لغز بولو 2001

[أبو_حمزة]

يمكن العنوان غريب بعض الشئ لكن بالفعل أنا محتاج لتفسير للى لاحظته عن العربية دى.

أولا انا مش من ملاكها لكن كنت ابحث عن واحده بحالة ممتازة عشان زوجتى.

فى البداية حصرت بحثى فى الفيات بونتو وبعد كده حد نصحنى انى اشوف بولو2000\2001 كويسه و قال لى فيها شعر. المهم انا وسعت دائرة البحث لتشمل بولو و بونتو.

اسف للمقدمة الطويلة بس التفاصيل دى عشان اوضح انا وصلت للحيرة دى ازاى

اللغز اللى مش فاهمه هو ليه الطلب الشديد على العربية دى. العربية سوقها ماشى بدرجة غير عادية و الطلب عليها كبير مع انها فى رأيي (و بلاش حد يزعل) ما تستاهلش.

انا اتفرجت على ما لا يقل عن 5 بولو و حوالى 7 بونتو كلهم حالتهم بين الجيد جدا و الممتاز.

أهم ملاحظة فى البولو هى الصالون. صحيح التابلوه شكله جميل لكن خامات الصالون كله (ابواب و كراسى و تابلوه) رخيصه وضعيفه و ده بدون مبالغه. مفيش عربية شوفتها حتى اللى عامله أقل من 60 ألف الا و فرش الابواب مشقق و مش ثابت. غير ملاحظات تانية.

الحاجة اللى عجبتنى فيها هى شكل التابلوه و كمان المساعد اللى بيفتح غطا الكابوت وبس

طب نقارن مع بونتو 2001 حته حته

السعر: لنفس عدد الكيلومتر البونتو ارخص 2000-4000

قطع الغيار: بونتو ارخص و بولو حاجتها غاليه جداا. الاتنين حاجتهم موجودة.

الوكيل: وكيلين مش كويسين بس فيات افضل شويتين. يتميز فولكس بوجود مراكز متخصصة فاهمين كويس

الموتور: بولو موتور ضعيف جدا. بونتو موتور أقوى و سحب لا يمكن مقارنته مع بولو.

التكييف: بونتو اقوى و الموتور قادر على الحمل بتاعه. عكس بولو اللى التكييف بيقتلها.

استهلاك الوقود: رغم ان موتور بولو اصغر و اضعف لكن الاستهلاك واحد تقريب و ممكن بونتو تكون افضل.

العفشة: بيقولوا عفشة بولو افضل لكن بالتجربة لم اشعر بفرق

الثبات: فرق يكاد لا يحس لصالح بولو. مع ملاحظة ان بونتو ثباتها جيد جدااا.

الدهان الخارجى: بولو دهان عيان و الالوان الغامقة يبان فيها انو باهت من عوامل الزمن.

الشكل: بونتو اجمل فى رايي

الصالون: خامات البونتو انضف 100 مرة. مفيش بونتو شوفت ابوابها مبهدله أو كراسى مش ثابته مهما كان الكيلومتر عالى بعكس بولو. كمان صالون بونتو تحسه اوسع شوية. بس تابلوه بونتو مش جميل نهائى

الكماليات: بونتو تزيد سيتى باور و سنتر و زجاج كهربا امامى.

المقارنة بالنسبة لى واضح نتيجتها. لكن يظل وضع السوق ان بولو افضل مبيعا.

يا ريت حد يوضح لى ايه اللى غايب عنى لانى خلاص على وشك انى اخد القرار بالتركيز فى بحثى على بونتو.

[M.Mostafa80]

مع احترامى لأرائك أن حضرتك كدا شفت عربيات بولو كنب مش حاله جيده لكن لو شفت عربيه واحده نضيفه ومظبوطه مش هتحس بالى حضرتك قلت عليه أنا معايا 98وعربيه زى الفل وعايز أقول لحضرتك أن التكييف له تأثير على كل السيارات وخصوصا أن موتورها 1000 مع أنى عندى معالج الموضوع ده ومبحسيش بيها غير فى الطلعات بس دور كويس على البولو مش عشان عربيتى لأ العربيه دى فعلا محترمه

[eltorky]

