الموضوع: ومعاك واحد لينيا

المشاركة الأصلية كتبت بواسطة placebo

انا سقت اللينيا العادية الفول اوبشن بس مش التيربو وهى ماشاء الله طلقة .. فمستغرب التيربو هتكون ازاى !! صاحبها اللى هو زميلى جابها بـ 108 وبعد 3 ايام بالظبط نزلت عشرة الاف بس هو مش زعلان وبيقول ان كده كده كسبان ومرتاح بيها .
العربية زى ما بيتقال فى التقييمات اللى قريتوها .. ناعمة وسحبها جميل وتكييفها ممتاز .. تقفيل الصالون جيد جدا .. قعدتها مريحة وشايف كويس جواها ..
الكاسيت كان سى دى اوديو فقط لكن فيه خاصية aux وان كان مفيش فتحة له .. وبعد بحث وتدوير على النت لقينا موقع بيشرح ازاى تعمل كابل وتوصله بالكاسيت خلف التابلوه والكابل ده ينتهى بجاك سيتريو قمنا بتوصيله على موبيل صديقى الـ 5800 واشتغل تمام والصوت كان رائع الصراحة.
العربية اول ما جابها كنت باسوقها على طريق جانبى داخل المجمع اللى باشتغل فيه والطريق ده مليان حصى فكنت باشعر به بشكل بسيط .. لكن بعد تغيير هواء الكاوتش بينتروجين الاحساس اختلف تماما والسسبنشن اصبح افضل كتير عن الاول .. لسه كمان صديقى هيغير الجنوط العادى بتاعت العربية باخرى سبور وهاحاول اقنعه يغير كاوتش العربية بكاوتش اعرض ونشوف هتفرق كمان ولا لأ بس هو مرتاح فيها جدا كده وخايف الكاوتش الاعرض يبوظ العفشة على المدى الطويل.
العربية لونها اسود ولازم تتنضف كل يوم علشان تلمع ومتلمش تراب. انصح اللى هيشترى يجيب فضى علشان ميبانش فيه التراب او الخدوش بسهولة
الدركسيون جلد وملمسه جميل وان كان صغير بعض الشىء ( بالنسبة لى على الاقل علشان انا متعود على الطارات الاكبر حجما) بس المسألة تعود مش اكتر .. وممكن تحريكه لفوق او تحت للامام او الخلف حسب طول اللى سايق
دواسة الدبرياج مشوارها طويل حبتين بعكس البنزين .. اما الفرامل فهى تقريبا بتشتغل بنظام التخاطر عن بعد !!! يعنى بتقرأ افكار اللى سايق وتفرمل اول ما يبتدى يحرك رجله من على دواسة البنزين!!!
الفتيس خمس سرعات طبعا ونقلاته حلوة وسلسة لاهى طويلة ولا قصيرة زيادة عن اللزوم ..( بس لاحظت ان بعض الغرز اللى بتمسك جلد مقبض الفتيس ابتدت تفك !!) والمارشدير له سقاطة بتترفع لفوق علشان يعشق صح ..(انا كان عندى المارشدير بسوسته بالضغط لتحت فى عربيتى القديمة ) فكنت بتلخفن علشان اجيب مارشدير فى اللينيا واقعد اضغط على الفتيس زى الضغاطة اللى بيسلكوا بيها الاحواض المسدودة .. لحد ماتعودت على السقاطة

الكرسى له مخدع وبيتحرك فى ثلاث اتجاهات .. فوق وتحت ، قدام وورا ، والضهر بيرجع ورا وقدام .. وفى جميع الحالات اللى قاعد ورا مبيتأثرش بحركة الكراسى الامامية لان الكنبة الخلفية بعيدة .. وهى على فكرة مقسومة تلت وتلتين علشان لما تحب تتنى المساند وتوسع مكان الشنطة ممكن تقعد شخص او شخصين ورا برضه .
الحاجة الوحيدة اللى متضايق منها هى لون الاضاءة البرتقالى فى التابلوه .. مبحبش اللون ده .. يعنى ياريته كان ازرق او احمر او حتى اخضر بس بلاش برتقالى .. طبعا كمبيوتر الرحلات مفيد "احيانا" بيبين استهلاك البنزين والمسافات المقطوعة وحاجات تانى ماهتمتش بيها .. آه صحيح يمكن ايضا تعطيل خاصية الايرباجز علشان متفتحش من الخبطات البسيطة .
بس ده اللى فاكره ..
بس بعيدا عن مميزات او عيوب العربية دى او اى عربية تانية .. فى حاجة كده يصعب وصفها لما تكون قاعد فى كرسى القيادة وبتسوق عربية .. حاجة كده زى الراحة النفسية وانت سايق .. وده لقيته فى اللينيا .. ويارب الاقيه فى الجراند بونتو اللى حجزتها ولسه مسقتهاش حتى الآن .

