الموضوع: سؤال عن الDs

المشاركة الأصلية كتبت بواسطة mohamedway

أنا متابع الموضوع بقالى كام يوم و عاوز أرد بس مكنتش فاضى بصراحه.

فى البدايه عاوزين نتفق على شوية حاجات و نوضح شوية مفاهيم:

فى الفتيسات الأتوماتك المختلفه توجد عدة مصطلحات مرتبطة بكل نوع زى Over Drive OFF و Kick Down و Sport Drive و Ds فى الانسر الCVT ومعناه Drive sporty أو ساعات بيبقه زرار عليه S فقط

كل هذه المصطلحات عبارة عن حاجه واحدة و هدف واحد بتعمله كل هذه الفتيسات وهو الOver Drive OFF أو بالبلدى تسقيط النقلات لرفع الRPM

ال Over Drive OFF ده هو نفسه أول مصطلح من المصطلحات اللى كتبتها من قبل و ده أكتر مصطلح بصراحه شوفته و معبر ميكانيكيا بدقه عن اللى بيحصل عشان كده هأشرحه و باقية المصطلحات فى كل العربيات زيه بالضبط و لكن إختلاف أسماء فقط.

مصطلح ال OVER DRIVE OFF ده زرار فى الفتيس الأتوماتك شوفته فى النيسان صنى و لما بتدوس عليه فيه لمبه فى التايلوه بتنور مكتوب عليها OVER DRIVE OFF وليس OVER DRIVE فقط زى ما الناس بتقول بالخطأ لأن مفتاح الموضوع كله هو إنى أوضحلكم إيه هو الOver drive؟؟؟؟؟؟؟

عشان أوضحلكم إيه هو الأوفر درايف يبقه لازم ندرس فتيس عربيه مانوال مكون من 5 سرعات الأول و تحديدا دراسة السرعه الخامسه فيه؟؟؟؟؟؟؟!!!!!!

طيب إشمعنى السرعه الخامسه فى فتيس مانوال؟؟؟؟
علشان ده أسهل مثال هيوصلكم يعنى إيه أوفر درايف و بعدين نبقه نتكلم على كل النقلات.

النقله الخامسه فى الفتيس المانوال كلها عبارة عن OVER DRIVE ولو تأملناها مع بعض هتلاقى إنك من المستحيل تقفل الRPM بتاع عربيتك عليه و العربيه هتجيب أخر سرعه ممكن تجيبها عليه و الRPM مش هيبقه على الأخر و فى نفس الوقت مش قادر تزود عن كده لأن بإختصار الموتور جاب أخره خلاص................. فى هذه اللحظه لو سقطت نقله و حطيت العربيه على الرابع هتلاقى الRPM وصل لأخره عند أول العلامه الحمرا و العربيه جايبه الTOP Speed بتاعتها إلى مكتوبه فى الكتالوج بتاعها و إستحاله انها تجيب أكتر منها إلا لو الRPM هيدخل فى العلامه الحمرا بقه و طبعا ساعتها انت بتبقه واهم بإنك لو جبت الخامس و الRPM نزل شويه انك تقدر تعلى بيه تانى و تزود سرعه عن كده بس الحقيقه انك مش هتقدر تزود السرعه عن كده بس كل اللى عملته بإنك حطيت النقله الخامسه إنك خنقت الموتور بالدرجه اللى تريح الRPM وفى نفس الوقت تبقه محافظ على الTOP Speed بتاعتك اللى جبتها على الرابع من غير ما سرعتك تقل و يبقى موتور عربيتك مرتاح لأنك مش معقول هتقضى طريق سفرك بالTop speed و الRPM على أول العلامه الحمرا (ده حتى كان الموتور إتدمر).

اللى عملته النقله الخامسه ده إسمه Over drive

كذلك لكل النقلات:
لما تبقى ماشى على الأول و تقدر تجيب عليه لغاية سرعة 50 كم/س و لكنك و صلت بيه لغاية 25 كم/س فقط و إديتها التانى (يبقه كد انت عملت أوفر درايف على التانى)

لما تبقى ماشى على التانى و تقدر تجيب عليه سرعة 100 كم/س و لكنك و صلت بيه لسرعة 60 فقط و روحت مديها الثالث (يبقه انت كده عملت أوفر درايف على الثالث)

لما تبقى ماشى على الثالث و تقدر تجيب عليه لغاية 140كم/س و لكنك و صلت عليه لغاية سرعة 100كم/س فقط و روحت مديها الرابع (يبقه انت كده عملت أوفر درايف على الرابع)

لما تبقى ماشى على الرابع و تقدر تجيب عليه الTOP Speed بتاعت العربيه (وده حقيقه إن الTOP Speed مصمم إنه ييجى على الرابع بدون أوفر درايف) و لكنك قبل ما توصل للTOP Speed على الرابع روحت مديها الخامس (يبقه انت كده عملت أوفر درايف على الخامس و هيفضل أوفر درايف علطول لأنك مش هتقدر تجيب أخره).