بصراحة أنا شايف أن البونتو فعلا أحلي بس ناس كتير قاليتلي ان قطع غيارها غالية و مش أي حد بيعرف يشتغل فيها لان صيانتها معقدة شوية و الله أعلم بس ممكن حضرتك توضحلي أية هو السيتي باور داة و أية الفرق مابينة و بين الباور العادي و ربنا يوفقق و تلاقي واحدة كويسة بس أبقي عارفنا جبتها بكام لان أنا برضو كنت بفكر أجيب واحدة بس النقتتين الي قولتلك عالهم هما الي قالقيني منها و الله الموفق

[أبو_حمزة]

مع احترامى لأرائك أن حضرتك كدا شفت عربيات بولو كنب مش حاله جيده لكن لو شفت عربيه واحده نضيفه ومظبوطه مش هتحس بالى حضرتك قلت عليه أنا معايا 98وعربيه زى الفل وعايز أقول لحضرتك أن التكييف له تأثير على كل السيارات وخصوصا أن موتورها 1000 مع أنى عندى معالج الموضوع ده ومبحسيش بيها غير فى الطلعات بس دور كويس على البولو مش عشان عربيتى لأ العربيه دى فعلا محترمه

الاختلاف فى الرأى لا يفسد للود قضية
بولو 98 و 99 خامات الصالون افضل من 2000 و 2001 ومع انهم نفس الموتور و العفشة و الاختلافات شكلية مع اختلافات فى المكونات الكهربائية الا ان الفرق فى سهولة البيع و السعر غريب
مش بقول لكم لغز
يعنى لو بولو 99 عاملة 100 ألف و اختها 2000 عاملة نفس الكيلومتر. ومع ان 99 حالة صالونها احسن و تزيد سنتر و زجاج كهربا اصلى. فرق السعر لن يقل عن 6000 لصالح ال2000.

و على فكرة العربيات اللى شوفتها مش كنب و كانت كلها حالات مميزة حتى برأى خبراء فولكس اللى شافوها بالاضافة لخبرتى المتواضعة فى السيارات عامة. و كلهم اتباعوا هوا و بأسعار مبالغ فيها (فى رأيي).

[أبو_حمزة]

بصراحة أنا شايف أن البونتو فعلا أحلي بس ناس كتير قاليتلي ان قطع غيارها غالية و مش أي حد بيعرف يشتغل فيها لان صيانتها معقدة شوية و الله أعلم بس ممكن حضرتك توضحلي أية هو السيتي باور داة و أية الفرق مابينة و بين الباور العادي و ربنا يوفقق و تلاقي واحدة كويسة بس أبقي عارفنا جبتها بكام لان أنا برضو كنت بفكر أجيب واحدة بس النقتتين الي قولتلك عالهم هما الي قالقيني منها و الله الموفق

اسعار قطع الغيار غالية لو قارنتها بشاهين. اما لو قارنتها ب بولو فهى معقولة جدا و تقريب نفس العمر الافتراضى.
مشكلة الصيانه و ان مش اى حد يفهم فيها دى سمعتها برضه. و بولو نفس المشكلة (أو فولكس عامة). بس اعتقد توكيل فيات ممكن لتعامل معاه. لكن طبعا فولكس فى اكتر من مركز صيانه فاهمين فيها كويس.
سيتى باور هو زر بالضغط عليه بيكون الدركسيون سلس جدا. يعنى هى اصلا دركسيون خفيف ومع استخدامه بيبقى اخف دركسيون ممكن تتعامل معاه و ده لذيذ فى الركن.

[NaderNabil]

لدي بعض الخبرة و التجارب بالبولو 2001....
و أتفق معاك في جميع النقاط الخاصة بها...فعلاً كل ده انا لاحظته فيها...

[أبو_حمزة]

و استكمالا للغز و الحيرة
العربية الاسكودا فابيا. هى نفسها البولو و الصالون خاماته احسن شوية من بولو. و قطع الغيار ارخص حاجة بسيطة وفى حاجات هى نفسها (فلاتر و سيور نفسها) و الله أعلم. و الوكيل برضه مش كويس. لكن نفس المراكز اللى شغاله فولكس شغاله سكودا وبيفهموا فيها.
يعنى تقريبا نفس العربية فى كل حاجة و فرق السعر لنفس الحالة بين فابيا و بولو حوالى8000- 10000 لصالح بولو.
حد يقول لى حل الفزوره دى غير ان بولو موصوفه للى عنده هسس الالمانى
و بجد محدش يزعل من كلامى بس انا عايز افهم

[M.Mostafa80]

