السلام عليكم ورحمه الله
كلنا حسينا بلسعة البرد اللي ضربت القاهرة وكافة مدن مصر اليومين اللي فاتو
وانخفضت درجة الحرارة فيها ل 10 درجات مئوية ده غير الهواء البارد القارس واحنا لسه في اول فصل الشتاء
هل فكرتم في الناس اللي بتبات في الشارع من غير غطاء
هل فكرتم في اسر كاملة بتقيم في شققهم على البلاط او الارض مباشرة بدون اي اثاث
انا اعرف ناس منهم
لسه كان بيكلمني شيخ صالح احسبه على خير بيقوللي عايز سجادة قديمة او مقطعة لاسرة من ام بتربي اتنين ايتام وماجرة شقة في احدى المدن الجديدة وليس لديها اي اثاث
والسقعة وجعت الاطفال بشدة
بصراحة اتوجعت قوي
وقعدت افكر الواحد مننا قاعد في مكان دافئ وبينزل من شغلة او بيته على عربية مقفولة ودافيه
ولابس لبس تقيل وماسج مج الشاي ولا النسكافية في ايده
وحواليه عيون شايفاك البرد نخر عظامهم
حقيقي ما اشد ظلم الانسان لاخيه الانسان
اعذروني اني اتكلمت معاكم بس انا بعتبركم كلكم اخواتي وانكم لازم تشاركوني همي زي ما بتشاركوني فرحي
عشان كدة خدت قرار بحملة وهابدأها فورا
حملة بطانية لكل فقير
في بطانيات بتتباع في بولاق ابو العلا في وكالة البلح
البطانية في منها انواع كتير قوي
في ب 17 جنية لغاية 70 جنية
الانواع الكويسه اللي جبتها قبل كدة كانت في حدود من 28 الى 32 جنية
عايزين كل واحد فينا واحنا لسه اول الشهر
يشوف هايقدر يجيب بطانية او اتنين او تلاتة
او مش قادر يدفع غير 5 او 10 جنيه فقط ويتشارك مع اي حد تاي ويجيب بطانية(وده اجره اكبر من اجر اللي معاه فلوس كتيران شاء الله)
وانا اول واحد هاشارك في الحملة دي
ومن دخل اعلانات المنتدى وبعد اذن اصحاب المنتدى هانتبرع ب 10 بطاطين عسى الله ان يتقبلها ويجعلها في ميزان حسنات كل من شارك واشرف على اخراج صفحات هذا المنتدى
يا ريت كل واحد ينزل يجيب بطانية او اتنين او تلاتة ويدور على الغلابة ويدهالهم
ولو مش عارف يوصل للغلابة يكلمني وانا اوقله روح فين
او يكلمني واخدهم منه (البطاطين وليس نقود-فعفوا انا مش هاجمع نقود منعا لاي شبهة)
ولو مش عارف يجيب البطاطين منين يكلمني وادله ينزل يشتريها ازاي بس الجملة افضل من القطاعي
وربنا يجعلها في ميزان حسناتكم يوم لا ينفع مال ولا بنون الا من اتى الله بقلب سليم
وان شاء الله هانحط بانر اعلاني في هيدر المنتدى للحملة دي
وعايز كل واحد منكم يكون ايجابي
ياخد من والدة او والدته او اخواته وينزل يشتري البطاطين
الحسنات حواليكم كتير مستنيه اللي يلمها فما تستخسرش تلمها عشان هاتتزنق في كل حسنة يوم الدين
وما اشد دعوات المحتاج حين تفرج همه
وتخيل اب او ام مش قادرين يجلبو الدفئ لاطفالهم وكنت انت السبب
يا بختك
جزاكم الله كل خير ونفعنا بما علمنا وعلمنا ما ينفعنا

اخوكم في الله
كريم منير