تعالو نتكلم عن فكرة التعديل بوضوح

**ahmedali** · 20-10-2009 03:09 PM

يا جماعة انا فكرت كتير في موضوع التعديل ده وانا عندى ابيزا 94 وكنت عاوز فيها الشغل الاتي
متور 1600 بالتكييف والباور والفتيس
عفشة كوني
فرامل رياضية
فلتر هوا رياضي
دبرياج رياضي
جنوط 16 بالكاوتشات بتاعته
تعديل فايبر
فوانيس معدلة
فرش كامل
دهان عربية
وحدة رفع
فتحة سقف كهربا
شنطة من الداخل وباركينج سنسور
تابلوه حديث هغير التابلوه لتابلوه ابيزا 2002 وهركب عداد البلولو 2002
مرايات كهربا
دي في دي
ابواب كهربا امامى
اضائات داخل الصالون بلون النار او الدفايه
وكمان فكرت انى اعمل ابواب في الكراسي كهربا تكون خاصه بالمشروبات

التكلفة دى تقريبا هتخش في 25 الف جنيه
طبعا في ناس قالتلى انت مجنون عشان تدفع في عربية موديل 94 25 الف جنيه
وانا احب اوضح فكرتى واشوف رايكو هيكون ايه بردو دلوقتى انا استحالة الاقي عربية بما انى شاري العربية بتاعتى بي 31 يعنى هتقف عليه بي 56 الف فين العربية اللى هشتريها بنفس السعر ده تكون نفس القوة والمواصفات والاوبشنز ده كله غير متعتك انك بتكون مش راكب حاجه اعتيادية
اقل عربية عشان تكون فيها كل ده مش اقل من 100 الف
الفكرة انى بشتري حجات فخمه وبركبها على صناعه الماني وفي نفس الوقت بهرب من جمارك السيارات المتخلفة اللى محطوطه في البلد دى انا عارف انى لما اجى ابيع ممكن ما حش يقدر اللى انا عملته فيها بس انا اصلا لو نفذت افكاري دى مش هبيع اخليها عندى تكون عربية تانية لو ربنا اكرمنى واظن فيه بعض الناس بتقدر الكلام ده اثناء الشراء
انا هحط صورة لشكل الابيزا اللى انا هعمل زيه كتعديل وعاوز ردكو ورايكو معايا عشان نستفاد كلنا ونفيد بعض

**AMRGTI** · 20-10-2009 03:16 PM

فكره جامده وشغل حكايه بس متفكرش تبيع

**Amr Mohamed** · 20-10-2009 03:20 PM

بصراحه تفكير فل اوى يعنى انا من المؤيدين للحكايه دى وكمان هتبقى مميز كده وانا لو مكانك اكيد هافكر كده بردو من رائيى الفكره حلوه اوى والعربيه كمان هتبقى ملهاش حل توكل على الله لو حاجه مقتنع بيها وبعدين بردو شوف الناس اللى بتفهم هاتقولك ايه

**ahmedali** · 20-10-2009 03:23 PM

amrgti و theblacksword
شكرا على اهتمامكو وردكو عليه ومبسوط ان فيه فاعليه وتشجيع منكو لانى بجد متحمس اوى للفكرة وربنا يسهل ونسمع اراء باقي الاعضاء وخصوصا اصحاب الخبرة في موضوع التعديل
وبشكركو لتانى مره

**elwad_crazy** · 20-10-2009 03:49 PM

اايام مركبت مكنه للانوس بتعتى 1600 وعفشه 14 وكبرت الجنوط
وظبطت الدنيا كل واحد يقولى حرام ومش حرام
وانا مقتنع جدا باللى انا عملتله
كفايا انها داخله دماغى

بس انت الكلام اللى بتقول عليه ده كتير موز

**ahmedali** · 20-10-2009 03:56 PM

ما هو كتير ليه عشان طالما هصرف ومش هبيع اركب حاجه تكون وهم وبعدين ال 25 الف دول بالنسبة للى هاخدو من اداء وقوة ورفاهية مش كتير لانى كانى بالظبط ركبت عربية زيرو لانى هغير كل حاجه بل وفيها امكانيات احسن من الزيرو

**elwad_crazy** · 21-10-2009 03:01 AM

يابااشا فى حاجات هتقابلك وانت بتعمل كل الشغل ده

يعني ابتدي باساسيات زي المكنه والفتيس
بس معتقدش انك هتحتاج دبرياج رياضى للعربيه
لان المكنه مش كبيره اوى

فلو عاوز تبدا ابدا بالاهم وشوف انت محتاج ايه بالظبط

**omdaz_5538** · 21-10-2009 10:30 PM

يابااشا فى حاجات هتقابلك وانت بتعمل كل الشغل ده

يعني ابتدي باساسيات زي المكنه والفتيس
بس معتقدش انك هتحتاج دبرياج رياضى للعربيه
لان المكنه مش كبيره اوى

فلو عاوز تبدا ابدا بالاهم وشوف انت محتاج ايه بالظبط

كلام سليم جدااااااااا

**ahmedali** · 22-10-2009 11:56 AM

ان شاء الله يا جماعه هبدا اكيد بالماتور بس كنت عاوز اسال انا مش من هواة السرعات العالية وواحد صحبي نصنى اسقط منور 2000 سي سي
هل لو سقطه هستفاد منه بايه للعلم انى مش بتاع سرعات عالية اخري 120 ده لو جبتها يعنى

**Ignition-Kid** · 22-10-2009 01:55 PM

المشاركة الأصلية كتبت بواسطة ahmedali

ان شاء الله يا جماعه هبدا اكيد بالماتور بس كنت عاوز اسال انا مش من هواة السرعات العالية وواحد صحبي نصنى اسقط منور 2000 سي سي
هل لو سقطه هستفاد منه بايه للعلم انى مش بتاع سرعات عالية اخري 120 ده لو جبتها يعنى

2000cc مره واحده !!!

طيب ليه طالما انت مش بتحب موضوع السرعات العاليه ده غير استهلاك البنزين ده غير الوزن الزائد

نصيحه وفر فلوس الموتور وحطها فى حاجه تانيه احسن.