حد عنده افكار ل مشروع جديد ؟؟

**SHNORY** · 20-01-2009 08:12 PM

المشاركة الأصلية كتبت بواسطة mido777

حمـــــــــــــــــــــــ ـــــــــــــــــــادة
ازيك يا صديقى اخبارك ايه ,,,, واحشنى والله

شكرا يا غالى على النصائح المهمة دية
بس احب اطمنك ان افكارى نابعة من معاشرتى لأصدقاء يعملون فى نفس المجال اللى بفكر فيه

سواء مشروع الكاوتش " عندى فكرة كبيرة جدا عنه واقدر اقوم بكل الاعمال اللى بتتم على المكن الخاص بيه ’ ده حتى لو غسيل وتشحيم سيارات الحمد لله اقدر اقوم بيه على احسن وجه "

نفس الكلام بالنسبة للمشروعات الاخرى

بس هيه الفكرة فى المشروع اللى ابدأ بيه

والله وانت كمان واحشني كتير يا باشا
بس واضح ان المولوده الجديده واخداك مننا
بس يا سيدي من منطلق خبرتي القليله في عمل اي مشروع بغض النظر عن نشاطه
بما انك حتبدا تجرب في مكان مثلا محدش عمل فيه النشاط ده قبل كده
يبقي تحاول انك تبدا باقل امكانيات فرضا انها حتكون تصليح الكاوتش
وواحده واحده تبدا تزود علي حسب امكانيات ومتطلبات اهل المنطقه او روادها وساعتها حتقدر تحدد ايه اللي ممكن تزوده وبانهي كفائه
لان دلوقتي وضع السوق بقي صعب ومش مضمون
لو حتدخل في مكان كله شغل وحركه لنفس النشاط حتدخل بطريقه من اتنين
يا حتدخل بطريقه انا عاوز اكل عيش وخدوني تحت جناحكم ودي في حاله لو انت داخل وسط حيتان وحتلاقي اللي يساعدك فيهم ويسندك
يا اما تدخل بتقل وتنافس بس دي فيها خطوره لانهم ممكن في يوم وليله تلاقيهم بيبيعوا باقل من السعر اللي انت بتاخد بيه في الجمله والحركات دي حصلت قدامي كتير في السوق
زمان يا محمد لما كان حد بيعمل مشروع كان بيحط الفلوس علشان يلمها تاني من ربحه ويلم فوقها ويفتح فروع ويشتغل
دلوقتي الواحد بيعمل المشروع علشان يطلع مصاريف متطلبات الحياه ويحقق ذاته كشخص قادر انه يشتغل وينتج وانا بتكلم عن نفسي علشان محدش يرد ويقول انت بتتفذلك وعامل فيها محلل اقتصادي
وطبعا ان كان دا ولا دا فالرزق بتاع ربنا وكل دي قواعد مش ثابته
ومن رايي بعد الرغي بتاعي دا كله انك تبدا بالحاجه اللي انت بتعرف فيها اوي وتقدر تشتغلها بدون اي عماله غيرك
طبعا حيكون فيه عماله بس تحت نظرك علشان العامل لما يلاقي صاحب المكان بيقوله دي بتتعمل بالطريقه الفلانيه وانت عملتها غلط وتضطرك الظروف انك تقوم تعملها بايدك قدامه يبقي ساعتها فاهم انك صاحب مكان بالخبره مش بالفلوس
وعموما تعالي غرمني واحد قهوه في اي حته ونتكلم براحتنا
بس حتبقي تحفه وانت الاسطي محمد هههههههههههههه
ربنا يقويك ويزيدك وتبقي صاحب اكبر مركز صيانه في القاره كلها

**mobitic** · 21-01-2009 12:02 AM

أستاذ ميدو
واضح ان عندك ميل لمشروع الكاوتش
هوا عموماً مشروع ناجح فى حالة اختيار المكان المناسب
بس فى نقطة عاوز اوضحها ليك
اصلاح الكاوتش مش مشكلة
انما لو فكرت فى بيع الكاوتشات فى لازم تحط فى دماغك انك معظم البيع عندك حيكون بيع آجل وخصوصاً لعربيات النقل والميكروباصات وكده
دول معظمهم إن لم يكن كلهم بيشتروا بالآجل طبعاً لأرتفاع أسعار الكاوتشات
فلو عندك النية انك تبيع بالآجل يبقى توكل على الله ولو انى ما انصحكش بيه فى بداية مشروعك
كمان ممكن تضيف له بيع وشحن البطاريات

لو بتفكر فى مشروعات تانية قول ولو اعرف عنها حاجه مش هتأخر معاك

سؤال
مبتفكرش ليه فى مشروع بيع قطع غيار واكسسوارات وكماليات وليكن فى الفيات والشاهين؟ خصوصا ان رأس المال اللى عندك كويس جدا كبداية للمشروع

المشروع ده عن تجربة غير شخصية مربح إلى حد كبير بشرط اختيار المكان المناسب
وربنا يوفقك