السلام عليكم و رحمة الله و بركاته
الحقيقه يا جماعة من زمان وانا بسأل عن الاسبريانزا و بسأل عن عيوبها قبل مميزاتها
أول واحد سألته
جاري في العمارة جاب سبيرانزا 2007 وكان رأيه فيها انها ممتازه وقلت له عاوز اجيبها ايه رايك قال هاتها على ضمانتي لاكن العيب الوحيد اللى قاله فيها ان في صوت طقطقه خفيفه في المطبات الشديده والعربيه بقالها معاه حوالي سنه ولسه ما اشكاش اي شكوى تانيه
ثاني واحد سألته
زميلي في الشغل وهو بيفهم في العربيات كويس و على كلامه سأل كتير قبل ما يشتريها و سأل في التوكيل وكان رأي اللي سألهم كان إيجابي جدا ورأيه هو الشخصي بعد ما اشترها وقعدت معاه شهرين انها ممتازه جدا بس بردو كان بيقول انه في صوت طقطقه خفيفه في المطبات ولما سأل في التوكيل مهندس مختص و أكد لي انه مهندس مش فني قال له الصوت ده بسبب العفشه على صلايب ودي أقوى بس عيبها الصوت اللى بتسمعه ده وقال له عندك مثلا العربيات اللى بسير تقسيمه و العربيات للي بكاتينة تقسيمة العربيات اللى ليها سير تقسيمه صوت المتور بتاعها منخفض عن اللى بكاتينه لكن اللى بكاتينه أقوى وقل لي زميلي ايضا ( صاحب العربيه ) ان مشي بيها على 170 و مطبات الهوا ما كانش بيحس بيها زي عربيتي القديمه ( لانوس مو 2000 ) و التكييف بتاعها ممتاز جدا وكانت تجربة التكييف في شهر 9 وقال ان التكييف ما بيأثرش على سحب العربيه
ثالث حد سألته
كانت الناس في الشوارع وكلهم نفو العيوب اللى بتتقال على العربيه دي و الناس وفي ناس كتير فعلا اكدو لي حكاية انهم مشيو بيها على 180 وانها متوازنه جدا وكل اللي سألتهم في الشوارع نصحوني اني اجبها
رابع حد سألته هو هنا في هذا المنتدى ده المكان الوحيد اللي لقيت الناس بتشتم في العربيه دي
فأصبح هناك سؤال العربيه دي وحشه ولا حلوه طيب لو كانت وحشه ليه نسبة المبيعات بتاعتها بترتفع مش بتنخفض.
أنا أسف اني طولت عليكو بس انا حبيت اوضح للي عاوز يشتري العربيه دي موقف الناس اللى مجرباها ايه
وأخيرا أحب اني اقسم لكم على صدق نقلي رأي الناس
أقسم بالله العظيم إني نقلت لكم رأي كل من سألته من مالكي هذه السيارة بكل صدق