زبون جديد :) باشتري لادا من الاسكندرية

انا باشتري اول عربية ليا و موش عاوز اقول الحاجات الي شدتني للادا لأن انا هنا في قسم اللادا هابقى زي ما بيقولو بابيع ميه في حارة السقايين :))

المهم انا في الاسكندرية .. بس ما اعرفش اييه التوكيلات الي اجيب منها اللادا ... موش عاوز اتسرع و ازعل في الآخر

انا كل الي باسمعه الآتي : مصري/روسي انا ميزانيتي موش هتفرق كتير ... بس عاوز اجيب العربية الصح موش عاوز ادفع فلوس في حاجات زيادة ... التكييف سمعت انه هيسخن العربية و موش بالقوة دي الباور يستاهل ثمنه و كام الفرق ؟؟

و كام الاسعار بتاعة الموديلات عشان انا موش عارف الأسعار خااااالص و ياريت تكون اسعار حقيقية عشان موقع كونتاكت كارز قسم اللادا واقف من زمان ما جددوهوش من كذا شهر ... يا ريت بس اي حد يكون جاب او شرى لادا الفترة دي يقول الاسعار

و مشكورين على مواضيعكم المفيدة جدا :)

الشك الي عندي من ناحية الروسي/المصري بيقولولي ان كل الروسي 1500 و المصري 1600

لو ده صحيح هل ال 1500 يستاهل الفرق مع التقفيل الروسي ؟؟

للأسف مش متابع الأسعار بس عامة أنصح حضرتك بالروسي، تقفيلها أفضل ومفيهوش مشاكل ومضمونة عن التقفيل المصري


عناوين وأرقام تليفونات شركة الأمل (توكيل لادا في مصر) - فرع إسكندرية :


الاسكندريه العامريه الكيلو 27 طريق القاهره الاسكندريه الصحراوى العامريه مرغم
4703330


سموحه 64 تعاونيات سموحه
4202727 - 4258015

بالنسبة للروسي هيا فعلاً 1500 سي سي، وحتى أغلى من المصري الـ1600 ! بس صدقني الفرق يستاهل فعلاً :)

شكرا يا أحمد و انا كده شكلي هارسى على الروسي

بس عندي سؤال غريب شوية هوه الروسي الجديد بتيجي مع باور ستيرينج ولا لأ ؟ و هل يستاهل الفرق و كام الفرق ؟

و شكرا يا احمد كمان مرة :)

و يــــــــــــــاريـــــــ ـــت لو حد معاه آخر الاسعار

الروسي بينزل من غير أي حاجة خالص بس أكيد ممكن يركبولها باور حسب الطلب بما أنهم بيركبوه للعربيات المصري هنا في التوكيل، وبيزود تمن العربية ألفين أو ألفين ونص تقريباً

أنا شخصياً ماهتمتش بحكاية الباور دي وانا باشتري عشان انا متعود على اللادا من زمان، بس هو أكيد هيبقى إضافة مفيدة لو حضرتك معندكش مانع انك تدفع المبلغ الزيادة

انا لسه راجع حالا من مشوار باشوف أسعار اللادا 2107 في الاسكندرية

شركة الأمل :
الروسي : 1600cc بدون أي كماليات فرش قماش اينجيكشن فقط الموجود 50500
تعديل الموتور للكاربيراتير +1000 موش عارف لييييييه ؟؟؟ هوه ده حقيقي ممكن تتعدل ؟

المصري : 1600cc كاسيت + سنتر + فرش جلد كاربيراتير 47500

أسعار الكماليات :
ممكن اختيار واحد فقط من الاتنين
باور 3000
تكييف بارد فقط 3300


أنا الي هاشتريه مصري عشان فرق الميزانية كبير قوي لو هاجيب كاربيراتير روسي (4000 + 500 سنتر و قزاز كهرباء تقريبا) كتير..

عاوز رأيكم هوه فعلا المفروض اصبر و ادفع فرق 4500 جنيه ؟؟

المصرية (في جرين بلازا) :

الروسي 54000 بدون كماليات
المصري 49000 كاسيت + سنتر .... بيتهيقلي مغليينها قوي ..

