الموضوع: اكسسوار لــــــوجى ..

المشاركة الأصلية كتبت بواسطة HaMeD_73

يلى يادكتور عزت مستنين الصور والاسعار

أنا لما جيت أصور بالنهار ، صورت صورة واحدة ولقيت الكاميرا فصلت وعايزة تتشحن ، وعلى ما اتشحنت كان الليل دخل ، فمعلش أنا هاحط الصور الليلية اللى مش أد كده على وعد بصور أفضل بكره ..

وبالنسبة للأسعار الدقيقة فكانت كالتالى :

جهاز الانذار تمنه بعد الخصم 350 جنيه (ممكن ييجى أقل 10 أو 20 جنيه من التوفيقية)
الشاشة 590 جنيه والتمن بعد الخصم 500 جنيه
الكاميرا 190 جنيه ، والتمن بعد الخصم 140 جنيه
والتركيب كان 50 جنيه لجهاز الانذار ، و80 جنيه للشاشة والكاميرا


طقم دواسات 115 جنيه ، و80 جنيه بعد الخصم
والعراقات 80 جنيه ، و60 جنيه بعد الخصم

والنهارده جبت من شبين الكوم طقم دلايات سمرا بـ 35 جنيه
بس دول عايزين سمكرى يركبهم ، فهاصورهم ان شاء الله بعد التركيب

الحقيقة أنا برضه لاحظت ان اللون الفيرانى التراب بيبان فيه
ولما بامسحه باحس انه مش بيتشال بسهولة
فجبت شمع سيارة اسمه ابرو Abro car wax تمنه 20 جنيه
المفروض انه يخللى التراب والأوساخ ما تلزقش فى العربية ويديها لمعة
وأنا استخدمته على نص الشنطة وسبت النص التانى وسبت العربية من غير غطا عشان لما أشيل التراب الصبح أقارن وأشوف اذا كان فعلاً فعال فى موضوع سهولة ازالة التراب واللا لأ.

هاجهز الصور وأرفعها واحطها فى المداخلة التالية أول ما تجهز ..

المشاركة الأصلية كتبت بواسطة karimemam

و لقيت فى فرق ولا لأ؟
و ازاى بيتحط الشمع ده؟

فعلاً فيه فرق كبير وواضح
يعنى أنا حتى الآن مازلت فى مرحلة اختبار لنصف الشنطة المتشمع والنص اللى مش متشمع ، وهاستنى على كده شوية لغاية ما أعرف امتى مفعول التشميع بيروح.

أولاً : لما بانزل الصبح وأشوف التراب على الشنطة بألاقيه أكثر كثافة بشكل واضح جداً فى النصف الغير متشمع عنه فى النصف المتشمع ، لأن الجزء المتشمع مش بيسمح للتراب ان يلزق عليه فالهوا بيطيره ويكون التراب طبقة رقيقة على عكس الجزء الغير متشمع

ثانياً: عند مسح التراب بالفوطة ، يكفى جدا انك تهش التراب مش مسح بالمعنى المفهوم علشان النصف المتشمع ينضف ، أما النصف الآخر فبالمسح تلاقى التراب بيتنقل من مكان للتانى وتحس انه لازق ، ولازم تمسح مرة ، وبعد كده تنــطــر الفوطة عشان تشيل التراب اللى عليها وتمسح تانى ..

(ملحوظة : الفوطة عادية مش زفرة)


أما استخدامه فمافيش أسهل منه ..
هو بيبقى برطمان فيه الشمع زى الكريم كده وبييجى معاه سفنجة ، بتحط السفنجة فى الكريم وتمسح بيها العربية فى حركة دائرية لغاية ما تغطى الجزء المراد تشميعه ، وبعد كده تنتظر عشر دقائق لغاية الشمع ما ينشف على العربية ، وبعد كده بفوطة قطن ناعمة (ممكن فانلة داخلية قديمة مثلاً) بتمسح الشمع الناشف ، هتلاقى لمعان مبهر للجزء المتشمع عن الأجزاء الأخرى.

وفيه أنواع كتيرة فى السوق وكله شغال ..