الموضوع: تركيب زجاج خلفى كهرباء لبولو 98

الفكره طقه فى دماغى من زمان وكنت عايز انفزها
وكان اللى مانعنى أنى مرتبط بتاجر معين فى قطع الغيار الأستيراد هو اللى يجبهملى لأنى باخد منو حجتى نضيفه وكامله
المهم أتأخر عليا فى انو يجبهم
نزلت انا لفيت فى الحرفيين على المكنتين وجبتهم من نادر أوتو موتيف ب 350 المكنتين الخلفى بزرايرهم
وخدتهم وأتكلت على الله
وروحت للكهربائى بتاعى مشاء الله عليه فى شغله بتكيف وانا بتفرج عليه وهو بيشتغل من نضافته وحسن تفكيره عملهم الضفيره بتاعتهم وطبعا ركبت معاهم وحده رفع وبدأيشتغل ويمشى السلك فى جسم العربيه طبعا مش زى بعض العكاكين يمشى السلك وخلاص لأ جاب حاجه أسمها مكرونه مشى فيها السلك المكرونه دى بتبقى عامله زى الخرطوم الصغير
المهم بدأنا نركب وجهتنا فى الأول صعوبه فى فك المكنه القديمه العاده
استعانه بالله وفكناها بسلام
وكلو كان ماشى زى الفل
بس وجهتنى مشكله أيه هى أن الفرش القديم مفتوح فيه دايره مكان الأكره طب وأيه الحل
لقيتو بيقولى هو انت مش هتعمل زرار ورى فى البابين قلتلو أه صحيح كانت تايهه عن بالى
قالى هنجيب زرارين موجودين فى السوق شبه بتوع العربيه الفابريكه
ونظبطهم فى مكان فتحه الأكره بتاعت الأزاز قلتلو تفتكر تداريها ويبقى شكلها كويس
قال نتكل على الله ونفذ وان شاء الله هتبقى حلوه
وفعلا من يتكل على الله ويسعى ربنا بيديلو اللى نفسو فيه
ركبو الزرارين مكان فتحات الأوكر وداروهم تماما لا وجود أثر لمكان الفاتحه دى وتشفها تقول هما نازلين كدا فابريكه
خلصناو قفلنا وجربنا الحمد لله النتيجه كويسه وأصبح عندى أربعه زجاج كهرباء بشغل فابريكه مش عك
نيجى بقى للمهم اللى هو الحساب
طبعا الراجل شغلو زى الفل
وقعد يشتغل فى العربيه من الساعه 6 للساعه 1.3 وطلع عينو وظبط الدنيا كويس الحمد لله
كام ياعمنا الحساب قالى انا حطيت بضاعه من عندى سلك وكلبسات كهرباء وجرباتها ب 40 ج
قلتلو ماشى قلتلو طب والمصنعيه قالى 250 بصيتلو قالى 200 بس انت مش غريب عنى وصاحب محل أنا عارف ان ممكن ناس كتير تقول كتير بس اللى يشوف شغل الراجل ده ما يستخسرش فيه 1
ودى كانت رحلتى مع تركيب الزجاج الكهرباء الخلفى بوحدات رفع بتكلفه أجماليه 670 (مكن زجاج 350/وحده رفع وولف 40 ج / مصنعيات وسلوك وكلبسات 250/20 أكراميه )
كل دا رغى أنا بقى أصدى أيدى وجعتنى

بص عشان تبقى معايا فى الصورة انا عامل حسابى على قرشين ييجوا الشهر الجاى ان شاء الله و اذا ربنا اراد جزء منهم ها يروح للبولو عشان اظبط الكماليات (و على راسها الزجاج)

عشان كده اخر مره فى الحرفيين سألت عند البيومى على الحاجات و قال لى انها موجودة (ضفيرة و مكن و فرش ابواب ) بس السعر مش مغرى نهائى و كمان امامى بس
انما لو ينفع يبقى امامى و خلفى كده يبقى يشجع اكتر
بالنسبة لمجمع المفاتيح اعتقد انه بيبقى فى الباب بس ده على اعتبار ان الزجاج الكهربا امامى بس (2 زرار مش 4)