استشارة فى نقص زيت الموتور

[toshipa]

عندى نقص فى زيت الموتور نوبير يعنى اظبط المقاس على اعلى شرطة واتابعه منذ ثلاث غيارات اجده ينقص بعد المشى لمسافة 500 كم وقبل كدة ببقى متابع المقاس بيبقى مظبوط وده طبعا بقيسه الصبح وبعد ذلك الااحظ ان الزيت ينقص تدريجيا حتى يصل عند التغيير الى اسفل شرطة
السيارة نوبيرا 2001 وعاملة 82 الف كم ومافيش ترشيحات نهائى لانى لسة مغير الجوانات عند ميكانيكى من فترة 4 شهور لهذا السبب ولم تكن هى السبب
رحت لعدد من المختصين واخرهم محمد عبده وهو بالمناسبة شاب مؤدب وخلوق ولم اجد حلا حيث اخبرنى بان يجب ان اذهب اليه لتغيير الزيت وان
يقوم بمتابعته اسبوعيا وهذا لااستطيع عمله لان بصراحة الورشة فى مكان بعيد عن سكنى والطريق له سوف يجعل بدلا من اصلاح الموتور ادخل على عفشة وكمان بتوع التوكتوك والميكروباس هناك المشى بالعافية ومن اسهل مايمكن تتخبط
المهم
هناك من قال لى من المكانيكية غيره اشترى نص تحتانى احسن استيراد
ومنهم من قال لى نعمل شنبر وهيتكلف 600 جم
وانا محتار لان واحد اخر قال العربيات دى ماينفعش فيها شنبر
ماهذه الحيرة ؟؟؟؟؟؟؟؟
هل امشى بيها حتى يجيب اخره علما بان السيارة لايوجد بها دخنة ولا تغبب بالدوارة والسحب جميل فى المطالع والعيب الوحيد هو نقصان الزيت
فما الحل ؟
ارجو اسمع راى الاخ ممدوح والاخ سمير حيث انهم لديهم خبرة فى الديو

يرجى من العضو اختيار عنوان مناسب لموضوعة

مشرف القسم

[MMamdouh]

انت بتستعمل زيت ايه و بتغيرة كل قد ايه؟

عملت اختبار كبس للعربية؟

MMamdouh

[samirayad]

لو بتستخدم زيت تخليقى زى موبيل وان ....أو شيل ألترا بلس ........غير لزيت معدنى زى الxhp ......وياريت برضه تقيس نسبة كبس المحرك.......علشان تجزم التفويت من الشنبر ولا من الصبابات...................وده بيبا ن مع أختبار الكبس الصح.....وطبعا أنا ميال أن التفويت عندك من الشنبر (بس الأختبار أفضل برضه )

[toshipa]

شكرا جزيلا على الرد
انا كنت بستعمل موبيل اللى بيتغير كل 3000 كم ولما لقيته بينقص غيرت لنوع كل 2000 كم واخر مرتين بتاع الزيت لما لقاه ناقص قاللى حط اسو وغيره على 1500 وبرده بلاقيه ناقص عند الغيار
ارجو النصيحة
وكذلك هل الشنبر ولا العمرة ولا النص اللى تحت اللى فيه البساتم
ولا اصبر لغاية مايدخن خالص
مع جزيل الشكر لجميع الاخوة الاخ محمد ممدوح والاخ سمير

[samirayad]

أعمل الأختبار ده فى مكان صح ......وبعد كده قولنا على النتيجه علشان نعرف الخطوه الجايه............................................ ..........http://www.nilemotors.net/Nile/showthread.php?t=65410

[toshipa]

الاخوة الافاضل
حاولت ان اجرب السحب والتسارع وخصوصا بعد ماقالولى ان الموتور بياكل زيت
وجدت التانى بيجيب 85 كم والثالث بجيب 120كم ولسة rbm فيه يجيب ووصلت للرابع 140 وممكن كان يجيب اكثر ولكن الطريق الدائرى حالته لاتسمح
عموما انا مابحبش الجرى وبمشى ملتزم ولكن كانت على سبيل التجربه فقط
وهنا السؤال
هل لو المتور خفيف وبياكل زيت له علاقة بالسحب والتجميع علما ان السيارة فى المطالع زى مابسمع سحبها عادى وقوى

وحاولت اعرف علاقة rbm مع الكيلو متر
وجدت الاتى
الغيار التانى
30 كم =3000 على rbm
الغيار التالت
60 كم=3000
الغيار الرابع
90كم = 3000
الغيار الخامس
100كم=2500
ارجو الرد

[samirayad]

هل لو المتور خفيف وبياكل زيت له علاقة بالسحب والتجميع علما ان السيارة فى المطالع زى مابسمع سحبها عادى وقوى

