اشهد ان الا اله الا الله وحسبى الله ونعم والوكيل
من حوالى 3 او 4 ايام كان فى خبر فى الجرنال مفاده ان وزير الداخليه وقيادات المرور طالبوا بضرور الشد على المخالفين اللى بيتسببوا فى ازدحام الشوارع ( وطبعا كالعاده مافيش شئ هيتغير غير لم اكتر للمخالفات )
لكن هتفضل ازمه اختناق الشوارع موجوده وبالعكس بتزيد كل يوم
اللى فكرنى بالموضوع ده
انى تقريبا كل يوم بمر بالشوارع من الجيزه الى اخر مصر الجديده ذهابا وايابا ولقيت سبب مهم جدا للازمه اللى بتسبب اختناقات مروريه فظيعه ( واعتقد من انا لواحدى اللى اخد باله )
هو اليوترن اللى انتشر بسرعه فى كل شوارع البلد بطريقه ابعد ماتكون عن تنظيم مرور بالعكس بعتقد انه اتوجد علشان يعمل ازمات تتعبنا كلنا بدون استثناء ضيق اليوترن وطريقه تصميمه للخروج منه على الشارع مصيبه مابعدها مصيبه شوفوا مثلا اليوترن اللى موجود فى الكورنيش امام معهد ناصر وشوفوا الاختناق الفظيع اللى عامله فى الاتجاهين وده للان البيه اللى صممه ( دا اذا كان فى تصميم من اصله ) عامل الخروج من اليوترن عمودى على الشارع وبالتالى اى عربيه بتلف هتوقف الشارع ضيف عليه عدم الاحترام لبعضنا ولا عدم وجود صبر وذوق وتخيلوا الشارع بيبقى ازاى انا بتشاهد على روحى كل مااعدى اليوترن ده
نموذج تانى من اليوترن الغبى موجود امام فندق شهرزاد للى جاى من العجوزه وعاوز ياخد الملف للرجوع الى الكيت كات لعنه الله على اللى صممه نموذج تالت اليوترنات اللى معموله فى شارع شهاب بالمهندسين مااروعها فى قفل الشارع بطوله شارع لا يتجاوز عرضه ال10 متر تخيلوا بقى اليوترن هيعمل ايه فى الشارع فى مساحه ضيقه مع وجود ركن صف اول وتانى ومشاء الله عاوز 5 دقايق بين شتيمه وكلاكسات من الاخرين وانت بتحاول تلف
اليوترن اللى موجود على اول طريق السويس للى جاى من مدينه نصر وعاوز يلف علشان يدخل مصر الجديده
والامثله لاحصر لها على طول البلد
اعتقد ده سببه انفراد الشرطه بعمل اليوترنات بدون الرجوع لمهندسين متخصصين فى تخطيط الشوارع اللى اصبح علم كبير لغايه امتى هنفضل معتمدين على ناس لا تفهم الا فى القانون فى رسم الشوارع والميادين ليه هما مش شايفين اللى بيعملوه وسوء تخطيطهم ودايما السواقين هما اللى غلطانين فقط اى نعم فى نسبه كبيره من السائقين تتحمل سؤء الحاله المروريه فى البد بس برضوا كمان سوء التخطيط فى راى بيتحمل نسبه فظيع من الازمات المروريه فى البلد
وعاوز تشوفوا بجد المسخره فى التخطيط روحوا وحاولوا تعدوا تقاطع شارع بورسعيد وشارع السواح منتهى منتهى المسخره اللى فى الدنيا لو كان فى الصومال اللى ماعندهاش تقربيا اى امكانيات ماكان حد صمم القاطع بالمنظر ده
اكتر من اكتر من سبع اتجاهات فى اشاره واحده وكله سايح على بعضه
والله والله لو فى حد ممكن الواحد يروح يشتكى ليه لكنت اول الناس اللى تروح له لكن للاسف محدش بيفهم غير الشرطه ومحدش هيخطط غير الشرطه ومافيش شئ هيتغير وعلشان كده الواحد بقى حاطط فى دماغه انه ممكن يخرج مايرجعش تانى
وحسبان الله ونعم الوكيل