بإختصار كل فتيس أتوماتك فيه كمبيوتر لحساب الأوفر درايف بين كل النقلات فى ظروف القيادة المختلفه (فى المانوال السائق هو اللى بيحددها بإحساسه بسحب العربيه) يعنى كل ماتكون قارص على عربيه أتوماتك عاوز منها باور عالى هتلاقى نقطة الأوفر درايف بتبقه عن RPM أعلى و تلاقيه بينقل متأخر عن لو ماشى بالراحه مثلا فا مش محتاج باور عالى فالكمبيوتر بيلاقى بسهوله انه ممكن يحطلك نقله أعلى من غير متأثر على التسارع اللى انت عاوزه فا بيعمل كده للراحة الموتور و التوفير فى البنزين وهكذا و كل ما تقرص أكتر ينقل متأخر أكتر عشان يعلى الRPM أكتر و يبقه عند باور من الموتور أكتر و يديك اللى انت عاوزه و يستهلك بنزين أكتر و صوت الموتور طبعا هيعلى وهو بكده (قلل تفعيل دور الأوفر درايف بقدر معين).

سيادتك بقه لما بتكون عاوز تسبق حد مش بتبقه عاوز OVER DRIVE خالص و عاوز الRPM يوصل لأخره على كل نقله (بالبلدى كده للى راكب مانوال - بيشبع الغيارات) فا فى الحالة ده بتدوس على زرار OVER DRIVE OFF فا ساعتها كمبيوتر الفتيس بيحطه على النقله المناسبه لسرعتك ساعتها من غير أى حسابات ال OVER DRIVE وما بيعملش أى حسابات لإمتى ينقل التروس و الحاجه الوحيده اللى بيعملها إنه ينقلك للنقله اللى بعدها فقط لما الRPM يوصل لأول العلامه الحمرا و غالبا سعتها ممكن تقفل عداد العربيه على الثالث و ما تجيبش الرابع أصلا لأن الفتيس الأتوماتك بيبقه أربع سرعات فقط و الرابع بتاعه هو الخامس بتاع المانوال و بيبقه مقاسه متزبط انه يبقه النقله الأوفر درايف النهائية زى الخامس بالضبط اللى شرلاحته فى الأول بالنسبه للمانوال.

نرجع بقه للDs بتاع الانسر و هو بيعمل نفس الموضوع و هو انه بيشيل حسابات الOVER DRIVE على جنب و مش مهم إستهلاك البنزين و مش مهم صوت الموتور و لا أى حاجه غير ان ال RPM يبقه عالى بقدر الإمكان عشان حضرتك لما تدوس بنزين على الأخر و الRPM يوصل للعلامه الحمراء هيفضل ثابت عند العلامه الحمراء مش هينزل أبدا طول ما إنت قارص على العربيه لغاية ما العربية تجيب الTOP Speed بتاعتها و الكمبيوتر يلاقى انه خلاص مفيش تسارع بعد كده خالص يبدأ يعملك Over Drive عشان يحافظلك على الTop Speed إلى و صلتلها من غير ما تقل و فى نفس الوقت يريحلك الRPM شويه.

الفرق الملحوظ بين الفتيس الCVT والأتوماتك العادى زى اللى فى النيسان مثلا أنه فى النيسان الRPM مع الOVER DRIVE OFF هيوصل للعلامه الحمراء و بعدين ينزل شويه لما العربيه تاخد النقله اللى بعدها و لكن فى الانسر مع الDs ال Rpm هيوصل للأحمر و هيثبت لأنه ليس أربعة نقلات و لكن ما لا نهاية من النقلات و هو فى واقع الأمر مش ثابت و لكن بينزل و يطلع بين نقلات قريبه من بعضها قوى و كتيره جدا و بتتغير كل لحظه فأنت بتشوف الRPM ثابت عند العلامه الحمراء و لكنه غير ثابت بالنسبه لكمبيوتر الفتيس لأنه كلما تغير تغير طفيف عدل الفتيس نسبه لإعادته لمكانه و عدم الدخول به للمنطقه الحمراء و تحويل أي طاقه زياده أو تحسن فى ظروف الطريق لتسارع أول بأول و لذلك الفتيس الCVT كفاءته عاليه فى الشد و التسارع لأنه فى الأتوماتك العادى الRPM بينزل و يطلع تانى بين النقلات و لكن فى الCVT لا ينزل أبدا عن أقصى RPM (أقصى RPM هو الذى يتحقق عنده أقصى قدره للمحرك يعنى لو قولنا ان موتور معين قدرته 100 حصان عند 6000 RPM ممكن يكونوا 50 حصان فقط عند 3000 RPM مثلا).

