فال الله و لا فالك
نبقى مصريين في الدنيا و في الاخرة في النار ...... ربنا يعافينا !
عادي يا اخوانا
بالنسبة لاصحاب الفنادق و شركات السياحة المصري و العربي بيستهلك اكتر من الاجنبي سواء في الاكل و الشرب او في استخدام المرافق او في لطش تذكارات من الاوض. للاسف الكلام ده في بعضة صحيح لكن ده ميمنعش ان في مصرين و عرب عندهم عزة نفس و عينهم مليانة و مبيعملوش الحركات النص كم ده و ان برضة في اجانب العن من المصرين و بيعملوا كل الفصول الباردة دي. و عشان هم مقتنعين بكدة بيفرقوا في المعاملة و الاسعار و فاكرين انهم لما يطفشوا المصرين المكان هينضف.
المهم
غلطان اللي يروح يحجز من الفندق علطول او من شركة سياحة لانة من الاخر هيتقلب. و الحمد لله ان ربنا الهم الانسان و خلاه يخترع الانترنت. احسن حاجة انك تحجز عن طريق المواقع المشهورة علي زي booking.com و hotels.com و expedia.com اللي بيفروا ارخص الاسعار و التنافس ما بينهم عالي لدرجة انهم احيانا بيعرضوا انك لو لقيت اوفر ارخص هيشيلوا هما الليلة كلها و الفرق بينهم و بين اي شركة سياحة او فندق من مصر شــــــــاسع جدا و طبعا من حجز النت لا يقدروا يعرفوا انت مصري ولا هندي و لا حتي مريخي. التعامل بيبقي مع الموقع و هم بيجلهم اورد بالحجز و يوم الوصول بيفاجئوا بيك داخل عليهم و طبعا مش هيقدروا يعملولك حاجة لانك ممكن تظبتهم في التقييم من الموقع و تضيع عليهم فرص تانية.
اتمني اكون افدتكم و ساعدتكم تنظموا اجازتكم الجاية و بارخص الاسعار
موقف: خارج اخر يوم الصبح اوقف تاكسي عشان اتفق معاه على نص اليوم ييجي يودينا المطار و بكام و كده
و انا راجع تاني داخل واحد من "البوابين" بتوع الفندق بيجري ورايا لنص اللوبي عمال ينده (يا باشا يا باشا) ..... لحد ما سمعته لقيته بمنتهى اللزوجة بيسأل "انت رايح فين؟ هو انت نزيل؟" كأن مثلا المصريين كخ ما يرتقوش لمستوى النزول في فندقهم (عمرهم ما بيسالوا السؤال ده لاجنبي) ..... رديت بمنتهى الاحتقار "أيوة" ..... قال لي غرفة كام؟ قلت له شئ ما يخصكش و دخلت جوة
موقف تاني: ما رضيوش يعملوا لي late checkout لان الطيارة كانت طالعة 5 ...... مع اننا عرسان
موقف تالت: انا كنت حاجز فطار و عشا .... المطعم مستطيل كبير و جزء منه تراس ...... عشان ادخل من المدخل لازم امشي بطول المطعم (الاوض اقرب لمؤخرة المطعم من مدخله) ...... المهم في يوم لقينا ناس بتخش و تخرج من التراس (اقرب بكتير للاوض) قلنا نخرج بعد ما اكلنا من التراس ...... الويتر نده لنا و قال لنا ممنوع في نفس اللحظة كان فيه اجانب بتخش من التراس !!!!! (طبعا مراتي هزأته و خلته خرجهم ههههههههههههههه)
موقف رابع: في المطعم في العشا ويتر ذوق جه و سالنا مش عايزين قزازة مية قلنا له ماشي ..... جاب المية ..... شوية الهيد ويتر جاي باصص لنا بقرف من فوق النضارة و بيسالنا هي المية دي انتوا طلبتوها و لا ايه؟
لا سرقناها يا روح ماما !!!!!!!!!!
موقف خامس: 3 ايام ورا بعض اطلب سدادة البانيو عشان عايز استرخي شوية في المية ...... ما تجيش ...... الا بعد شكوى لل Duty Manager
موقف سادس: الاجانب ما تتفتشش على مدخل الفندق و احنا نتفتش
موقف سابع: كنت باشتري مية و عصير و بتاع من سوبر ماركت في خليج نعمة ..... هيلتون شارم دريمز تاني صف من خليج نعمة و هيلتون فيروز اول صف و عشان كده نزلاء الاول بينزلوا في البلاج بتاع التاني و بيعدوا أصلا للبلاج من خلال التاني ...... جبت المية و انا راجع باعدي من خلال فيروز الامن بيقول لي رايح فين !!!!!!
