باشا ايه مشكلة علبة الدركسيون معاك
ايه وظيفة pc valve وايه المشكلة الى بيعملها معاك لما باظ معلش هطول عليك تكنوسرفس ده فين انا ساكن فى المعادى اقرب توكيل ممكن اشترى منه الحاجة فين
عرض للطباعة
باشا ايه مشكلة علبة الدركسيون معاك
ايه وظيفة pc valve وايه المشكلة الى بيعملها معاك لما باظ معلش هطول عليك تكنوسرفس ده فين انا ساكن فى المعادى اقرب توكيل ممكن اشترى منه الحاجة فين
مشكلة علبة الدريكسيون ان حتي وانا واقف تحود يمين و شمال تحس بخبطة او دربكة في الدريكسيون "حتي لو العربية واقفة"
ال pcv ده بيعالج بخر الزيت من المتور علشان مواصفات البيئة الاوروبية "قال يعني"
اللي كان بيحصل ان العربية بتبقي مدربكة في الدوارة و تطلع دخنة سودا و بعدين تظبط بعد دقيقة او دقتين....
تكنو سيرفيس في المنطقة الصناعية في جسر السويس جنب توكيل مرسيديس و هوندا و المصرية امام عمارات التوفيق
اللي اقرب للمعادي اعتقد توكيل ابو رواش
انا مقدرش .... اللي حصل اني رديت في tab تاني و مدوستش "اضف الرد السريع"
الزيت كان شيل الترا 10الاف....
كنت حاطه علي 51 الف كيلو و غيرته المره دي 68 الف
بس نازل طين
باشا تعرف سعر الزجاج الامامى كام بتاع الام ١١
على فكرة خمسة لتر كتير علشان كده سعات بنلاقى رشح عند الفاتحة الى بنحط منها الزيت من فوق الماتور وبتلاقى الموشر بتاع الزيت معدى العلامة والكتلوج بيقول ٤.٥ وانا بعد مده هحط ٤.٥ واجرب وهعايا النص الزياده وهشوف ايه الى هيحصل انا بحط شل على فكرة ولدنيا كويسه والخمد الله زى ماهيما بيعمل هههههههههه
بص انا حطيت 5 مع الفلتر .....
و المقاس مش معدي الماكس..... و بالنسبة لل 17 الف فا همه فعلا كتير .... و اعتقد 15 فعلا موز اللوز ....
لا حول ولا قوة الا بالله ....
يا اخوانا الواحد بقي بيحس ان بجد في ايام كدة شكلها بيبقي مش ولا بد ....
المهم .... نازل اخد العربية والعيال و امهم واطلع اضرب الباراشوت الكبير علي الحج ربنا يديه الصحة .....فوانا معدي من عند ضهر العربية لقيت في حاجة مش مظبوطة .... و بعد تركيز و تدقيق اكتشفت ان الكاميرا مش باينة ؟؟؟؟؟؟؟ :)
قلت جايز اتدفست كالعادة ..... اتاري واحد ابن حلال مصفي متفهموش كان جعان فكلها ولا ايه ... المهم بقت مبتجيبش الا ابيض بس ....
قلت يا واد عااااااااااادي خالص ..... فدايا
دخلت العربية ... و العيال ركبوا ... نسيت اقفل اللوك بتاع الازاز .... عمر بيه فتح الازاز و طلع نفسه من العربية .... جيت اقفل الازاز علشان مينطش قام السلك نطر من مكانه .....
انا بصراحه كنت بفكر اطلع استخبي في السرير بدل ما امشي و تولع بيا :)
المهم رحت عند بتاع البيبان فتح و ظبت السلك في مكان تاني و قفش 30 بلبل ....
فاضل الكاميرا ..... حدش يعرف في ابو كام الكاميرا دلوقت ؟؟؟؟؟؟؟
انا هحط بعد كده 4.5 وهشوف واسيب الباقى معايا واشوف مش هيحصل حاجة بس الكتالوج بيقول 4.5 مش عارف ليه كله بيقول 5 لتر مع انى بلاقى اول مبحط الزيط لمده 2000 كيلو تقريبا رشح من الفاتحة الى فوق وبعدها خلاص والمواشر بحس انه مخطى الماكس ودة مش صح الطبيعى ان اخر الواحد الماكس مش نغطى الماكس
الكاميرا بالرؤية الليلية ب 150 الي 175 في دمشق بمصر الجديدة .... 175 بالتركيب....