هسسس الله يكرمك ياسيدى بقلك أصرف نظرعن البولو وخليك فى البونتو .
هسس الألمانى دا حضرتك جاى من أحترام الناس دى لصناعتها وجودتها وأنا عن نفسى مشفتش الى سيادتك بتتكلم عليه دا فى البولو نهائى ومدام سيادتك شايف أن اللى بيتكلم عن الألمانى عندو هسس خلى حضرتك فى الأيطالى عشان ما يجليكش الهسس ده لأن لحد دلوقتى ملقيوش ليه علاج

[أبو_حمزة]

هسسس الله يكرمك ياسيدى بقلك أصرف نظرعن البولو وخليك فى البونتو .
هسس الألمانى دا حضرتك جاى من أحترام الناس دى لصناعتها وجودتها وأنا عن نفسى مشفتش الى سيادتك بتتكلم عليه دا فى البولو نهائى ومدام سيادتك شايف أن اللى بيتكلم عن الألمانى عندو هسس خلى حضرتك فى الأيطالى عشان ما يجليكش الهسس ده لأن لحد دلوقتى ملقيوش ليه علاج

اسف جدا و اعتذر ان كان كلامى اذاك. و صدقا لم اقصد اهانة اخ محترم.
برجاء قراءة كلامى فى اطار محاولة لفهم الخصائص الموجودة فى العربية و اللى سببت ان سعرها اعلى من قيمتها (ده من وجة نظرى).
و اكرر اسفى لسوء التعبير.

[M.Mostafa80]

هقول لحضرتك ليه هى سعرها أغلى من الأثنين الفابيا والبونتو
الفابيا بالرغم من أنها من نفس المصنع أو تحت نفس الأشراف ألا أنها فى الوقت دا كانت أول موديلتها وكانت نازله فيها مشاكل وعيوب غير موجوده فى منافستها البولودا غير التوكيل اللى كان مفترى أكثر من توكيل فولكس ودا خلى الناس تنصرف عن العربيه دى وسعر أعاده بيعها يبقى أقل من البولو وتعالى نشوف فى الشارع كام واحده فابيا وكام واحده بولو غير أن البولو أقتصاديه فى أستهلاك البنزين والحجم والشكل اللذيذ الى حبب الناس فيها وخصتا الشباب والنساء وبالغم أنى مش مقتنع بموضوع الخامات ده لأن ممكن قوى تلاقى أغلب الناس غير معتنين بيها وبسبب عدم الأعتناء ده ممكن يكون حصل اللى حضرتك بتقول عليه وخصتا أستخدام النساء أنا كانت العربيه اللى معايا بتاعت وحده ست مع أحترامى للستات بيركبو خلاص ومبيهتموش بيها كان نفسى حضرتك تشوفها سعتها وتشوفها دلوقتى فرق شاسع
أما البونتو مقدرش أقول عليها حاجه لأنها ربيه من مصنع عريق ومحترم زيو زى الفولكس فاجن بس سامحنى بحس أنهم فى تكنولوجيا الحديثه ضعاف شويه يمكن هما اتطورو بعد كدا لكن فى الوقت دا معتقدش وأكبر دليل البونتو كلاسيك والجراند بونتو
العربيه البولو دى بجد غريبه ساعات تحس انها بنى أدام وانها ساعات بتحسك يعنى فى طريقه قيادتك ليها هى بتأقلم نفسها لو حسيت منك أنك مستعجل أو سواقه رياضيه بتلاقيها تتجاوب معاك ولو هادى تلاقيها هاديه ثبات لا غبار على ثبات الألمانى عموما أنا جريت كتير بالعربيه دى وعايز أقولك أنى كل ما بجرى بحس أنها بتكلبش فى الأرض بالرغم أنى كنت راكب قبلها عربيه محترمه فى الثبات اللى هى فورد أسكورت وعمتا اللى يريح حضرتك غير اللى يريح الأخرين وصدقنى فعلا هى دى قيمه العربيه دى

[nab!l]

انا معاك فى كل كلمة فى اللى قلتها عن البولو يا صباغ وانا عن نفسى ركبتها كتير موديل 99 معجبنيش فيها غير انها ثابته بالنسبه لحجمها غير كده مفيش مزايا
وبعدين ياعم ميمو ميرو انت متعصب جدا للبولو
صدقنى هى متستاهلش كل ده منك وبعدين انت محسسنى ان الصباغ غلط فيك شخصيا
وبعدين ايه البولو ؟ ؟؟؟؟؟؟؟
اقولك ايه البولو المصريين لما بيهجمو على حاجة مش بيسيبوها وارجع معايا يالزاكره شويه لايام البيجو 504 والفيات 128 وصولا لايام الانسر والبولو
هى دى بقى ايام الانسر والبولو
بس لانسر فى اسباب كتير لعشقها
لكن البولو !!!!!!!!