تقييم حضرتك رائع جدا

ناس كتير هنا كانوا محتاجين حد يتكلم عن اللينيا العادة لانه كل الناس بتتكلم عن التربو باستمرار

و فيه ناس ملهمش فى الفحت و السحب و الحاجات دى و عاوزين العادة .... زيى كده

معلش فيه ليا كام سؤال لو تسمح يعنى :

- هيا عربية صاحبك الفئة الاولى و لا التانية فى العادة ..... انا حسيت انها الاولى لانك بتقول عاوز يركب جنوط ...... و الفئة التانية نازلة بجنوط ...... صح ؟؟؟

- لون الفرش و الابواب فى اللون الاسود ايه ؟؟؟؟؟ بيج و لا اسود و لا رمادى ؟؟؟؟؟

- استهلاك البنزين فيها عامل ايه ؟؟؟؟؟ و بيستخدم بنزين كام 92 و 95 و لا ايه ؟؟؟؟؟؟

- هل الكنبة تحس انها ضيقة ؟؟؟؟؟ يعنى تشيل 3 مرتاحين و لا لا ؟؟؟؟؟

- التكييف حضرتك قولت ممتاز ...... طب بيسقع بسرعة و لا بياخد وقت ؟؟؟؟ و بيأثر فى السحب بطريقة جامدة و لا لا؟؟؟؟؟؟؟؟ و على كام يبقى حلو ؟؟؟؟

- هل العربية معاها سنتر و ريموت ؟؟؟؟ و لا بتركبهم برة ؟؟؟

- اداء العربية مع التحميل يعنى 4 او 5 اشخاص و التكييف شغال ..... هل بيبقى كويس و لا بتقل قدرتها اوى عشان 77 حصان بس ؟؟؟؟؟ طبعا كلامى على سرعات تحت 100 كم مش اكتر لانه ده اللى يهمنى و بتستخدمه دايما ؟؟؟؟؟؟؟

- اخر سؤال ...... هوا صاحب حضرتك عمل كام كيلو لحد دلوقتى بالتقريب طبعا ..... و هل فيه مشاكل ظهرت عنده فيها لحد دلوقتى ؟؟؟؟؟
- اسف لو ازعجتك بأسئلتى ..... و شكرا على التقييم الرائع جدا و كنا محتاجينه بجد ؟؟؟؟

المشاركة الأصلية كتبت بواسطة yoko

شكرا يا placebo على التقيم والموتور الي من غير تربو سحبه حلو تحت ال١٠٠ كم\س بس بعد كده بيموت
وفعلا العربية زي ما وصفت
وحاجة كمان التربو الفنيس المارشدير سوسته للجنب (زي الكورولا الي معايا) يعني ولا تدوس تحت ولا فوق بس الفتيس تقيل لما تروح ناحية ال٥ والR
بس أنا حاسس إن الكنبة ضيقة شوية
ومال اللون البرتقالي معتقدش إنه بالسوء ده
وصحبك لو عايز يركب جنوط وكوتش أعرض ميركبش أعرض من الي بتنزل في التربو (وهيأثر على التسارع بتاع العربية بشكل بسيط)

ازيك يا يوكو ؟؟؟؟؟؟ اخبارك ايه ؟؟؟؟؟

و اخبار الكلية و الشغل ؟؟؟؟؟؟

ربنا معاك يا بنى و تستلم بسرعة ان شاء الله

و احنا تحت امرك لو محتاج صعايدة يروحوا معاك التوكيل و نعمل اعتصام لحد ما تستلم يا يوكو

و دايما منور موضوعات اللينيا بارائك و معلوماتك الغزيرة ما شاء الله

ليا اكتر من استفسار يا جماعه
الاول عن حجم العربية لان الصور اللى على المواقع مبينه العربية طويلة وفيه صور لعربية عضو هنا كان عامل تقييم للعربية ومن الصور العربية مش باينه طويلة فالعربيه تقريبا فى طول انهى عربية ( مثلا حجم الياريس- الاوبل - الخ)
السؤال الثانى ليه بعض المواقع اللى بتدعم فيات (مش فاكر اسم الموقع اتمسح من عندى) فيها كل العربيات بونتو وجراند وبرافو وبالكماليات ومش معترفين بال لينيا؟ هل لانها تركى؟ ما مصنع فيات فى تركيا معترف به ؟ هل لانها متصنعه علشان تخدم مناطق معينه من العالم؟

لقيت الموقع اللى قصدى عليه وده موقع انجليزى من بريطانيا
Fiat.co.uk | Fiat Showroom : Latest Offers, Book a Test Drive, Fiat Car Range and more

فيه عربيات فيات الجديده بس مفيش فيه لينيا؟
هل انتاج وتسويق لينيا مقصور على بلاد معينه؟

اتمنى اننا فى مصر نشوف فى يوم من الايام ان الواحد لما يشترى العربية يكون فى امكانية انه يختار الكماليات اللى عاوزها ويخلى المصنع يزودها له