الهيدرز والشكمان!!

**badblood** · 12-11-2007 05:58 PM

كنت عايز اعرف فين ممكن اعمل هيدرز ومواسير اوسع للشكمان
عربيني لانوس
جزاكم الله خير ؟ :-)

**Adham** · 12-11-2007 08:35 PM

انزل الحرفيين و اسأل على مربع بتاع الكمانات, ايوة هوة اسمة "مربع" ومكانة و را المطرواي بتاع الشكمانات

و لما تقابلة حاتلاقية كدة جتة و فعلا مربع من حيث الطول و العرض, ماشاء الله :D قوللة انك صاحب أدهم اللي عملتلة الاهيدر في السيفيك الفيراني الهاتش من سنين و ان انا باعتك لية تعملة زية

شغل و صناعه و فاهم و سعر عقلاني مش اشتغالات

**badblood** · 13-11-2007 12:30 PM

يعني المربع ده عبى ضمنتك
وياريت لو حتعبك تقولي العنوان باتفصيل عشان التهوان وكده والواحد يروح فايق
وياتري الهيدرز اللي عملهولك كلفك كام؟

**Adham** · 13-11-2007 01:17 PM

طبعا ياباشا "مربع" على ضمانتي

و هوة في بلوك مش فاكر رقمة, بس هوة ورا المطرواي بتاع الشكمانات على طول

المطراوي دة قدام "سرور" بتاع الياباني بالضبط

الهيدر دة كان من اكتر من 8 او 9 سنين و كان ب 200 جنية و شوية او 300 فامانقدرش تقيس على اسعار النهاردة
و ايامها كان الهيدر اختراع و مش اي حد يفهملة و يعرف يعملة

**badblood** · 14-11-2007 12:00 AM

شكرا على وقتك
بس كان ليه سؤال ايه اللي لاحظته ع العربيه بعد التركيب؟

**Adham** · 14-11-2007 10:17 AM

السحب زاد و الصوت كمان كان رهيب

بالذات اني عملت مع الهيدر اربعه شكمان من بعد علبة النص و طلعت باربعه ديل في العربية من ورا

فعلا انا من أوائل الناس اللي عملو عربية اربعه شكمان ( شغالين) في العربيات هنا :P

كنت تقف ورا العربية و هيه دايرة سيلانسية تعد صوت الشتعال من الشكمانات زي الموتوسيكل

و لما تقرص جامد كان صوتها فعلا مرعب, و أكنك راكب بورش :D

و كنت مركب صمام للمنافولد اللي هوة بيخللي العربية تضرب Back Fire بين النقلات كانت فعلا عربية تحفة

كنت مركب فيها اتنين كاربراتير فاكيوم على بستم (اتنين على كل 2 سلندر) و فتيس سبور 5 نقلات كنت جايبة استراد من اسكندرية و مشغل اشعال الكتروني شديد على بوبينة الكتورني عالية و موسع مداخل و مخارج

العربية دي طلعت من عربيات عجيبة اصلا منهم مثلا رينو 5 تربو (الحمراء اللي منفخة من ورا) و طلعت من بي أمات 320 و323 كانت خفيفة قوي و موتورها كان فاجر

الله يرحمها بقى

العربية دي انا بعتها من سنة 98 و فعلا نفسي اشوفها تاني

**badblood** · 14-11-2007 12:28 PM

خساره انك بعتها حتى لو مكنتش هتستخدها احتفظ بيها يلا ربنا يبارك في عربيتك اللي معاك
يعني انت رايك اعمل الحكايه دي وهل ملهاش تأثير على الموتور ؟
وطبعا اعتقد انه هيغير المواسير كمان (يوسعهم)
وانا اسف اني بتعبك بس فعلا كنت محتاج واحد مجرب لان الموضوع ده عجبني اوي

**Adham** · 14-11-2007 12:44 PM

انا دخلتها في الهوندا الاكورد في نوفمبر سنة 98 و دفعت فرق, كبرت بقى عالجري و الشد و الكلام دة مع ان العربية دي كانت مشهورة قوي في مدينة نصر

بس مش ممكن اخللي عربية تذكار, ماهياش هدومي القديمة يعني :D

اعمل مواسير ستانلس بس ماتوسعهاش

علشان ال Back Pressure بتاع الموتور

يعني المواسير لو وسعت قوي حاتلاقي العربية اتكتمت و مافيش سحب

**badblood** · 14-11-2007 12:50 PM

تمام والله وانا بتعبك معايا
بس مش عايز اعمل اي حاجه غير لما اتأكد منها مليون في الميه
انا انشاء الله رايح النهارده بعد الشغل وربنا يوفقك
ولو في اي جديد هقولك على طول ؟
جزاك الله خير