لازم الأول تعرف الموتور بيأكل زيت منين ......لأن واضح أن الحبك بتاع الغرف عندك كويس......واكيد فيه سبب غير واضح لأستهلاك الزيت ومالوش علاقه بحبك غرف الحريق....وكده الموتور كويس ومش خفيف (وموضوع أستهلاك الزيت ده ....ممكن يكون بسبب خارجى زى سيلات الكرنك ....أو تفويت خفيف جدا من سيلات الصبابات لغرف الحريق أثناء حركة البلوف لأسفل فى شوط الفتح لها من حول ساق الصباب.....يعنى تسييل خفيف على سوق الصبابات الى الغرف )

[toshipa]

شكرا للمهندس سمير على الرد
ولكن نزلت فى البنزينة تحت السيارة ووجدت ترشيح زيت فى الناحية الشمال فقط اما ناحية الفتيس لايوجد اى ترشيح فى هذا الجنب
والترشيح من الجنب الاخر فقط من تحت ولا يوجد فى هذا المكان الا طرمبة المياة والدينمو
فمن اين هذا الترشيح ؟؟؟؟؟؟؟؟؟؟؟؟؟؟؟

[samirayad]

فمن اين هذا الترشيح ؟؟؟؟؟؟؟؟؟؟؟؟؟؟؟

أزاى ....فيه عندك سيل الكرنك الأمامى فى الحته دى....ولو كشف أسفل حافظة سير الكاتينه حتلاقى تحتها زيت (وأكيد فيه جوه الحافظه كمان زيت )

[toshipa]

شكرا جزيلا للمهندس سمير على سرعة الرد
وهذه معلومة قيمة لم اكن اعرفها ان فيه فى النوبيرا مكان يجيب زيت فى هذا الجنب
اذن سوف يكون هذا هو السبب فى نقصان الزيت
وخصوصا انى فى خلال الشهر الماضى غسلت الموتور من فوق ومن تحت بالجاز فى البنزينة وبرغم ذلك يوجد ترشيح فى هذا الجنب فقط
واريد معرفة العلاج واين وتكلفته
ولا اتركه لغاية مايزيد علما بانى من الذين يتابعون الزيت والمياة وودنى مع العربية

[samirayad]

هو ميعاد تغيير سير الكاتينه عندك أمتى..............وبالمناسبه برضه عندنا تروس الكامه ليها سيلات برضه من فوق ...ممكن تكون هى السبب برضه (لأنها خارجه من حوض التاكيهات وداخل الحافظه زى ترس مشرشر الكرنك بالظبط )

[toshipa]

سير الكاتينة عامل 26 الف مغيره من ثلاث سنوات تقريبا
وكنت منتظر عند 30الف اغيره بعنى بعد 4 شهور لانى متوسط استهلاكى فى الشهر 1000 كم فقط واحيانا لايتعدى الالف كم
ارجو بخبرتكم ماهو المطلوب عمله لان العربية مش ممكن تجيب موتور وهى عاملة 82 الف كم وخصوصا انى بمشى مابقرص عليها ولايركبها احد غيرى فهذا ماتعودت عليه من زمن لااترك سيارتى نهائيا لغيرى حتى ولو كان اخى

[samirayad]

عامة ....الموضوع حسب معدل نقصان الزيت .....لو كتير توكل على الله .....وظبط الموضوع كله وغير السير بالمره وخلاص والصراحه أنصحك تعمل كده على طول ...لأن الزيت وهو ساخن ليه تأثير مش كويس على السير .....ويمكن ربنا عمل كده(واتكلمنا أنا وأنت مع بعض ) علشان بيحبك تفاديا لأى شىء وحش لاقدر الله(واكشف على السيلات التلاته ...أثنين كامه + 1 كرنك )

[samirayad]

هل معنى كده لازم ميكانيكى يكشف وينضف البوابات دى

ده سبب تحويلى للموضوع ده

علما بانه قد سبق وطرحت موضوع نقصان الزيت بها واجاب الاخوة عن علاج ذلك

ياعنى يا أخى الفاضل (وطبعا هو الأخ

toshipa
عضو جديد

)..والموضوع اللى أتكلمت معاك فيه ....لأن ده وضع وده وضع تانى .....................وربنا يوفقك

[toshipa]

لو بتستخدم زيت تخليقى زى موبيل وان ....أو شيل ألترا بلس ........غير لزيت معدنى زى الxhp ......وياريت برضه تقيس نسبة كبس المحرك.......علشان تجزم التفويت من الشنبر ولا من الصبابات...................وده بيبا ن مع أختبار الكبس الصح.....وطبعا أنا ميال أن التفويت عندك من الشنبر (بس الأختبار أفضل برضه )

قمت اليوم بقياس كبس المحرك وفى التقرير اعطانى هذه الارقام ولا ادرى اذا كان الموتور كده كويس ولا ايه
وهى البيجوه رقم 1 dry psi مكتوب 140 وتحته مكتوب wet psi 152
رقم 2 150 162
رقم 3 140 152
رقم 4 150 162
مامعنى هذه الارقام وماهى حالة الموتور