العبد لله كان من محبي عربيات كيا ، و اخر عربيتين كانوا عندي كانوا كيا ، الا اني قررت مؤخرا نقل العطا الى سيارات هيونداي بعد مجموعة تجارب سيئة مع الوكيل ، وارتفاع اسعار قطع الغيار , فضلا عن القيمة السيئة لسعر اعادة البيع لعربيات كيا.

امبارح كنت بأعمل صيانة الالف لعربية سعادتي الالنترا ، و قلت اشارك سعادتكم انطبعاتي الاولى عن مركز صيانة غبور في ابو رواش ، انطبعاتي شخصية من الدرجة الاولى ، وانا حاولت اكون دقيق وموضوعي وما ابالغش بقدر الامكان:

1- المركز كبير وصالة الانتظار مش بطالة ، وان كان صالة توكيل كيا eit الطف بعض الشئ فضلا عن توفيرهم الشاي والنسكافية والانترنت مجانا.
2- فترة الصيانة بتاخد وقت كبير جدا مقارنة بمركز كيا ، انا رحت هناك الساعة 12 ونص مشيت الساعة خمسة مع العلم ان صيانة الالف صيانة بسيطة
3- شاهدت عدد من العملاء غير راضيين عن الخدمة ومتذمرين
4- اسعار قطع الغيار لدى غبور ارخص كتير من كيا
5- اظن ان اسعار المصنعيات عند غبور اعلى من كيا ، وانا عندي ملاحظة بالنسبة للمصنعيات ، المصنعيات بتزيد مع ارتفاع سعر العربية ، يعني مثلا مصنعية تغيير زيت فيرنا اقل من مصنعية تغيير زيت النترا ، وده طبعا غير منطقي وغير مفهوم لان المجهود المبذول في الاتنين واحد
6- العربية بتطلع من عند مركز الصيانة بتاع غبور مش نضيفة ، بينما كانت عربيتي بتطلع من مركز صيانة كيا عروسة ، مغسولة ومتلمعة بره وجوه ، وده طبعا ذكاء لان مهما اتعمل في العربية من خدمة فالعميل اول مايشوف عربيته مزيتة وايدين ملبخة في كل حته هينسي اي حاجة تانية
7- في بديهيات معروفة في اي مركز صيانة مالقتهاش في مركز صيانة غبور ، على سبيل المثال الطبيعي ان المهندس يسلمك عربيتك بعد الصيانة ويقولك اتعمل فيها ايه ، لكن اللى بيحصل هناك ان يقولك تعالى اتفضل ادفع الفلوس من غير ماتشوف حاجة خالص ، وبعدين يديلك ورقة صافرة تروح تستلم بيها عربيتك مع نفسك وانت ونصيبك تلاقي العربية اصلحت ماصلحتش مش مشكلتهم
8-الكواليتي كنترول في مركز غبور يظهر والله اعلم انها مش ولابد ، عربيتي دخلت صيانة الف ومفهاش حاجة تقريبا ، طلعت واقبل مامشي من مركز الصيانة كنت مطلع فيها ملاحظتين. على سبيل المثال ، اللى طلع عربيتي (هي اتوماتيك) مايعرفش انه مفروض لما يركن العربية يسيبها على ال n او ال p فسبها على ال r و ده طبعا مش مفروض يحصل والعربية مادرتش وطبعا انا جديد على الاتوماتيك ومعرفش القصة دي وقعدت فترة ادور على حد يشوفلي المشكلة ، وبعدين لما جيت اطلع بالعربية لقيت الهند بريك اللى كان ناشف وجامد ملخلخ وبيشخشخ ، رجعت تاني واقعدت ادور على المهندس وما لقتوش وبعتوا معايا واحد تاني وخد العربية ورجعها تاني الورشة ، وبعد شوية رجعوهالي وهي احسن شوية بس مش زي الاول (على الاقل من وجهة نظري)
9- كان عندي مشكلة في الانذار ، ولما اقولتلهم عليها ، قالولي لازم سعادتك تجلنا اي يوم غير الجمعة والسبت ، وطبعا ده مش كلام ناس محترفة ، يعني ايه اخبط مشوار تاني عشان الفني باشا بيأجز جمعة وسبت ، وبعدين هو انا مفروض اخد اجازة من شغلي عشان اظبط الانذار.
10- لما كنت قاعد عند شباك الخزنة ، سمعت مهندس بيقول لواحده ان الصيانة مكملتش عشان مافيش فلتر في المخزن ، وبيتهيألي الموضوع ده صعب انه يحصل لو الناس دي عندها اي انظمة مخازن محترمة

الخلاصة ، ان تجربتي في مركز صيانة غبور ماكنتش لطيفة ، ومن الاخر ابتديت احن لمركز صيانة كيا والناس اللطيفة اللي هناك رغم انهم كانوا مفتريين في اسعار قطع الغيار واسعار اعادة البيع بتاعت عربياتهم في الارض.