باش رحت علشان اركب حساسات ركن خلفى قالى لازم نفك الاكصدام ايه السبب وهل حضرتك لما جيت تركب الكاميرا الخلفىة فكو الاكصدام ولا لا
بيريح الاكصدام بس علشان يعدي السلوك ...
متنسوش ان الام 11 الحلية اللي علي الاكصدام الوراني بتتفك بالشد"كلبسات منها فيها و مبتتكسرش" و وراها مكان تعدي منه السلوك و ممكن تركب فيها الحساسات لو عايز ..... انا هيه دي اللي مركب فيها الكاميرا
هيما باشا هيا العربية مفيش فيها سماعات فى الخلف ليه والواحد لو عاوز يركب سماعات فى الخلف يعمل ايه هيخرم ولا ايه
مكله بيخرم ... ايه المشكلة ...
اما مفيش ليه ؟؟؟ فعلشان احنا بلد تييييت و العربية بتنزل برة فيها 8 سماعات منهم 2 ورا بس احنا بقي قال ايه بنوفر بالسماعات
:oops2:
اسمي محمد من المشاركين الجدد
عملت موضوع خاص لسيارة m11 و m12
اتمني من مالكي السيارة من موديل 2010 حتي 2014 سواء كان الشراء من الزيرو او مستعمل الدخول علي هذا الموضوع واضافت كافة المعلومات الايجابية والسلبية لكي تعم الفائدة وايضا يوجد استطلاع للموضوع الرجاء التصويت عليه
رابط الموضوع للمشاركة هو
http://www.nilemotors.net/Nile/400322-m11-m12.html
هيما ياريت اعرف الكود ده ايه فى العافشه m11-2203010va lh propler shaft
فعلا كوبلن
و ابقي ادخل هنا هتلاقي كله بالصور و الكود
CHERY AUTOMOBILE - A3 M11 AUTO PARTS DRIVE SHAFT ASSY-LH :: M11-2203010
بسم الله
الجلب .... لسة حلوة و لله الحمد .... بس برده عايز الطالعة الجاية اركب الكوري ... اكيد هتبقي اشد
التيل ...... زبالة .... صفافير وانت دايسفرامل و وانت مش دايس او ماشي علي السلانسيه.....مبيسكتش غير مع الجري..........ملناش بقي غير الاصلي ابو 220 و شوية و لله الامر ....
المساعدين موجودة عند الملك ب 600 الي 700 ... امامي و خلفي ...
موجودة في التوكيل امامي ب 1150 و خلفي ب 650 ...؟؟؟؟؟؟ بس تركب عندهم ......"بس لو ضغط جامد ممكن تاخدهم شرا... بس كلام في السر"
فانوس الشابورة الامامي عند الشيخ طه ب 80 جنيه الفردة
المراية الشمال في بكين ب 300 بس مبصتش علي شكلها اساسا
المراية الكوبي عند الملك ب 250 ...بس انا جبت منها قبل كده من زكي جرجس...بس كانت اخف حتي من بتاعت المللك .....و كسرتها بايدي من غير خبط ... فمتستهلش
المراية الشبه اصلي عند الشيخ طه ب 350 "معمولة اخت الاصلي بس اخف سنة صغيرة ... انما ناعمة جدا في الحركة و ماسكة نفسها و خاماتها جميلة بالاضافة انها مختوم علي كل اجزاءها علامات مراقبة جودة "
......
انا للاسف تاني ....لقيت زوجة حارس العمارة طلعالي بالمراية في ايديها و بتقولي ابن الحج هريدي بيقول لحضرتك احنا اسفين و اللي تأمر بيه ...
طبعا الزوق حلو فخلاص ...البس يا هيما و عوضك علي الله .....
قلت الصمها لحد ما اصلحها عند طارق اللي في الدقي حنب الشغل ....."ولد ممتاز و دماغه حلوة و مش حراق"
جيت وانا في مصر الجديدة لقيت واحد بيقولي تصلح يا باشا .... قلت اجرب ماهي بايظة بايظة .... طلع البعيد عيل تييييت عفيجي عفتجي كوفتجي و عمل قفلة في زرار المراية و ضرب الاتجاه بتاع فوق و تحت ....
المهم شاء ربنا اني بسبب البيه اتعرفت علي صنايعي كهربا في الجون .... اسمه محمد في تقاطع دمشق مع شارع ابراهيم .... في الميدان بتاع محل بيكين...