[M.Mostafa80]

نو كمنت مش هعلق على كلامك أنا لا متعصب ولا ديولو ركز فى الكلام كويس وشوفو كويس وبعدين أبقى أتكلم والراجل أعتذر ودى حاجه بينى وبينو وكل واحد دماغو مكفياه ومريحاه وأنا عندى هسس الألمانى وسلملى على الانسر الى بتشفطها العربيات النقل وتركبها المرجيحه لما تعدى من جنب منها

[أبو_حمزة]

خلونا موضوعيين يا اخوانى.
انا حطيت الموضوع فى صفحة فولكس عشان الناس اللى لهم تجربة مع بولو (2000/2001) تفيدنى. أنا مش حاطط الموضوع بغرض الهجوم لا على البولو و لا على شخص ملاك البولو. العبد لله زى ما قلت بيدور على عربية فى فئة معينة و اللى بولو ضمن هذه الفئة. و من خلال تجربة البحث عرضت ملاحظاتى
يعنى من الاخر طالب مساعدتكم بالتجربة أو الرأى سواء بتعزيز وجهة النظر اللى وصلت لها أو بنفيها بشكل موضوعى.

و استخدامى للفظ هسس (بمعنى هوس) جاى برضه من واقع. و زى ما ناس عندها هوس بالالمانى فى ناس عندها هوس يابانى. بدليل مقولة ان فاتك اليابانى....
امتلاكى لعربية يابانى (لانسر99) لايعنى انى منحاز ليها ولا شايفها احسن عربية فى الدنيا. انما يعنى انى ساعت ما اشتريتها شوفتها انسب حاجة ليا فى حدود امكانياتى. و برضة لو ربنا أكرمنى و بقيت من ملاك الالمانى هتكون ليا نفس وجهة النظر.
كل عربية لها ميزات و عيوب. انا عرضت عيوب شوفتها. و لما اقول ان عربية لا تستحق سعرها لا يجب ان يشكل هذا الكلام اهانة لمن يملكها. زى ما وصف لانسر بانها بتركب المرجيحة لا اعتبره اهانة بالمرة.

تانى بقول انا طالب مساعدتكم بالتجربة و الرأى بعيد عن معركة الالمانى واليابانى و الكورى ...

[M.Mostafa80]

أخى الكريم أنا مكنتش داخل معارك ولا حاجه وزى حضرتك ماقولت وجهه نظر أنا قولت وجهه نظر وك منا تحترم وجهه نظره لكن الأخ الكريم اللى وصفنى بالتعصب مع أنى فى ردى عليك الأخير مكنتش متعصب ولا حاجه وأتكلمت عن الفابيا بكلام واقعى ومنطقى ومتداول بين الجميع وأوضحت رأى فى البولو وأيضا البونتو التى لم أعيب فيها كى يقول زميلنا العزيز أنى متعصب وبعدين هو للأسف قارن الانسر بالبولو
الأثنين لا يجوز بينهم المقارنه دى فئه ودى فئه أما موضوع الثبات ووصفى ليها بالمرجيحه دى حقيقه وليس وهم وكلامى كان بناء على تجربه لأنى كان لى زميل يمتلك سياره لانس 99 وحدث وأن سافرنا بيها مطروح وذلك من خلال قيادتى أنا لمعرفتى بالطريق وأذا بى ألاحظ ان السياره بمجرد المرور بجوار سياره نقل كأنى مررت بجوار شفاط قوى عكس ما يحدث معى تماما فى سيارتى فكلامى بناء على تجربه وليس تعصب أو هيما بحب البولو والألمانى لكن هناك حقائق لا يمكن أن تتغير وتقبل مرورى وأدعو لك بأن يوفقك الله لما تحبه وترضاه

[nab!l]

زميلى العزيز مصطفى
واحد صاحبى معاه بولو 99 وفى الشغل بيركب لانسر بومه
وهو بنفسه قاللى ان ثبات الانسر احسن كتيييييييييييييييير
بس
مش هقول كلام تانى وثبات البولو تمااااام بالنسبه لحجمها
بالنسبه لحجمها