من كام يوم لاحظت ملاحظة ضحكتنى اوى

انا دلوقتى قاعد فى وسط البلد و شغلى فى ميدان لبنان و المسافة من باب الشركة لباب بيتنا 10 كيلو... كل يوم بمشى حوالى 5 و اوصل البيت حوالى 6 يعنى باخد المشوار فى ساعة... 10 كيلو فى ساعة يعنى متوسط السرعة 10 كيلو فى الساعة... يا نهار اسود!

ليهم حق فى كتالوج السيارة يصنفوا القيادة داخل المدينة بالاستخدام السىء... العربية ماشية اول تانى و يمكن تالت... معظم الوقت سلانسية... حمل التبريد كلة على المراوح... مليون مرة تعشق و تمور و فى الوسط فرامل... و يا سلام لو القصة دى فى الصيف و التكييف شغال مع الفلم دة

اكيد اى عربية بتستعمل بالشكل دة حتتهلك و تتعب بالرغم من انها مش ماشية كيلوات كتير... و بالمنطق دة العربية اللى بتمشى جوة البلد محتاجة صيانة و رعاية اكتر من العربية اللى بتمشى طوالى و طبيعى استهلاكها للبنزين يبقى عالى و تغيير الزيت فيها لازم يبقى على فترات متقاربة... دا غير انك حتستهلك الرامل و الدبرياج اسرع بالرغم انك مش بتعمل كيلوات كتير... اذا الموضوع مش كيلوات و بس... الموضوع طريقة استخدام

احب اضيف ان لما كنت بروح بيت العائلة فى الرحاب اللى بينها و بين شغلى 55 كيلو على الدائرى كنت بروح فى 45 دقيقة فقط بمتوسط سرعة 67.5 كيلو فى الساعة يعنى انا كنت بقطع اكتر من 5 اضعاف المسافة فى ثلاث ارباع الوقت... عمار يا مصر يا بلد الزحام و العطلة

MMamdouh