طبعا بالنسبه للناس اللى بتخاف تجيب نقلة الDs فى الانسر أحب أقولهم أنها ليست نقله و لكنها مجرد تغيير فى برنامج الكمبيوتر و طريقة حساباته للOVER DRIVE) ليس أكثر و مفيش مشكلة انك تجيبه فى أى وقت و انت ماشى على أى سرعه أو إنت دايس بنزين أو لأ و ممكن تقفل عليه الTOP Speed بتاعة العربيه فى و قت أقل من الD بس جامد قلبك على الRPM لأنه هيفضل على الأخر لحد ما تخلص.

بالنسبه لبوظان الفتيس من كتر إستخدام الDs فهى حقيقه بنسبة ما و لكنها مرتبطه بكثرة إستخدامه و ليس طريقة إستخدامه زى (من سرعه معينه و متدوسش بنزين و الكلام الفاضى ده) و لكن الفكرة تكون من انك بتخلى الموتور يطلع أقصى قدرة عنده و أعلى RPM ممكن و كل ده هينتقل للعجل عن طريق هذا الفتيس الغلبان حيث انه مكون من بكرتين متغيرتين القطر بينهم سير معدنى مشدود جامد جدا عشان ميحصلش زحلقه بينه و بين البكر و طبعا درجة الإحتكاك عاليه جدا بين البكر و السير فا بالإضافه لزيادة القدرة اللى بتطلب من الفتيس انه ينقلها للعجل و الإحتكاك بين السير و البكر بينتهى عمر الفتيس نتيجة للتآكل اللى هيحصل حتما فى يوم من الأيام للسير و البكر و لكنك بتعجل ساعتها بهذا التآكل و الفتيس ده يا جماعه ما بيتصلحش و لما بيبوظ لازم يتشال زى ما هو كده و يترمى و يتجاب غيره و طبعا غالى جدا و أنا كنت سألت البشمهندس طارق قبل كده على تمنه بس مش هقولكم عشان محدش يزعل و هو اللى قاللى انه ما بيتصلحش و كمان الكلام ده موجود على موقه متسوبيشى.

بصراحه كلام موزوووووووون وهو ده اللي انا كنت فاهمه من الDs بس لقيت الناس كلها بتقول غلط وعيب وحرام تمشي عليه مش عارف ازاي وكنت مستني حد يكون زي حضرتككده عشان يأكدلي الكلام ده شكرا ياباشا ومنتحرمش منك

المشاركة الأصلية كتبت بواسطة mohamedway

لأ طبعا مش هيعمل أوفر درايف لأن ببساطة حضرتك لاغى وظيفة الأوفر درايف (over drive off) باينه حتى من إسمها و أنا قولت فى كلامى إن النقله الرابعه فى الأتوماتك كلها أوفر درايف زى النقله الخامسه فى المانوال و لكن العربيه تقدر تقفل الtop speed بتاعتها إللى فى الكتالوج على النقله اللى قبل الأخيرة زى الرابع فى المانوال أو الثالث فى الأتوماتك الأربع نقلات و حضرتك بالفعل جبت ال 170كم/س على الثالث و الrpm على أخره وهى ده الtop speed بتاعة العربيه و لما تجيب الرابع مش هتزيد عنها ولكن إستحالة تجيب الرابع و تعمل أوفر درايف و إنت أصلا لاغى الأوفر درايف من الزرار (المفرود انك تدوس على الزرار تانى عشان تلغى الموضوع ده و ترجع و ظيفة الأوفر درايف فيقوم الفتيس يجيب الرابع و يعمل أوفر درايف عليه و الفتيس مش هيلغى الموضوع ده من نفسه و أنت اللى لازم تدوس على الزرار تانى بعد ما حققت غرضك ووصلت للسرعه اللى انت عاوزها فى أقل وقت)

هممممممممممممم تمام ياباشا
انا كنت قصدي يعني ان يكون كومبيوتر العربيه عامل نظام حمايه يعني لما هيلاقي الموتور داخل الريد زون يقوم هو من نفسه يشغل الاوفر درايف ده كان قصدي
بس يعني انا لما جبت ال170 وشغلت االوفر درايف تاني الrpm نزل تقريبا علي5 مش فاكر بالظبط هل السرعه عمرها ما هتزيد عن 170 دول ؟!!