موقف ثامن: اخر يوم في الاوتيل ... 9 الصبح .... معلق يافطة Do Not Disturb
و مع ذلك ...... خبطات عنيفة عالباب يعقبها نداء :
طاخ طاخ طاخ ....... هاوس كيييييبيييييييييييينج
طاخ طاخ طاخ ....... هاوس كيييييبيييييييييييينج
طاخ طاخ طاخ ....... هاوس كيييييبيييييييييييينج
صحيت نص نايم فوجئت بالباب بيتفتح بس انا كنت قافل الترباس اللي من جوة فالباب اتفتح بالظبط 5 سنتي و وقف
رحت للحيوان اللي فتح باساله فيه ايه؟ يقول لي مش انتوا هتعملوا check out النهاردة؟؟؟؟ !!!!!!1
اتاكدت ان العلامة لسه متعلقة لقيتها متعلقة
طيب يعني جاي تطردنا 9 الصبح؟ و كمان بتفتح علينا ؟ ياخي %$^&*
و غيرها كتير من مواقف هناك و في فنادق تانية ...... زي الباشا اللي في جراند حياة اللي عايزني اروح معاه مكتب الامن نثبت "المعدات" اللي معايا (اللي هي لابتوب ..... شايفني رابط الفيل في باركنج الاوتيل اصله !!!!!!) ..... طبعا شرشحت له في اللوبي و قلت له ماهو لو انا شحات من شحاتين اوروبا و عينيا خضرا و شعري اصفر مش هتقدروا تقولوا لي بم !!!!! تقريبا فاكرني سارق اللابتوب و لا مش وش لابتوبات !!!!!1
ملحوظة: مش تزكية في نفسي و لا حاجة و الله ........ بس و الله انا شكلي محترم و نضيف و ابن ناس ....... يعني مش شكل مثير للشكوك و الشبهات عشان يشكوا فيا و لا ما يستنضفونيش !!!!!
شكرا عالنصيحة و هاجربها المرة الجاية ان شاء الله
حاجه تفرح فعلا !!!!!!!!
أنا لم بنزل أي مكان سياحي في مصر بحط رجلي في وش التخين لو فكر يقدم أي سائح عني وبالذات السواح العرب
والله يا جدعان وما لكوا علي يمين اني بتحسر لما اشوف اعلانات لشرم ومرسي علم هنا للاجانب بتراب الفلوس .كان مره في اعلان 7 ايام في شرم ,6 ليالي هاف بورد 350 يورو شامل كل حاجه.انا جاتلي حسره واولت امال احنا ما بنشوفش الكلام ده ليه؟اخص.
bemo,ire
واحد قريبى معاه الجنسية الامريكية و عايش هنا فى مصر لما بيروح يحج بيحجز فى شركة فى امريكا و يسافر نيويورك يروح يحج من هناك لانه احسن و ارخص على حد وصفه !!!
انا قلت الكلام ده قبل كدا في المنتدى بس هاكرره تاني
انا بسافر كتير عشان الشغل ولاحظت الآتي
1- لما بروح امريكا في مدخلين واحد للأمريكان والكنديين ودول طبعا اجراءاتهم بتخلص في ثواني، والمدخل التاني للجنسيات (الأخرى)
2- لما بروح اوروبا بلاقي مدخلين واحد لدول الإتحاد الأوروبي، والتاني للجنسيات (الأخرى)
3- في دول الخليج مدخل لمواطنين دول مجلس التعاون الخليجي، ومدخل للجنسيات (الأخرى)
4- في مصر كله على بعضه (ماشي مش مشكلة) بس بتلاقي ساعات كتير ناس مهمين لابسين بدل ومعلقين كارنيهات ماسكين بال10 جوازات للأجانب عشان يخلصوهم بسرعة (غالبا بيكون للأخوة الخليجيين)
المحصلة ان الإنسان يكون مصري دا ابتلاء من ربنا وربنا يجازينا عنه خير في الأخرة لأننا طول عمرنا (أخرى)
وعندي سؤال بجد
لو حد فيكم شاف فيلم اسمه (الريس عمر حرب) بدون النقد الفني للفيلم الفيلم كان بيتكلم عن كازينو للقمار بيدخله الأجانب بس وممنوع على المصريين وكان في واحد مصري اسمه (حمدي الدنجوان) كانوا بيقولوا في الفيلم انه اشترى جنسية ب 5000 دولار تقريبا من دولة غالبا افريقية عشان يعرف يدخل الكازينو
هل في حد يعرف ازاي الواحد يقدر يشتري جنسية زي دي لتسهيل المعاملات في المطار واقسام الشرطة والفنادق
ارجو الإفادة واسف للإطالة