الموضوع: Porsche Panamera .. تقرير بالصور

السلام عليكم..........

امبارح بالليل و في معرض أسبورتس كارز بالرياض قابلت البورش بانيميرا سوبر صالون الجديدة...

أول صالون من صنع بورش الصانع العملاق اللي احتكر لنفسه متعة و قوة الأداء الألماني لسنين و سنين......للأسف المعرض كان قافل علشان وقت صلاة العشاء بس حتى لو بيني و بينها لوح أزاز فمش هوه ده العقبة الوحيدة اللي بيني و بينها......الحمد لله على كل شيء............

أول شيء جه في ذهني ساعة ما شفتها قوله الحق تبارك و تعالى (ثم لتسئلن يومئذ عن النعيم)صدق الله العظيم...لأن العربية بجد في الحقيقة شكلها قمة الرفاهية و الأداء و المتعة و الشياكة و التطور مهما وصفت هيه أحلى و أجمل بكتير.....



الجاجوار (اللي في رأيي من أجمل تصاميم جاجوار و تصاميم 2009 على الأطلاق) واقفة تنحني في تواضع للملكة



و من الأمام



شكلها يحير تحس انها عايزة تجري و تنطلق ما ينفعش تقف جوه معرض



يا أرض أحفظي ما عليكي.......




تخيلوا ييجي اليوم اللي نحط فيه مواضيع في المنتدى هنا زي:

-باركولي استلمت البانيميرا

الحمد لله امبارح استلمت بورش بانميرا هاي لاين من جابر عبد الشهيد خليجي العربية لسه ما لحقتش أجربها أوي ايه اخبارها فوق ال 220 لأن كوبري أكتوبر كان زحمة شوية و يا ريت تنصحوني أجيب غطا منين و عايز احسن شركة تأمين

-الحقوني يا بانميراوية

صباح الفل يا رجالة أنا عندي مشكلة في البانميرا...ارجوكم ساعدوني يا خبراء البورش في المنتدى..العربية بتعمل صوت كده عالي لما تكون ماشي على 180 و تضرب فرامل فجأة و بعدين ال 12 سيستم فرامل اللي فيها طلعوا مش شغالين طول الوقت بس عند الضرورة و انتو عارفين انا ما أقدرش أسوق عربية فيها أقل من 12 سيستم فرامل يساعدوني أعمل ايه!!

-محتار بانميرا ولا مرسيدس سي أل أس ؟؟

رغم انتشار البانميرا في كل حته في مصر الا انها مازلت عربية جديدة في السوق وما كونتش سمعة كبيرة زي اللانسر و الألنترا مثلا و قلة عدد المرسيدس شوية خلاها أكتر تميز...رجاءا ساعدوني هوه الفرق كام حصان مش فارقة و الصالون تقريبا نفسه بس البورش نازلة بس ب 2ايرباج ولا أربعة زيادة .........ساعدوني خلاص نازل أحجز بكرة

-تقييمي للبانميرا بعد 5000 كلم

انهاردة عملت صيانة 5000 في توكيل بورش في أبو رواش و الناس الصراحة كانوا محترمين جدا و ظبطوا كل حاجة و الحمد لله تقييمي للعربية ممتازة بصراحة بس لا يعيبها غير انها بتشيل أربع ركاب بس و فوق ال 270 تحس ان العربية مش ثابته بس يمكن لأني معايا البيزلاين اللي عجلها 18 بس مش عارف بس العربية فعلا ممتازة و خصوصا في مشوار العين السخنة بالظبط في 23 دقيقة..لسه عايز اجربها بعد التليين و أشوف استهلاكها للبنزين قد ايه بالظبط

-أخبار عفشة البانميرا ايه؟؟

سمعت ان عفشتها ناشفة شوية و بتحك في المطبات ده بالنسبة للموديل اللي من غير تعليق هوائي.بس في ناس بتقول انها لازم تكون كده علشان عربية رياضية في الأساس فده ضروري علشان الثبات...ارجوكم وضحولنا الموضوع ده

-موسوعة عيوب البانميرا من وجهة نظر ملاكها..

ياريت كل ملاك البانميرا يحطولنا أهم العيوب اللي ظهرت معاهم علشان الكل يستفيد

-زهقت من حجز البانميرا و التوكيل الحرامي

يا جماعة انا حاجز من شهر 6 اللي فات و كل ما أروح اسأل يقولولي أخر 10 فيه تلات مراكب جاية و هتستلم حاجة تزهق انا عارف انهم مش ملاحقين عالطلبات و كل أسبوع تقريبا فيه ناس بتستلم بس كده انا فعلا زهقت من الزحمة في التوكيل و كمية البشر اللي بتشتري و تتفرج هناك يارب يسلمني بئى فعلا أخر 10 لأني محتاج العربية فعلا قبل الأوتوكروس اللي جاي

-بورش بانميرا للبيع أو البدل

العربية بورش بانميرا 2009 لونها نبيتي للبيع أو للبدل بأكبر (كايين مثلا أو رنج روفر أسبورت) فابريقة بالكامل برة و جوة وسقف بدهان المصنع ما أتحطش فيها قلم بوية نهائى عاملة 32000 كلم بس كلهم سباقات و شد طوالي بجد مش جوة البلد العربية ما رشتش و كل لصيانات في التوكيل بالفواتير رخصة تلات سنين استلام 6-2009 العربية فعلا حالة شاذة و لقطة رجاءا الوسطاء يمتنعون

أحلموا معايا هوه الحلم بفلوس

و شكرا لكل من مر أو ساهم أو شارك في الموضوع