ربنا يوفقك يا باشا بس الفرق بين المصرى والروسى التقفيل بس ولا فية حاجة تانية

انا توكلت على الله و جيبت مصري منغير لا تكييف ولا باو و باحاول اصرف عليها شوية للاكسسوارات و الضروريات

لو سمحتم عايز أعرف بالنسبة للسيارة الاداالمصري فيها ايه مصري وايه روسي

ما هي عيوب ومزايا نظام البخاخات عن نظام الكاربيراتير

هل تم تعديل العفشه في اللادا الروسي الجديدة

نصيحة اخ بلاش المصرى ما سمعتش عنها خير ابدا

اقتباس:

---

المشاركة الأصلية كتبت بواسطة soda_542001

هل تم تعديل العفشه في اللادا الروسي الجديدة

---

يا ريت الآعضاء والمشرفين يجوبوا على السؤال دة


ما هي عيوب ومزايا نظام البخاخات عن نظام الكاربيراتير
بالنسبة لنظام الحقن هو ممتاز وملوش مشاكل وموفر فى البنزين ومميزاتة أكثر من عيوبة التى منها أنة يحتاج مكان متخصص لصيانتة عند الزوم مش أى حد يقدر يفتى فية زى الكاربراتير ممكن أى صنايعى بيفهم يصلحة بسهولة مع كثرة مشاكل الكاربراتير وزيادة استهلاكة للبنزين وبالتوفيق بأذن الله.

اقتباس:

---

المشاركة الأصلية كتبت بواسطة abdm

يا ريت الآعضاء والمشرفين يجوبوا على السؤال السابق


ما هي عيوب ومزايا نظام البخاخات عن نظام الكاربيراتير
بالنسبة لنظام الحقن هو ممتاز وملوش مشاكل وموفر فى البنزين ومميزاتة أكثر من عيوبة التى منها أنة يحتاج مكان متخصص لصيانتة عند الزوم مش أى حد يقدر يفتى فية زى الكاربراتير ممكن أى صنايعى بيفهم يصلحة بسهولة مع كثرة مشاكل الكاربراتير وزيادة استهلاكة للبنزين وبالتوفيق بأذن الله.

---

والسؤال التالى
أنا عايز أشترى الروسى بس خايف جدا من موضوع البيض بتاع المقص وانة ممكن يملص فى أى وقت وأعمل حدثة . هل تم عمل تعديلات فى الروسى بخصوص البيض ولا التعديلات اتعملت فى المصرى بس يا ريت الاخوة فى القسم يجوبوا على هذا السؤال لانة مهم جدا وسوف يتوقف علية شراء السيارة من عدمة

انا عاوز اعرف اية الفرق مابين المصرى والروسى

الاختلاف الظاهري بين المصؤي والروسي هو
1- الروسي اكسدامات نيكل مغطاة بحلية فايبر ..اما المصري اكسداماتها اتامونيا
2- الروسي تمتلك الوان محددة فقط وهي"ابيض -بترولي-نبيتي زيتي" وليست ميتالك...اما المصري بها الالوان"سماوي-فيراني-نبيتي-ابيض-اخضر - فضي" وكلها ميتالك
3-الجنوط الخارجية للمصري مغطاة بطاسات خارجية علي عكس الروسي
4-من الداخل صالون الروسي اوسع من الصالون المصري
5-الكراسي في المصري كراسي يطلق عليها كراسي طياره"بدون مسند راس" بعكس الروسي كراسي عادية
6-الروسي به حزام امان للكنبة الخلفية بعكس المصري لايوجد بها هذا الحزام
7-المرايات الجانبية للمصري مصرية الصنع لها بيت يتم التحكم من الداخل

اقتباس:

---

المشاركة الأصلية كتبت بواسطة bassoma

نصيحة اخ بلاش المصرى ما سمعتش عنها خير ابدا

---

وانا معاك في الموضوع ده
كل الناس اللي بتشتريها بتشتكي منها
مجرد ما يستلموا العربيه بيروحوا يغيروا كاوتش علشان سوء التخزين بتاع العربيات بيخليه يدبدب
وبيغيروا بيضات
والناس اللي عملت بيها حوادث لا قدر الله بيقولوا ان صاجها ورق والقديمه احسن منها الف مره