يا تري دي مشكلة في ضبط التاكيهات ولا ديسك وأسطوانة ؟

**AymanPt** · 31-10-2009 11:23 PM

السلام عليكم ورحمه الله و بركاته .

أخواني الكرام و باشمهندسي منتدانا الغالي نايل موتورز

كان عندي مشكلة غريبة في البيجو الـ 205 بتعتي ..

انا شاريها من شهرين و كانت حالتها زي الفل و سحبها ممتاازة و 100%
و ماتورها معدل و فيه 5 سرعات و بوصل للـ 160 مستريح (جربت السرعة دي مرتين بس , لآني لآ أهوي السرعة)

بقالي 3 أيام إلي الأن و حالها أتشقلب ,,
توجد رعشة غريبة في الغيار الأول ,, و ضعف السحب ,, أرتفاع صوت المحرك علي غير عادة ,, و التسقيف بعد كل نقلة خصوصا بين الثالث و الرابع حتي لو انا حارق علي الغيار شوية

اليوم كان يوم حافل لحل هذه المشكلة : غيرت البوجيهات (الحمدلله مكنتش معرقة زيت أو حاجة) و الأبلاتين و الكوندينسر و البوبينة لواحدة أستيراد ممتازة ,,
و نظفت الكرابراتير و غيرت الفلاتر ,,
و برضه للأسف المشكلة موجودة

انا بستعمل بنزين 92 دائما ,, و بستخدم زيت كالتيكس SI

الميكانيكي بيقول ان ده عادي و مفيش حاجة ,, بس هو شاكك في الكاربراتير ومن الأفضل شراء كاربراتير أستيراد

بس العربية مكنتش كده أبدأ , خصوصا مووضوع الرعشة إللي في الغيار الأول (عند الطلوع من السكون إلي الحركة)

انا شاكك في التاكيهات , أوديسك وأسطوانة ,,

يا تري المشكلة في ايه بالضبط , لآني بجد حزين علي حال العربية دلوقتي جدا و مش عارف ايه اللي شقلب كيانها بالشكل ده

بأنتظاركم أخواني الكرام و جزاكم الله خير .

**samirayad** · 31-10-2009 11:46 PM

توجد رعشة غريبة في الغيار الأول ,, و ضعف السحب ,, أرتفاع صوت المحرك علي غير عادة ,,

ديسك وأسطوانة

**AymanPt** · 01-11-2009 12:18 AM

السلام عليكم ورحمه الله و بركاته باشمهندس سمير ..

ربنا يكرمك يا باشمهندس علي رد حضرتك ,,
طب بخصوص التسقيف اللي في الغيارات ده ,, برضه يكون سببه الديسك و الأسطوانة ؟

و جزاك الله كل خير علي رد حضرتك.

**samirayad** · 01-11-2009 12:34 AM

شوف يا أيمن باشا
أنت مش حتخسر حاجه
أما تظبط تاكيهات الأول
وتشوف موضوع التسقيف والسحب وآداء المكنه
والله الوضع عجبك يبقى خير وبركه
لسه الأمور مش متظبطه
يبقى معانا موضوع الدبرياج
يعنى خد الأمور خطوه خطوه
أصل العيوب بتاعة العربيات دى
فعلا ليها أكتر من سبب
بس موضوع الرعشه اللى مع الغيار الأول ده والطلوع بالعربيه
ضعف فى سوست الديسك بدون شك

**AymanPt** · 01-11-2009 12:43 AM

الله يخليك و يوفقك يا باشمهندس سمير.

بصراحة حضرتك طمنتني جدا بخصوص ضبط التاكيهات في الأول قبل الدخول في حوارات الديسك و الأسطوانة ده .

طب لو - لاقدر الله - طلع الموضوع ديسك و أسطوانة , هل تغييرهم صعب و مكلف و لازم أسيب العربية عند الميكانيكي ؟

بيني و بينك و الله يا باشمهندس : أول مرة تحصل معايا المشكلة الغريبة دي من سنين في السواقة , و مش عارف ايه التصرف حيالها .

الله يبارك في علمك يا باشمهندس و يكرمك .

**samirayad** · 01-11-2009 12:47 AM

سيبها على الله وجرب الأول الحاجه السهله
اللى هى التاكيهات

وأبقى قولنا على التطورات
وكلنا معاك ياباشا وأخواتك فى المنتدى

**AymanPt** · 01-11-2009 12:52 AM

مش عارف و الله أقول لحضرتك ايه يا باشمهندس علي ردودك الطيبة دي .
ربنا يفتح عليك يا باشمهندس و تحقق كل ما تتمناه

إن شاء الله رب العالمين هروح لميكانيكي يوم الأتنين ,, نظرا لآن بكرة أجازة ,
و ربنا ييسر إن شاء الله و يا رب يكون العيب تاكيهات .
و إن شاء الله تعالي هقول لحضرتك علي أخر التطورات يوم الأتنين .

