نصيحة لوجه الله بلاش عند مع اى موتسيكل او فسبا
امبارح راجع حوالى الساعة واحدة بالليل فى شارع فيصل و الشارع على غير العادة فاضى و زى الفل ، و انا ماسك شمال و عند الطالبية طلعت عربية اسبرنزا من كفر طهرمس لفيصل و الراجل طلع بكل ادب فى اليمين و فاتحلى الشمال ، و جاى من وراه فسبا تقريبا الصنايعى اللى راكبها حد ضحك عليه و قاله انها ريسنج ، طلبت معاه يعدى من جنب الاسبرنزا و هو بيلف و الشارع عرضه يدوب عربيتين فى المنطقة دى ، المهم انا هديت و كلاكسات للزبون لقيته بيبصلى بقرف و مش عاجبه صوت الكلاكس و بيكسر قدام عند الرفرف اليمين و مصمم يطلع قدامى ، رحت بصراحة عاند و كابس فى الشمال طريقى و هو بيعند و عايز يعدى بينى و بين شنطة الاسبرانزا ، عدى بوش الفسبا و الحتة العريضة اللى ورا دى يدوب لمست الاكصدام عندى من قدام يمين و فى ثانية كانت الفسبا بترقص و بتحدف يمين لحد باب الاسبرنزا ما غيرله اتجاهه تانى ناحية الشمال و الفسبا اترمت قدامى بعرض الطريق و اللى راكبها كان طاير لمسافة لا تقل عن 2متر فى الجزيرة اللى فى النص و مكنش لابس خوذة كمان ، الحمد لله قام كويس و جاى بيتخانق معايا ، و بتاع الاسبرنزا وقف و الناس اتلمت و ركنوا الفسبا و واحد من الدليفرى بتوع صيدلية العزبى و كام واحد واقفين قالولى امشى مفيش حاجة ، الحمد لله انى اول ما شفت الفسبا بترقص رحت مفرمل و الا كنت فرمتها هى و الواد ، بعد اللى حصل ده بلاش يا جماعة الله يخليكم و يكتب سلامتكم العند مع اصحاب العقول دى .