محمد ربنا يباركله و مع اني رايح متأخر .... فك التابلوه ... و فك زرار المرايات .... عمل كوبري بدل الخط اللي طار من القفلة .... غيرلي قلب الولاعة ... غيرلي لمبة شبورة ... غيرلي لمبتين ستوب ... و قفلي المراية علي يمين وشمال بس بدل ما تضرب تاني الزرار ولا حاجة
فضل شغال مش اقل من ساعة و نص .... و طلب غير اسعار قطع الغيار 15 جنيه فقط لا غير .... طبعا ربنا كرمه بزيادة علشان ...
1 بيفهم
2 بيسمع قبل ما يشتغل
3 مش بيستسعل
4 مش بيستقوي ولا يتعافي
الراجل و مع انها اول مرة يشوف العربية .... فك و صلح و ركب من غير ما يكسر ولا كلبس ... و قفل علي ابوه
المهم ... اشتريت انا المراية من الشيخ طه ب 350 ... و ركبتها .... فعلا حلوة ..... جاري التجربة و نوافيكم بالمستجدات ان شاء الله .
ان شاء الله بعد بكرة الاثنين هغير الكاميرا ... و نبقي نعمل معاد لعلبة الدريكسيون ....
انت تأمر :)
معلش يا هيما، هو محمد ده في الشارع ولا ليه محل ولا ايه نظامه عشان محتاج كهربائي بيفهم في السبيرانزا
محمد ليه محل اكسسوارات و تركيبها ....هجيبلكم تليفونه و عنوانه ان شاء الله
ربنا يباركلك
متابع
هيما باشا نبرة صوت الاشارة بقى غريب ولو مش مركب الحزام صوت الحزام غريب ومكتوم مش كارف ليه ايه رايك وهو فين علبة الفيوزات فى التابلوه الى فى الام 11
علبة الفيوزات تحت شمال امام ركبة السائق الشمال
عليها غطا فبر بمسمارين
السلام عليكم
ازيكم يا رجاله
الحمد لله ربني كرمني بعربيه اسبيرانزا M11
و الحمد لله حاله نضيفة
العربيه موديل 2010 و كانت مرفوعه 3 سنين
طبعا انا حوار الرفع و الخفض ده مش بيدخل دماغي
روحت بيها امبارح كشفت عليها كشف الملكين
روحت مركز زيوت وولف
الناس هناك فاهمه قوي قوي قوي..قلت ليه عايز من الاخر اعرف و اكشف على كل حاجة
هي اصلا كانت عامله 13200 كم بالظبط
الحمد لله طلعت فعلا مرفوعه
غيرت زيت هناك
محتاجة على الاقل فردتين كاوتش عشان القديم مع انه لسه بالنقشه بتاعته بس شقق
السيور مش بطاله المهندس هناك قالي ممكن تمشي عليهم و تغيرهم كمان 6 شهور ولا حاجه
العفشه بقى:عايزة بارات جديدة لان القديمة اللي فيها صديت و بوشت من الركنه و مش هينفع فيها رباط
كف المرايا كان تقريبا اتكسر من صاحبها و مركب كف معفن كده عايز اغيره
العربيه ما شاء الله في المجمل تحفه بجد
ملفته جدا لاي حد يشوفها
ربنا يرزقنا خيرها و يكفينا شرها و شر كل حاسد يا رب و عربياتنا كلنا
احب اشكر الاول الباشا هيما
انا صدعته اخر يومين بس بجد اخ و اتصل بيا سال عليا امبارح
ربنا يجازيه خير يا رب
انا بقى عايز منكم طلب صغير
منين اشتري حاجات عفشه ليها بس يكون مضمون و مش حرامي
مين العفشجي اللي نوعا ما بيفهم فيها و يكون قريب من اكتوبر او مدينه نصر او حدائق القبه او الزيتون (شفتوا منتشر انا في كل حته :C_laugh[1]: )
واحد عنده اكسسوارات عشان اشتري منه كف المرايا ده و مين بردو اللي بيفهم عشان يركبها لانها مش ناقصه عك مع حد
و ربنا يبارك ليكو جميعا في ركوبتكم
بقيت حاسس ان العفشة سايبة مش عارف اربط العفشة ولا ايه رايك ياباشا
السلام عليكم
ازيكم يا شباب
اخباركم ايه
الحمد لله ربنا اكرمني و رحت مركز المتحدة اللي على الدائري
بجد ده اكتر مكان انا ارتحت فيه و للناس اللي فيه