ربنا يكرمك يا باشمهندس علي تعبك معي .

أخوك : أيمن.

**AymanPt** · 06-11-2009 01:27 PM

السلام عليكم ورحمه الله و بركاته باشمهندس سمير

بعتذر لحضرتك علي التأخير: بس انا لسه أمبارح روحت الميكانيكي ,,
الحمدلله ضبطت التاكيهات و غيرت جوان وش التاكيهات عشان كان متأكل خالص,,

السحب أتحسن شوية , لكن لسه في الرعشة الغريبة في الغيار الأول
ركب الميكانيكي العربية و شاف حوار الرعشة دي ,,
من غير لما أتكلم قال انها أكيد أسطوانة ,,
بس قالي مشي حالك بيها كام شهر كده لحد لما تغيرها , لآن مفيش ضرر علي المحرك غير في موضوع الرعشة و السحب ده .

يا تري الكلام ده صح ولا لأ يا باشمهندس ,, و هل ينفع أسوق العربية حاليا كده ؟

معلش يا باشمهندس تعبتك معي , ربنا يجازيك كل خير.

**samirayad** · 06-11-2009 01:55 PM

السلام عليكم ورحمه الله و بركاته باشمهندس سمير

وعليكم السلام ورحمة الله وبركاته يا أخى أيمن

السحب أتحسن شوية

ييقى الصوت أتحسن شويه كمان وده بسبب ضبط التاكيهات

بس قالي مشي حالك بيها كام شهر كده لحد لما تغيرها , لآن مفيش ضرر علي المحرك غير في موضوع الرعشة و السحب ده .

يا تري الكلام ده صح ولا لأ يا باشمهندس ,, و هل ينفع أسوق العربية حاليا كده ؟

فعلا الراجل ده بيتكلم صح
ومتقلقش طالما السحب معقول شويه
ولو أنت عاوز تخلص وتغير طقم دبرياج
توكل على الله
لعدم أجهاد المكنه (لو كان السحب معاك مش تمام أوى )
فالتبكير حلو فى أى مشكله فنيه
وخصوصا لو كنت بتسافر بالعربيه كتير وبتحمل على المكنه
وكده كده أنت حتعمر دبرياج
فخير البر عاجله
أما لو كنت بتستعمل العربيه داخل البلد وتحميلك على المكنه خفيف
ممكن تأجل شويه وتتابع وأهو أنت عارف الوضع عندك
بس لو أنا مكانك
حخلص على طول ......
طبيعه عندى ....وموسوس حبتين فى الحاجات دى
هههههههه

**AymanPt** · 06-11-2009 04:45 PM

ألف شكر يا باشمهندس سمير علي ردك الوافي ..

انا أستخدامي للعربية جوة البلد ,, مش بسافر بيها حاليـا ,,
بعمل حوالي 10 - 15 كيلو في اليوم علي أفصي تقدير ,, مع يوم راحة .
و عموما مش بحب أقرص علي العربية أو أشد بيها ,, أستخدام حنين شوية .

الحمدلله السحب فعلآ أتحسن شوية مع أنخفاض الصوت شوية بعد ضبط التاكيهات .
يتبقي الأن مشكلة الدبرياج .

الميكانيكي قال لي ممكن تمشي حالك شهرين أو تلاتة بالوضع الحالي ,, لحد لما تغيير الأسطوانة و الديسك .

بيني و بينك يا باشمهندس أنا نفسي أخلص علي المشكلة دي علي طول :) ,, بس انا كنت مضبط العربية و شديتها كويس أول لما أشتريتها , و جاءت مشكلة الدبرياج دي علي غفلة ,
و بالتالي هضطر للأنتظار شوية لحد لما أضبطها .

معلش يا باشمهندس سمير : هل لازم الميكانيكي يرفع الماتور من العربية في تصليح الديسك و الأسطوانة ده ؟
و هل الموضوع التغيير ده عامة مكلف ؟
و فعلآ سؤال يلح عليا يا باشمهندس : هل من السهل كده ان الديسك و الأسطوانة انهم يبوظوا ,, ولا عمرهم الأفتراضي أنتهي ؟

بأنتظار ردك يا باشمهندس سمير ,,
أسأل الله تعالي لك ان يوفقك و يبارك فيك يا باشمهندس علي تعبك معي .