الموضوع: حجزت السيريون 1300 gl اتوماتيك

يا أخ محمود روكانا راجع نفسك تانى


1. من رأيى ان السيريون عربية مش بتاعت مشاوير طويلة ولا سفر وإجهاد يومى وجسمها مكعبر كده
يعنى من الاخر عاوزة مشاوير قصيرة جوة البلد
وكمان لسه اعطالها ما ظهرتش وهل فعلا قطع غيارها معمرة زى تويوتا ولا لأ خصوصا انها مش رخيصة زى الكورى؟
ياريت حد يقولنا على اسعار قطع الغيار الاساسية لأن اغلب العربيات المباعة منها موديلات حديثة لم تظهر بعد كفاءتها وكمان هاتجيب اتوماتيك يعنى مشاكله مكلفة وتستلزم تغيير كلى للفتيس لا قدر الله


2. التويوتا ياريس أحسن من السيريون لو بتدور على سعر اعادة البيع خاصة انك كده كده بعد 5 سنين على الاكثر هاتحتاج تغير لظروف العائلة وساعتها تكون خلصت الاقساط ومحتاج تمسك فى ايديك مبلغ محترم تجيب بيه عربية تانية مستعملة او مقدم زيرو تانية ان شاء الله
افتكر ان السيريون مش هايكون سعر اعادة البيع بتاعها يستاهل زى ما تكون ياريس ولا لانسر بوما


3. عن نفسى أتمنى لك كل الخير والتوفيق فى اختيارك بس الواحد بيحسبها كصفقة كاملة مش شكل وكماليات وامكانيات وقطع غيار ومصاريف صيانة وبس
يعنى افتكر ان فيه عربيات كتير فى نفس الفئة السعرية بتاعت السيريون وتستحق زى البروتون جين2 وبيرسونا ولا الهيونداى نيو اكسنت ولا حتى الماتريكس لو بتحب الهاتشباك الكبيرة وكده كده انت بتقول مش هاتفرق فى القسط غير فى السنين بس
فالأفضل تجيب عربية تفرح بيها يومين ولما تحب تبيع ما تجيبش ثمنها ولا تجيب عربية تانية اغلى حاجة بسيطة ومتجربة ومضمونة وتجيب ثمن كويس لما تحب تبيع


4. بالرغم من ان دايهاتسوا تابعة لتويوتا بس توكيل دايهاتسوا فى مصر غير مستقر ولسه يعتبر جديد وكمان الموديلات القديمة منها دلوقت حالاتها متبهدلة واسعارها فى الارض
بصراحة انا مش عاوز أبوظ عليك فرحتك بس احسبها تانى كده بينك وبين نفسك وخد قرارك الاخير