تحس ان فيه نظام كده مش كفته
كل واحد هناك عارف هو بيعمل ايه و ازاي
اكتر ميزة عجبتني ان اي صيانه العربيه تحتاجها هتلاقيها هناك..حتى قطع الغيار
يعني من الاخر انت اكنك في مصنع عربيات
و الناس هناك ودوده قوي و بجد ارتحت معهم و هم بجد والله ناس محترمه
اخص بالذكر الاستاذ محمود و الطقم الفني كله حسين و وائل تحس انهم ولاد بلد و جدعان معاك مش ناس بتعمل شغل و بس
ربنا يوسع عليهم و يا رب و يكبروا المكان بتاعهم كمان و كمان
اللي اتعمل في العربية بحكم انها طبعا كانت مرفوعه فترة طويله
تيش علبه الدريكسيون كان سايب و كبسناه
تربيط عفشه كامله بعد كده
تغيير بلي العجل الامامي
تغيير كف مرايا
رجلاش فرامل خلفيه
ظبط فبرة الكلاكس
كشف تاني بالكمبيوتر على العربيه كامله و ملاحظة عامه عليها لتدارك اي حاجات في المستقبل ان شاء الله
في النهايه مش هقولهم الا ربنا يجزيكم خير بظهر الغيب
هيما باشا ايه احسن تيل فرامل راكبته
الف مبروك يا باشا وربنا يباركلك فيها ويكفيك شرها بس سؤال اشترتها بكام علشان ليا صديق بيدور على واحدة وسؤال تانى معلش مركز المتحدة فين بالضبط ع الدائرى؟
بتاع ابو رواش كان جميل ب 250
بتاع المتحدة كان جميل ب 220
كل اللي ركبته بعد كدة ب 75 و ب 100 زبالة .... من زكي جرجس او من الملك .....
السلام عليكم
ازيكم يا جدعان
انا في الاول بستاذن هيما اني هكتب في موضوعه..
بس عادي بقى هو يعني كان مسجله باسمه في الشهر العقاري ولا حاجة :36_1_8[1]:
في الاول ليا بس استفسار بخصوص الشربون بتاع الدينامو..انا كده كده هغيره ان شاء الله من نفسي لاني مش هستنى الموقف الجميل بتاعها يحصل لا قدر الله..
السؤال بقى..انهي شربون..يعني هل فيه ماركه معينه او نوع معين اجيبه ولا ايه بالظبط
دي حاجة..الحاجة التانيه بقى.
فكرت في حوار القربه ده و جت ليا افتكاسه كده..هي ممكن تكون بسيطة بس اكيد فعاله باذن الله
ان احنا نبطن او نعمل زي كسوة كده للقربه من الصوف الزجاجي عشان يحميها من الحرارة الزائده..حاجة كده بتاع 20 جنيه او اقل كمان و هتطول عمر القربه شويه ان شاء الله..
ربنا كرمني و اشتريت كاوتش جديد لان القديم بتاعها كان كخه اوي و مشقق و حالته كرب
جبت كومهو ايكستا SPT KU31
490 جندي شامل السلطات و العيش و ربنا يبارك فيهم ان شاء الله
ان شاء الله في الخطة القادمة بقى تغيير التيل الامامي و الخلفي بس قدام شويه ان شاء الله
وبردو تغيير الكاسيت و تركيب DVD لزوم الفشخرة :makeup: ..سؤال بس..هم ممكن في توكيل الكاسيت بتاعها اللي هو فيديو باص ده يدخلوه في موديل تاني شاكب راكب كده ولا ايه النظام و الفرق تقريبا بيكون كم
تركيب كسوة للكراسي و فيه قدامي عرض من واحد عندنا في اكتوبر ب350 جلد و شكله نضيف كده و ابن بيبول (ابن ناس يعني) ...كويس كده ولا فيه احسن ؟؟
و ان شاء الله هنوافيكم بالجديد
بالنسبه للاخ اللي كان بيسال على مركز المتحده
هديك تليفون محمود حسين و ده مدير المركز.كلمه و هو هيوصف ليك المكان بالظبط
و قله الدكتور احمد بتاع اسكندرية بيسلم عليك قوي
01112310801
بقولك يا هيما صحيح
هي الكارتيرة اللي بتبقى تحت الموتور دي فيبر ولا صاج ؟
:bye2: مؤقت
ربنا يحفظنا جميعا و يبعد عنا كل ذي شر