استفسار هام لسبعاوى وباقى الاخوة بشأن سخونة المحرك

**حسام كرم** · 13-05-2007 10:46 AM

حدث امس اثناء تنظيفى لبطارية السيارة من الخارج ان نزعت بدون قصد سلك الكهرباء الواصل الى مروحة الردياتير واثناء سيرى بعد فترة وجدت بخار المياة يتصاعد من جميع فتحات الكبوت علماً بان الردياتير بة مياة خضراء المفروض انها لاتتبخر الا على درجات حرارة عالية جدا ونظرت الى مؤشر الحرارة فوجدتة قارب على اللون الاحمر فى اخر المؤشر وفورا بطلت العربية وانتظرت لبعض الوقت وادرت السيارة واضفت 2 لتر من ماء الحنفية مما يدل على ان الردياتير قد فرغ بالكامل واحضرت ميكانيكى واكتشف نزع سلك كهرباء المروحة وبالفعل اشتغلت وعادت درجة الحرارة الى طبيعتها ولكن خوفى الان من انة قد يكون حدث ضرر لاحد اجزاء المحرك او وش السلندر
فالرجا افادتتى افادكم اللة
وشكراً

**sab3aawy** · 13-05-2007 11:12 AM

طالما ان السيارة دارت بعد كدة وبدون مشاكل وشغالة كويسة والمية مش بتنقص يبقى عدت على خير، عملية تبخر المياه بتستهلك طاقة حرارية عالية جدا وبالتالى تبرد المحرك، يعنى طوال مال التبخر كان شغال مش بيلحق المحرك بيوظ لكن المشكلة كلها لو كانت خلصت،

وبعدين دورة لمياه سعتها ليست 2 لتر فقط، دورة المياه على الأقل ستة لتر، الدرياتير لوحده بياخد 4 لتر والخراطيم وطرمبة المياه ومجارى المياه بالمحرك بتاخد لها لترين،يعنى انت مانقصش عندك غير تلت كمية المية ، لذلك لا تقلق ، ان شاء الله سليمة، اهم حاجة انك تتابع بس نقصان المياه فى الأيام القادمة وتتطمن انه لم يتغير عن المعتاد

**حسام كرم** · 13-05-2007 12:14 PM

انا شاكر لك جدا يا بشمهندس سبعاوى وانا ساخذ بنصيحتك فى متابعة نقص المياة ولكنى ساذهب لاغير المياة لاننى قد وضعت مياة حنفية على المياة الخضراء فباى انواع المياة الخضراء تنصح فلقد وجدت نوع سعودى تركيز 40% فى بنزينة وطنية بـ 30 جنية ويوجد موبيل المصرى تركيز 40 % ايضا بـ 41 جنية وذلك بخلاف مصاريف غسيل الردياتير فى المحطتين والذى يقدر بـ 15 جنية ام تنصحنى بـ تغيير المياة فقط دون غسيل الردياتير علماً ان المياة الموجودة بها كان بقالها سنة وهل افهم من كلامل اننى ساحتاج اكثر من جركن فى عملية تغيير المياة
وشكراً جزيلاً لك يا اخ سبعاوى