليات ( المهم الضميرررررررررر ) بس محمد شنشن ( شارع الجلاء ) كويس
احسن فنادق في راس البر ( السلام )
و طبعا تنورنا في الشاليه عندنا اي وقت ( او العشة زي ما بيسموها هناك عشان كانت زمان من اكياب )
احسن بلاج اسمو النخيل او شاطي المديرية ( شارع 1)


علي فكرة راس البر تقسيمها تحفه الشوراع ارقام و كل البكونات في راس البر تري البحر!!!!!
ابقوا تعالوا زورونا :D: :D:

يا رب اكون افتكم

any news about luxor and aswan

انت مبدع اوى ف افكارك يا حسام الف شكر ع الاضافه القويه للمنتدى الحبيب

انت مبدع اوى ف افكارك يا حسام الف شكر ع الاضافه القويه للمنتدى الحبيب , وشكرا ل "مودوكس" , لسه راجع من راس البر , الوصف بتاعه صادق جدا فى كل حرف والله ينور عليه

على قد ما اعرف هقول.

نصيحتى للى عاوز يروح الأقصر و أسوان انه يستخدم الفنادق العائمة، يعنى مايروحش يقيم فى كل مدينة شوية، الفنادق العائمة كتير و متنوعة الأسعار و الفئات و الأفضل تروح فى الشتاء و الأوقات اللى تلاقى اسعار و امكانية حجز احسن فى الفترات من اول ديسمبر - 22 ديسمبر و من 10 يناير لغاية اخر يناير و لو هتسافر بقطر النوم هتوفر كتير من تزكرة الطيران و كمان بتبقى تجربة حلوة.

الرحلة بتاخد 4 ليال 5 ايام من الأقصر لأسوان و 3 ليال 4 ايام لو من أسوان للأقصر و بتقف فى ادفو و كوم امبو معبد حورس اللى فى ادفو روعة فوق الوصف، الأقامة فى الفنادق العائمة بتبقى Full Board يعنى فطار و غدا و عشاء و المشروبات بتدفع حسب الأستهلاك و أغلب المراكب بتدخل المزارات فى السعر و بتبقى غالبا عبارة عن:

- الأقصر: البر الشرقى (معبد الأقصر و معبد الكرنك) + البر الغربى (وادى الملوك و وادى الملكات) و معبد حتشبسوت.
- كوم امبو: معبد مش فاكر اسمه
- ادفو: معبد حورس
- أسوان: السد العالى + المسلة الناقصة + جزيرة النباتات + جزيرة أغاخان + معبد فيلة

لو بقى مالكش فى سياحة الأثار يبقى جرب انك تقعد فى أسوان اسبوع و ابقى ادعيلى، بس حاول تعيش تجربة أسوان كواحد من البلد مش سائح، أسوان أحلى مكان تعيش فيه و أحلى ناس تعاشرهم و في كام فندق يناسبوا كل الميزانيات و أغلبهم نضيف.