الموضوع: ما افضل نوع فى البطاريات الجافة و أسعارها

تجربتى فى شراء بطاريه جافه امس (19-6-2011) بالتفصيل الممل
كنت فى عربيه الشركه لانسر بوما 2008 مع صاحب العربيه ومادارتش والبطاريه ماتت مره واحده رغم ان البيان كان اخضر
كان راكب فيها امبير ac delco 55 من سنه ونص وماقلتش بم
المهم بعد عمل التوصيله ودوران العربيه ومطفينهاش خالص قاللى شور عليا
اتصلت باشرفكو -كنت مسيف رقمه - طلع بتاع كاوتشات وجنوط بس
طلعت اللاب وسرقت وايرلس من الشارع ووصلت للموضوع ده
ورحنا لاولاد سليمان اللى جنب اسماك وادى النيل وكان فيه تجديدات بتتعمل هناك وفعلا كان الارخص وهياخد القديمه ب 70 وهندفع 350 وناخد جافه زى اللى كانت موجوده بس مارتحتش للراجل وهو بيقول معكوسه ومش عارف ايه وحسيت انه بيفتى بس واضح انه من ارخص الاسعار
وعدينا على بيومى بس كان قافل ولما اتصلت بيه هياخد القديمه ب70 وهندفع 360- يتهيالى كانت ممكن تتهز شويه لو رحنا له وناخد -ac delco 55 برضه وضمان سنه بجد وهتعرفوا ليه بجد
واتصلت بالراجل اللى عند البحر الاعظم جنب كالتكس بس اسعاره كانت اغلى من سليمان فنفضنا له
وبعدها طلعنا على غطاطى اللى فى فيصل وعينك ماتشوف الا النور واعلى اشتغالات تشوفها هناك المهم سعيد-صاحب العربيه- طفاها بقلب جامد وطلب يكشف على البطاريه وكانت قرايتها كويسه وقالوا استنى 10 دقايق وبعد ال10 دقايق كشفوا على الجهاز وكلهم مره واحده قالوا ايه ده 8 ؟؟ البطاريه باظت
دخلنا جوه على التكييف وقعدنا قدام واحد من اللى بيبيعوا وبنساله على الفارتا ال 55 وبعد شويه حركات على الكومبيوتر والاله الحاسبه -بيحسب الخصم يعنى- طلع انه هياخد القديمه-حسبها ب 50 جنيه- وهندفع 420 جنيه ولسه واحد ماشى ودفع 430 لكن علشاننا هندقع 420 بس (اى كلام بيتقال)
وقال نوع تانى تركى غريب شويه وانرجيزر ومش عارف ايه وكويس والناس بتجيبه وضمان سنه
المهم خبطته السؤال المتين وقلتله لو باظت بعد 11 شهر هناخد واحده جديده طبعا ببلاش كفايه انى هخاطر واحط حاجه مش معروفه فى العربيه مش كده ولا ايه؟
تنح شويه وقاللى لا هتاخد واحده جديده بنص التمن قلت له امال ايه ضمان سنه ده؟ قاللى يعنى 3 شهور او 4 تاخد واحده جديده وعموما ممكن اظبطلك الموضوع ده
طبعا قفلت من ناحيته وزميلى قلق منهم جامد وشكرا على الكشف وادى العيال 5 جنيه والعربيه دارت زى القرد ولسه شغاله لحد دلوقتى داخله فى 3 ايام شغل متواصل ليل ونهار بالبطاريه اللى كانت فيها
===========
الخلاصه
ارخص مكانين
-اولاد سليمان اللى جنب وادى النيل للاسماك زى ماقال احد الاخوه الافاضل هنا بس ماعرفش ايه نظامهم فى الضمان
-بيومى حتى لو اغلى 10 جنيه بس بتاخد ضمان بجد والبطاريه بتتغير خلال السنه ببلاش زى ماشفت مره من حوالى سنه عندهم واحد غير بطاريه بعد 8 شهور من الشرا ومدفعش مليم
-غطاطى سمعه وحركات على الفاضى