الموضوع: الحيـــــــــــــــــــــ ـــــــــــــــرة !! (وائل عطية)

تقول لنفسك المفروض لو هاجيب عربية تبقى 128 لا أكثر في البلد دي بس هانعمل إيه ..الدنيا محتاجة التطور..ولو جبت 128 مستعملة ومعاك أسرتك وانت على طريق وقلت بأصلها معاك طبعاً هاتبقى مشكلة..ولو حبيت تجيب 128 جديدة !!!! طبعاً يبقى قرار غلط ..وهاتقول لنفسك أعلى شوية وأجيب حاجة كده في الأربعينات ولا الخمسينات ..آه .. ماأنا مابعدتش قوي ..بعد كده هاتقول طيب ماالعيال بتكبر ومحتاجين العربية تبقي كبيرة شوية يبقى بدال ما أجيب دلوقتي ألتو ولا ماروتي ولا برودوا مانشوف حاجة كده لانوس ولا فيرنا وآهي عائلية ومكيفة والعيال هاينبسطوا وهما مسافرين وهاتنفع وتروح عشان تنفذ تسمع اللي بيقولك ياعم اللانوس راحت عليها ولا الفيرنا بتحدف لفوق :lol: وتوكيلها زفت معلش تعالى على نفسك تاني وكبر المبلغ شوية وهات أفيو عربية جديدة وحلوة وتروح تنفذ تسمع اللي يقولك ياعم أفيو إيه دي هى هى اللانوس بالظبط بس جملوا شكلها شويه وبعدين دي استهلاك البنزين بتاعها عالي لأ سيبك سيبك خليك في حاجة يباني في نفس الرينج دا وتسمع اللي بيشكر في السيريون وتروح تنفذ يطلعلك واحد يقولك ياعم سيريون إيه دي توك توك وبعدين انت مش قلت عايز عربية عائلية وواسعة ماتخليك في الماتريكس وتخضع للقول وتروح تنفذ تسمع اللي يقولك ياعم دي بقت تركي وبعدين انت مش شايف شكلها عاملة ازاي باقولك إيه آخر حاجة بقى هات الأوبترا أظن محدش هايقولك عليها حاجة صح؟ - صح وتروح تحجز يتصل بيك واحد صاحبك ويقولك عملت إيه ؟ الحمد لله إني لحقت ياعم طلعت بتستهلك بنزين كتير وبعدين دي صاجها ورق ..تعالي وهات الفلوس هانجيبلك حتة لانسر كده وكويسة..تاخد ديلك في سنانك وتطير على صاحبك تلاقيه بيقولك اللانسر كويسة واحنا هانجيبها خليجي وسعرها هايبقى حنين شوية ..في نفس الوقت يتصل بيك صاحبك التاني ويقولك وقف عندك انت ماسمعتش انها مابتاخدش غير بنزين 95 ولا إيه ؟ هاتجيب لها منين؟ وبعدين في كلام جامد إن منشأها مش اليابان طيب هدخل نفسك في متهة ليه وعلى إيه ماالعربيات ماتجيب صني ..ترد انت عليه وتقول ياعم لأ مش هادفع المبلغ دا كله في عربية تقفيل مصري لأ انسى ..فيرد عليك يقولك معاك حق بس معلش هاتعلى بقى بالمبلغ شوية ونشوفلك حتة كورولا ولا SX4 ولا تيريوس ولا فورد ولا ولا ولا ولا .....................وفجأة تسمع جرس المنبه بيصحيك علشان تروح الشغل :lol: :lol:

صح 100%
والله المستعان