نيو اكسنت (عربيه كورى ولكن)

**walidjawad** · 03-11-2009 05:39 PM

السلام والتحيه على كل الهيونداويه
الموضوع باختصار . انا كنت من يومين فى ابوغالى عشان اشوف النيو اكسنت الاتوماتك وكمان احجزها لانى قريت عنها كتير فى المنتدى الجميل ده و شكلها عاجبنى- بس ده كان قبل مااشوفها- المهم , اتفرجت عليها من بره عاجبنى شكلها اوى تحس انها (مدكوكه) كده وفيها شياكه
بعد كده خليت بتاع السيلز يفتحلى العربيه عشان اقعد فيها واستفرج بتركيز........... طبعا صدمت من اول ماقعدت من التابلوه البلاستيك لدرجه انى حسيت بانى قاعد فى محل بتاع فوانيس رمضان صينى
الخامات مش زى ماكنت متوقع كنت متخيل انها هتبقى جامده وخصوصا انها تقفيل كورى.
هو فعلا التقفيل كويس جدا بس الخامات وحشه . بجد استغربت وخصوصا سعرها مش رخيص.
انا عارف ان الواحد مش هياخد كل حاجه جامده فى عربيه واحده وده اسلوب تسويقى بحت. بس برضه كان ممكن تتظبط عن كده شويه انا عارف ان الموتور بتاعها قوى والعفشه بتاعتها ناشفه شويه بس رياضيه يعنى تستحمل المطبات اللى عندنا . طبعا السى دى اللى جاى معاها وحش جدا غير اللى موجود فى البرشور بتاع العربيه تقريبا عشان دى الحاجه اللى بتتقفل هنا . المهم انا استخرت ربنا وحجزتها عشان ممكن الحاجات اللى بقول عليها ممكن تتظبط بس اللى دايقنى انى هدفع مبلغ فى حاجه مش جامده اوى .

يانهار ابيض ....... انا طولت اوى معلش بس حبيت اشارككم فى نقاط معينه بخصوص الاكسنت
ومعلش للاطاله

**amr.elsayed** · 03-11-2009 06:05 PM

يا استاذ وليد مافيش حاجة كاملة الكمال لله وحده استمتع يا باشا بعربيتك الجميلة
والف مليون مبروك وربنا يعطيك خيرها ويكفيك شرها

**monmonmon** · 03-11-2009 06:29 PM

ألف مبرووووك يا باشا و ان شاء الله تعجبك

هى فعلا الخامات بتاعتها زى ال i10 تماما فى البلاستيكات و بعض الاجزاء

انا لما نزلت اشوف ال i10 لاول مره فى النور قلت ايه دا!!! انا قريت فى تقارير اوروبيه انها ممتازه و كلام فى السما The interior could pass for something much more expensive :10D5C8~1107: و كلام عن ال Quality و...و........

بس بجد الاكسنت عربية جميله و على فكره الماتريكس كمان خاماتها وحشه يمكن اكتر من النيو اكسنت.. بس عربية كفاءة و ماشيه معايا اكتر من 72000 كم الحمد لله

العربية اعتمادية و مميزاتها كتيير حاول متضايقش منها فى الاول كده انت لسه مركبتهاش

**khaledmontero** · 03-11-2009 06:38 PM

لازم تعرف ان كل عربية لها مميزات و عيوب . أهم حاجة ان العيوب تبعد عن أساسيات العربية ذي الموتور والعفشة و ما إلي ذلك .. و كمان في حاجة مهمة هي ان العربيات في مصر أغلي من اي حتة في الدنيا .. ألف مبروك و ربنا يكرمك فيها .. و استمتع بالعربية ..

**m_s_h_a** · 03-11-2009 08:42 PM

امال لو شوفت الخامات الداخليه فى السيراتو هتقول ايه والالنترا احسن شويه

**sss2000** · 03-11-2009 08:53 PM

هي دي مصر بركاتك يا غبور

**walidjawad** · 03-11-2009 10:30 PM

طبعا مش عارف اقولكوا ايه
..... بجد بجد ريحتوا قلبى وخلتونى احبها اكتر.... على فكره انا حابب شكلها اوى ولما قريت عن الموتور وقدرته فى المنتدى انجذبت ليها اكتر .. يمكن اللى خلى شكلها يصدمنى هوا يمكن لون التابلوه والفرش- لونه بيج فاتح- مع ان اللون عامل شغل مع لون العربيه النبيتى بس ده من بره بس لما تيجى تعقد فيها تحس باحساس تانى

بس برضه انا حاببها وربنا يكرمنى واستلمها قريب ان شاء الله

واول ماستلمها حعمل ان شاء الله ريفيو عنها وشكرا .........

**حماده المصري** · 04-11-2009 02:45 AM

هوه اساسا مفيش عربيات في السعر ده هتلاقي خامتها ممتازه

كله في نفس الخامات دي يا اعلى بشويه بسيطه يا اقل بشويه

وعامه خامات النيو اكسنت جيده متقلقش منها

وربنا يباركلك في العربيه

**adel1414** · 04-11-2009 03:14 AM

ربنا يباركلك فيها

**dark_smoky** · 04-11-2009 10:05 AM

أستاذ وليد .. انت كاتب انك حجزتها من عند ابوغالي ، ممكن اعرف هل هو ابوغالي اوتوموتيف اللي عامل اتفاق مع العربي الافريقي ؟؟ لو هو ممكن تقوللي ايه اجراءاته بالظبط و امتي ميعاد التسليم لأنني عايز احجز برضه عنده .. و شكرا مقدما